Супрацоўніцтва для паляпшэння якасці

У Хоцімскім раёне актыўна развіваюць супрацоўніцтва з расійскімі ўстановамі адукацыі.

Як паведаміла выконваючая абавязкі начальніка мясцовага аддзела адукацыі Надзея Барадзіна, узаемадзеянне галоўным чынам накіравана на абмен вопытам у сферы культуры, адукацыі, спорту, турызму, духоўна-маральнага і грамадзянска-патрыятычнага выхавання моладзі.

— Беларуская і расійская сістэмы адукацыі ў многім падобныя. Сумесная адукацыйная дзейнасць дазваляе зрабіць працэс выхавання і навучання дзяцей больш якасным. Нам сапраўды ёсць чаму павучыцца адно ў аднаго. Таму мы імкнёмся да ўстанаўлення трывалых узаемаадносін з расійскімі навучальнымі ўстановамі, — адзначыла Надзея Сцяпанаўна.

Па яе словах, зараз ужо наладжана плённае ўзаемадзеянне з Ершыцкім раёнам Смаленскай вобласці, Суражскім і Клятнянскім раёнамі Бранскай вобласці. У рамках адпаведных пагадненняў распрацаваны сумесныя планы работы. Адметна, што, акрамя паляпшэння арганізацыі вучэбна-выхаваўчага працэсу, супрацоўніцтва з расійскім бокам добра ўплывае і на актывізацыю пазабюджэтнай дзейнасці хоцімскіх навучальных устаноў.

Так, надоечы педагогі і навучэнцы раёна прадставілі ў смаленскім горадзе Ершычы канцэртную праграму, якая дэманстравала ўсю шматграннасць хоцімскіх талентаў. На сцэне хацімчане выступалі з эстраднымі і народнымі песнямі, танцавальнымі нумарамі. Абыякавым канцэрт не пакінуў нікога, у сувязі з чым такую ж праграму плануецца прадставіць у іншых прыгранічных рэгіёнах Расіі.

Увогуле, у найбліжэйшы час на Хоцімшчыне накіраваны на пошук новых агульных кропак судакранання з суседнімі ўстановамі адукацыі. У планах — арганізацыя турыстычных паслуг, адпачынку для расійскіх школьнікаў. Ідэй і задумак мноства. Распрацаваныя мерапрыемствы будуць накіраваны на паляпшэнне якасці адукацыі і рознабаковае развіццё навучэнцаў.

Ганна СІНЬКЕВІЧ.
Фота прадастаўлена Хоцімскім аддзелам адукацыі, спорту і турызму.

“Дыпламатычныя” канікулы

Група беларускіх школьнікаў па ініцыятыве Пасольства Беларусі ў Расіі ў дні навагодніх канікул наведала Маскву. У яе склад увайшлі 44 вучні 4—8-х класаў Пярэжырскай сярэдняй школы, а таксама дзеці са шматдзетных сем’яў Мінска, паведамілі ў прэс-службе дыппрадстаўніцтва.

Трохдзённая паездка пачалася з наведвання пасольства і цёплай сустрэчы з Надзвычайным і Паўнамоцным Паслом Беларусі ў Расіі Ігарам Петрышэнкам. Для дзяцей былі арганізаваны экскурсіі па гістарычным будынку дыпмісіі і Дзелавым і культурным комп­лексе.

Праграмай было прадугледжана таксама наведванне навагодняй ёлкі ў храме Хрыста Збавіцеля, прагулкі па Краснай плошчы, парку “Сакольнікі”.

Мерапрыемства праведзена ў рамках рэспубліканскай дабрачыннай акцыі “Нашы дзеці” з удзелам Беларускай асацыяцыі шматдзетных бацькоў пры фінансавай падтрымцы выхадца з Беларусі кіраўніка групы расійскіх кампаній “СанСіці” Мікалая Уласюка.

Пярэжырская сярэдняя школа з’яўляецца падшэфнай арганізацыяй Міністэрства замежных спраў Беларусі, з якой рэалізоўваюцца сумесныя праек­ты, накіраваныя на захаванне па­мяці аб дыпламатах — ветэранах Вялікай Айчыннай вайны, аб іх укладзе ў станаўленне дыпламатычнай служ­бы, а таксама ролі беларускага знешне­палітычнага ведамства ў абароне і пашырэнні нацыянальных інтарэсаў краіны за мяжой. У 2000 го­дзе Пярэжырскай сярэдняй школе прысвоена імя былога міністра замежных спраў БССР Анатоля Гурыновіча. У 2016 годзе адбылася афіцыйная цырымонія адкрыцця школьнага музея імя А.Е.Гурыновіча, экспазіцыя якога прысвечана гісторыі школы, раёна і беларускай дыпламатыі. Асобны стэнд прысвечаны знешнепалітычнай дзейнасці Беларусі.

Мары здзяйсняюцца на беларускай зямлі

Юны журналіст з Расіі 11-гадовы Яўген Грышын сустрэўся з малодшым сынам Прэзідэнта Беларусі Мікалаем Лукашэнкам, паразмаўляў з кіраўніком дзяржавы на хакейнай трэніроўцы і наведаў Галоўную ёлку краіны. Падрабязнасці знаходжання хлопчыка ў Беларусі паказалі ў спецыяльным рэпартажы на тэлеканале “Беларусь 1”.

Юны расіянін прыляцеў у Беларусь з пасёлка Арцёмаўскага, што знаходзіцца пад Уладзівастокам. Хлопчык вельмі хоча стаць рэпарцёрам, і яго прафесійнай марай было зрабіць відэасюжэт пра Беларусь для свайго канала навін у інтэрнэце, які ён запусціў 1,5 года назад.

Шчаслівая выпадковасць дапамагла яму ажыццявіць сваю мару: на адной са здымак у Маскве ён сустрэўся з беларускімі журналістамі, якія параілі звярнуцца ў прэс-службу Прэзідэнта Беларусі. І вось праз месяц Жэню Грышына чакаў навагодні сюрпрыз.

У Беларусі 11-гадовы журналіст адразу ж уключыў камеру на сваім тэлефоне, каб зняць некалькі рэпартажаў пра сталіцу. Хлопчык падрабязна вывучыў выдатныя мясціны Мінска, пабываў з экс­курсіяй у музеі гісторыі Вялікай Айчыннай вайны, наведаў Белтэлерадыёкампанію, фабрыку “Камунарка”.

“Беларусь вельмі прыгожая, у вас ёсць шмат выдатных мясцін”, — падзяліўся ён сваімі ўражаннямі.

Але галоўным пунктам навагодніх канікул у Беларусі для Жэні Грышына стала сустрэча з малодшым сынам прэзідэнта краіны. Мікалай Лукашэнка запрасіў 11-гадовага журналіста ў госці і расказаў яму аб сваіх захапленнях, занятках музыкай, удзеле ў грамадскім жыцці школы і будучай прафесіі. “Я яшчэ не вырашыў. Можа, стану ўрачом: гэта вельмі добра — дапамагаць людзям. Можа, разгледзеў бы і ваенную кар’еру. Яшчэ я не паспеў вызначыцца, час ёсць”, — адзначыў Мікалай.

Яўген Грышын пабываў і на хакейнай трэніроўцы ў сына Прэзідэн­та Беларусі, у час якой яму ўдалося не проста паспрабаваць свае сілы ў гэтым відзе спорту, але і сустрэцца з кіраўніком дзяржавы.

Наведванне самага маштабнага навагодняга паказу ў Беларусі — Галоўнай ёлкі краіны — стала тэмай для асобнага рэпартажу юнага журналіста. Назіраючы за спектаклем, хлопчык нават не думаў, што тут здзейсніцца яшчэ адна яго запаветная мара: кіраўнік дзяржавы Аляксандр Лукашэнка і Мікалай Лукашэнка ў гонар свята падарылі Яўгену прафесійную камеру, пажадаўшы яму ўдачы ў журналісцкай справе.

“Вядома, такое жаданне было ў мяне, але я ніяк не мог уявіць, што менавіта сёння мары здзейсняцца і мне падораць прафесійную камеру. Цяпер я паверыў, што цуды на самай справе адбываюцца”, — заявіў Жэня Грышын.

Прадукцыя найвышэйшай якасці

Беларускія прадукты харчавання, якія пастаўляюцца ў Расію, — найвышэйшай якасці, заявіў Надзвычайны і Паўнамоцны Пасол Расіі ў Беларусі Аляксандр Сурыкаў.

“Граніцу Расіі за 10 месяцаў перасякло 1,1 млн т мяса-малочных прадуктаў харчавання. Гэта каласальныя аб’ёмы паставак. Вернута службамі Рассельгаснагляду назад вытворцам 7,5 тысячы т. Гэта сведчыць аб тым, што беларускія прадукты харчавання, якія пастаўляюцца, — найвышэйшай якасці”, — адзначыў пасол.

Адносна беларускіх прадпрыемстваў, для якіх абмежаваны допуск на расійскі рынак, Аляксандр Сурыкаў лічыць іх колькасць нязначнай. Паводле яго даных, усяго 20 з 600. “Гэтая лічба таксама сведчыць аб найвышэйшай якасці беларускіх прадуктаў харчавання”, — сказаў ён.

Аляксандр Сурыкаў падкрэсліў, што 95 працэнтаў беларускіх прадуктаў харчавання, якія ідуць на экспарт, пастаўляюцца на расійскі рынак.

Што тычыцца фальсіфікату, што выяўляецца ў Расіі пад маркай беларускай прадукцыі, то Аляксандр Сурыкаў лічыць, што гэта таксама паказчык якасці беларускіх прадуктаў.

Забойства пасла — адкрытая правакацыя адносна турэцка-расійскіх адносін

Нападзенне на пасла Расіі ў Турцыі Андрэя Карлава — правакацыя, заявіў Прэзідэнт Турцыі Раджэп Таіп Эрдаган. Паводле слоў кіраўніка дзяржавы, Турцыя і Расія маюць дастатковы вопыт, які дасць магчымасць не паддавацца на правакацыі.

“Атака супраць пасла Расіі ў Анкары — гэта атака супраць дзяржавы і народа Турцыі. Гэта адкрытая правакацыя адносна турэцка-расійскіх адносін. Упэўнены, што гэты факт усведамляюць і нашы сябры ў Расіі”, — сказаў прэзідэнт.

Кіраўнік турэцкай дзяржавы ад свайго імя і ад імя турэцкага народа выказаў спачуванні Прэзідэнту Расіі Уладзіміру Пуціну і ўсяму дружалюбнаму народу Расіі. Паводле яго слоў, у ходзе размовы прэзідэнтаў Турцыі і Расіі бакі сышліся на думцы аб неабходнасці ўмацавання салідарнасці ў барацьбе з міжнародным тэрарызмам.

“Адзначана мэтазгоднасць стварэння аператыўнага цэнтра па расследаванні здарэння, у рабоце якога прымуць удзел расійскія спецыялісты. Турэцкі бок падкрэсліў, што гатовы да сумеснага ажыццяўлення ўсіх неабходных работ, у сувязі з чым дадзены неабходныя ўказанні кіраўніку ўрада і міністрам”, — сказаў Прэзідэнт Турцыі.

Паводле слоў кіраўніка дзяржавы, інцыдэнт усебакова расследуецца пры непасрэдным удзеле кіраўніка МУС Сулеймана Сайлу.

Пасол Расіі ў Турцыі Андрэй Карлаў быў забіты ў панядзелак вечарам на адкрыцці фотавыставы ў Анкары. Забойцам пасла стаў экс-супрацоўнік турэцкай паліцыі. Нападаючы быў ліквідаваны ў ходзе паліцэйскага штурму.

Здабычу нафты скароцяць

АПЕК ужо дамовілася з Расіяй аб узаемапрымальнай формуле скарачэння здабычы нафты на 6 месяцаў. Аб гэтым расказаў міністр нафты Венесуэлы Эўлохіа дэль Піна.

“З расійскім бокам мы выйшлі на ўзаемапрымальную формулу, згодна з якой будзе замарозка на 6 месяцаў”, — адзначыў ён.

Венесуэла чакае падпісання дакумента па скарачэнні здабычы з краінамі, якія не ўваходзяць у АПЕК, 10 снежня ў Вене, паведаміў таксама Эўлохіа дэль Піна. “Мы чакаем, што ў ходзе сустрэчы, якая мае адбыцца, падпішам адпаведныя дакументы па ўзгадненні нашых пазіцый”, — сказаў міністр.

Паводле яго слоў, адразу пасля падпісання пагаднення будзе створаны камітэт па кантролі за скарачэннем здабычы нафты. “Ідэя заключаецца ў тым, каб стварыць такі орган адразу ж”, — дадаў ён.

У склад камісіі могуць уключыць Расію і Аман. Міністр растлумачыў, што ў складзе структуры будзе пяць міністраў нафтаздабываючых краін. “Тры будуць прадстаўляць краіны АПЕК (Кувейт, Алжыр і Венесуэла) і два прадстаўнікі ад краін, якія не ўваходзяць у АПЕК. Наша прапанова заключаецца ў тым, каб гэта былі Расія і Аман”, — расказаў Эўлохіа дэль Піна.

30 лістапада на саміце АПЕК было прынята рашэнне скараціць здабычу да 32,5 млн барэляў у суткі. З 1 студзеня 2017 года краіны, якія ўваходзяць у арганізацыю, зніжаюць сярэднясутачную здабычу на 1,164 млн барэляў. Картэль таксама павінен заключыць такую здзелку з нерэзідэнтамі АПЕК, перш за ўсё з Расіяй. Ад гэтых краін чакаецца скарачэнне здабычы на 600 тысяч барэляў у дзень, у тым ліку ад Расіі — на 300 тысяч барэляў у суткі.

Мадэрнізацыя эканомікі — справа маладых

Грамадства ўваходзіць у прынцыпова новую стадыю тэхналагічнага развіцця, калі на першае месца выходзяць інавацыі, якія з’яўляюцца адным з эфектыўных інструментаў сацыяльна-эканамічнага развіцця.

У лістападзе ў Маскве прайшла Усерасійская навукова-практычная канферэнцыя расійскіх і замежных студэнтаў, аспірантаў, маладых вучоных і спецыялістаў па праблемах практычнай рэалізацыі распрацовак па прыярытэтных напрамках праграмы “Даследаванні і распрацоўкі па прыярытэтных напрамках развіцця навукова-тэхналагічнага комплексу Расіі на 2014—2020 гады”.

Арганізатарам канферэнцыі выступіла Міністэрства адукацыі і навукі Расійскай Федэрацыі. У прывітальным слове міністра адукацыі і навукі Расійскай Федэрацыі Вольгі Юр’еўны Васільевай да ўдзельнікаў і гасцей канферэнцыі, у прыватнасці, было адзначана: “Міністэрства адукацыі і навукі Расійскай Федэрацыі надае асаблівую значнасць інтэграцыі навукі ў працэсы мадэрнізацыі і інавацыйнага развіцця навукаёмістых галін эканомікі. Гэтая глабальная работа магчыма толькі ў аб’яднанні намаганняў — дзяржавы, грамадства, бізнес-структур, вядучых ВНУ, даследчых цэнтраў і, канечне, таленавітых маладых вучоных”.

Для ўдзельнікаў канферэнцыі арганізатарамі была падрыхтавана вялікая дзелавая праграма ў фармаце пленарнага пасяджэння і тэматычных секцый з прадстаўленнем дакладаў удзельнікаў. Усяго за два дні работы канферэнцыі былі прадстаўлены 53 вусныя і 25 стэндавых дакладаў.

Канферэнцыю адкрыла пленарнае пасяджэнне, у якім прынялі ўдзел прадстаўнікі, вядучыя вучоныя і кіраўнікі інавацыйных прадпрыемстваў Расіі.

У рамках секцыі “Ад ідэі да практыкі — стаўка на маладых” удзельнікі сфакусіравалі сваю ўвагу на ролі маладога пакалення ў павышэнні выніковасці навукова-тэхнічнай дзейнасці, на секцыі “Інфраструктура падтрымкі сістэмы самарэалізацыі маладых вучоных” абмеркавалі перспектыўныя тэхналогіі маладзёжнага прадпрымальніцтва ў навуковай сферы, а на секцыі “Камерцыялізацыя навукова-тэхнічных распрацовак маладых вучоных” былі разгледжаны інструменты, з дапамогай якіх маладыя вучоныя з расійскіх ВНУ і навуковых цэнтраў могуць зарабіць на выніках сваёй дзейнасці. Цікавасць удзельнікаў таксама выклікалі даклады і прэзентацыі, падстаўленыя на секцыях “Праграмы Фонду садзейнічання інавацыям. Падтрымка маладых наватараў і малых інавацыйных прадпрыемстваў” і “Прадстаўленне работ маладых вучоных. Экспертнае меркаванне”. Зборнікі ўсіх дакладаў, якія прагучалі на канферэнцыі, прадстаўлены на сайце мерапрыемства www.minobr-nauka.ru.

На заканчэнне работы канферэнцыі адбылося падвядзенне вынікаў пасяджэння секцый і прыняцце рэзалюцыі на аснове прапаноў, якія паступілі ад удзельнікаў падчас мерапрыемства.

Падрыхтаваў Уладзімір ФАЛАЛЕЕЎ.

Праблемы эканомікі не ў санкцыях

Галоўныя праблемы расійскай эканомікі хаваюцца не ў санкцыях з боку Захаду, а ва ўнутраных прычынах. Пра гэта заявіў Прэзідэнт Расіі Уладзімір Пуцін, звяртаючыся сёння ў Крамлі са штогадовым пасланнем да Федэральнага сходу.

У ліку ўнутраных праблем эканомікі Уладзімір Пуцін назваў дэфіцыт тэхналогій, інвестыцыйных рэсурсаў, прафесійных кадраў, недастатковае развіццё канкурэнцыі, заганы дзелавога клімату. “Калі мы не вырашым базавыя праблемы эканомікі, можам завіснуць на гады, — сказаў Прэзідэнт Расіі. — Трэба дакладна ставіць мэты і паэтапна іх дасягаць”. Гаворачы пра эканамічную сітуацыю ў краіне, Уладзімір Пуцін выказаў надзею, што ў 2016 годзе інфляцыя ў Расіі не падымецца вышэй за 6%. Спад ВУП, паводле яго прагнозу, будзе нязначным, каля 0,2%. Прэзідэнт Расійскай Федэрацыі таксама адзначыў, што ў Расіі намеціўся рост прамысловай вытворчасці. Характарызуючы асноўныя напрамкі знешняй палітыкі Расіі, Уладзімір Пуцін асабліва адзначыў інтэнсіўнае развіццё адносін з усходнімі партнёрамі. “Актыўная ўсходняя палітыка Расіі прадыктавана зусім не нейкімі там кан’юнктурнымі меркаваннямі сённяшняга дня, не ахаладжэннем нават адносін са Злучанымі Штатамі Амерыкі або Еўрасаюза, а доўгатэрміновымі нацыянальнымі інтарэсамі і тэндэнцыямі сусветнага развіцця”, — сказаў Уладзімір Пуцін.

У якасці прыкладу ўзаемавыгаднага супрацоўніцтва Прэзідэнт Расіі прывёў адносіны з Кітаем. Ён падкрэсліў, што яны служаць узорам “адносін светапарадку, пабудаванага не на ідэі дамінавання аднаго боку, якім бы моцным ён ні быў, а на гарманічным уліку інтарэсаў усіх дзяржаў”. Расія таксама разлічвае на якасны прагрэс у адносінах з Японіяй, заявіў прэзідэнт.

“Сур’ёзны інтарэс уяўляе і расійская ідэя фарміравання многаўзроўневай інтэграцыйнай мадэлі ў Еўразіі — вялікага еўразійскага партнёрства. Мы ўжо пачалі яе абмеркаванне на розных міжнародных і рэгіянальных узроўнях. Упэўнены, такая размова магчыма і з дзяржавамі Еўрасаюза, у якіх сёння расце запыт на самастойны, суб’ектны палітычны і эканамічны курс. Мы бачым гэта па выніках выбараў”, — паведаміў Уладзімір Пуцін.

Прэзідэнт Расіі асабліва падкрэсліў, што ў краіне “настроены на добразычлівы, раўнапраўны дыялог, на ўстанаўленне прынцыпаў справядлівасці і ўзаемапавагі ў міжнародных справах, гатовы да сур’ёзнай размовы пра пабудову ўстойлівай сістэмы міжнародных адносін дваццаць першага стагоддзя”. “На жаль, у гэтым плане дзесяцігоддзі, якія мінулі пасля заканчэння “халоднай вайны”, прапалі дарма”, — сказаў Уладзімір Уладзіміравіч.

Ён адзначыў, што Расія выступае “за бяспеку і магчымасць развіцця не для выбраных, а для ўсіх краін і народаў, за павагу да міжнароднага права і разнастайнасці свету”.

У пасланні Прэзідэнт Расіі закрануў пытанні прыярытэтаў развіцця навукі і адукацыі і іх ролі ў пабудове інавацыйнай эканомікі ў краіне. Так, кіраўнік дзяржавы адзначыў, што “ў наступным годзе на базе вядучых ВНУ, у тым ліку рэгіянальных, будуць створаны цэнтры кампетэнцыі. Яны прызначаны забяспечыць інтэлектуальную, кадравую падтрымку праектаў, звязаных з фарміраваннем новых галін і рынкаў. Магутным фактарам набывання навуковых і тэхналагічных задзелаў для эканамічнага росту і сацыяльнага развіцця павінна служыць фундаментальная навука”.

“Неабходна ператварыць даследчыя задзелы ў паспяховыя камерцыйныя прадукты. З гэтым, дарэчы, мы заўсёды мучыліся: ад распрацовак да ўкаранення вельмі вялікі час праходзіць… Але трэба гэтую тэндэнцыю пераламаць, мы можам гэта зрабіць”, — сказаў Уладзімір Пуцін.

Прэзідэнт таксама паведаміў, што для маладых расійскіх вучоных будзе запушчана спецыяльная лінейка грантаў.

Расійскія школы павінны захаваць глыбіню і фундаментальнасць адукацыі, заявіў Уладзімір Пуцін. Школьная адукацыя павінна адпавядаць дзвюм задачам, пра якія гаварыў яшчэ акадэмік Д.Ліхачоў: даваць веды і выхоўваць маральнага чалавека. Прэзідэнт заклікаў ствараць адукацыйныя праекты ў тэатры, кіно, на тэлебачанні, каб прыцягваць моладзь. Школьнікі павінны навучыцца самастойна думаць, ставіць перад сабой мэты і дабівацца іх. Бізнес, універсітэты і бізнес-структуры павінны падключыцца да стварэння адукацыйных тэхнапаркаў у Расіі.

“У хлопцаў і дзяўчат павінна быць дакладнае разуменне: усе яны маюць роўныя магчымасці для старту”, — адзначыў прэзідэнт.

Кіраўнік расійскай дзяржавы таксама рэкамендаваў кіраўнікам суб’ектаў федэрацыі падумаць пра стварэнне на базе ВНУ і школ цэнтраў падтрымкі адораных дзяцей.

Пры гэтым у аснове ўсёй сістэмы адукацыі павінен ляжаць фундаментальны прынцып, што кожнае дзіця адоранае. “Бачу ў маладым пакаленні надзейную апору Расіі”, — падкрэсліў Уладзімір Пуцін.

Завяршаючы выступленне, Прэзідэнт Расіі заявіў, што сёння на першы план выходзіць развіццё. “Будучыня краіны залежыць толькі ад нас, ад працы і таленту ўсіх нашых грамадзян, ад іх адказнасці і іх поспехаў, і мы абавязкова дасягнем мэт, якія стаяць перад намі, вырашым задачы сённяшняга і заўтрашняга дня”, — падагульніў лідар Расійскай Федэрацыі.

Расія: прыёмным дзецям патрабуецца адаптацыя

У апараце ўпаўнаважанага пры прэзідэнце Расійскай Федэрацыі па правах дзіцяці распрацуюць комплекс прапаноў па адаптацыі дзяцей-сірот у школах, паведаміла МІА “Расія сёння” омбудсмен Ганна Кузняцова.

Дабрачынны фонд прафілактыкі сацыяльнага сіроцтва і дабрачынны фонд садзейнічання сямейнаму ўладкаванню дзяцей-сірот “Змяні адно жыццё” накіравалі афіцыйны зварот у апарат упаўнаважанага пры прэзідэнце Расійскай Федэрацыі па правах дзіцяці з просьбай ініцыіраваць абмеркаванне праблемы адаптацыі прыёмных дзяцей у сістэме агульнаадукацыйных устаноў. Мэтай абмеркаванняў з’яўляецца распрацоўка комплексу мер, якія павысяць якасць і ўмовы адукацыі для прыёмных дзяцей, а таксама ўвядзенне дадатковых вучэбных праграм для настаўнікаў, якія працуюць з дзецьмі-сіротамі.

“Мы абавязкова разгледзім гэтую праблему на грамадскім савеце пры ўпаўнаважаным у найбліжэйшы час і выпрацуем комплекс прапаноў па адаптацыі дзяцей-сірот у агульнаадукацыйных установах”, — паведаміла Г.Кузняцова.

Омбудсмен падкрэсліла, што “гэта вельмі важная тэма, таму што сёння назіраецца рост сямейнага ўладкавання дзяцей-сірот, прыёмных сем’яў становіцца больш, разам з тым яны сутыкаюцца з праблемамі”. Са слоў Г.Кузняцовай, адной з такіх праблем з’яўляюцца цяжкасці і неразуменне, з якімі сутыкаецца дзіця ў школе.

“Замест дапамогі яны часам чуюць ад настаўнікаў: “Што вы ад яго хочаце — ён жа з дзіцячага дома! Ён ніколі не засвоіць нашу праграму! Перавядзіце ваша дзіця ў іншую школу!” Вядома, гэта пытанне ўнутранай культуры настаўніка і наогул чалавека, таму што прадузятае стаўленне можа назірацца і з боку бацькоў іншых дзяцей. Наша агульная задача — стварыць камфортнае асяроддзе для прыёмных сем’яў, змяніць адносіны да дзяцей-сірот”, — патлумачыла омбудсмен.

Г.Кузняцова падкрэслівае, што для вырашэння гэтай праблемы патрэбны меры сістэмнага характару: “Не толькі заканадаўчыя змены, але і праграмы павышэння кваліфікацыі педагогаў, фарміраванне асяроддзя для прыняцця дзіцяці такім, якое яно ёсць. У гэтым пытанні сёння назапашаны вялікі вопыт, у тым ліку ў некамерцыйных грамадскіх арганізацыях”. “Сям’я з прыёмнымі дзецьмі становіцца нормай. Але нам трэба глядзець крыху наперад: большасць сірот, пакінутых у федэральным банку даных, — гэта якраз падлеткі, многія з якіх сутыкаліся з жорсткім стаўленнем да сябе ў сям’і, маюць няпросты вопыт жыцця ў сірочых установах. Школы павінны быць гатовымі прыняць такіх дзяцей і дапамагчы ім адаптавацца”, — падагульніла Г.Кузняцова.

Фонд прафілактыкі сацыяльнага сіроцтва і дабрачынны фонд садзейнічання сямейнаму ўладкаванню дзяцей-сірот “Змяні адно жыццё” правялі апытанне сярод 262 прыёмных бацькоў школьнікаў з 54 рэгіёнаў краіны. Паводле вынікаў даследавання, складанасці ў прыёмных дзяцей і іх бацькоў узнікаюць яшчэ ў момант паступлення ў школу (19%). Пры гэтым толькі ў 16% выпадкаў прыёмныя дзеці самастойна спраўляюцца са школьнай праграмай, усім астатнім неабходна дапамога, але пры гэтым у 76% выпадкаў адукацыйная ўстанова сваю дапамогу не прапаноўвае зусім, паведаміла МІА “Расія сёння” ў фондзе прафілактыкі сацыяльнага сіроцтва.

Яшчэ адна праблема — адаптацыя прыёмных дзяцей у іх новых сем’ях.

Адначасова з павелічэннем колькасці ўсыноўленых дзяцей расце і колькасць тых, каго вяртаюць назад у дзіцячыя дамы. Па словах дэпутата Дзярждумы Расійскай Федэрацыі Вольгі Баталінай, за год з прыёмных сем’яў у дзіцячыя дамы вярнуліся 5800 дзяцей. За гэтымі лічбамі стаяць зламаныя лёсы, як правіла, падлеткаў. Ім заўсёды было складана знайсці сям’ю. Доля дзетдомаўцаў, старэйшых за 10 гадоў, набліжаецца да 80% і расце з кожным годам, таму шансы на новую сям’ю ў тых, каго ўзялі і вярнулі, нікчэмныя.

Па словах шматлікіх прыёмных бацькоў, падлеткі чакаюць ад іх “айфонаў, торцікаў і забаў”. Ускосна гэта пацвярджаецца статыстыкай, згодна з якой выпускнікі інтэрнатаў вырастаюць утрыманцамі і ўпэўнены, што ім усе і ўсё павінны.

Сваю ролю замяшчальныя сем’і бачаць у тым, каб навучыць падлеткаў жыць, а не паразітаваць у грамадстве. Для гэтага яны часцяком настойліва выбудоўваюць адносіны, заснаваныя на жорсткасці і падначаленні дзіцяці прыёмным бацькам. Маючы сумны вопыт, яны не давяраюць рэкамендацыям псіхолагаў акружыць прыёмнае дзіця любоўю, лічачы, што “дзеці-сіроты гэтага не зразумеюць, а скарыстаюцца, прыняўшы за слабасць”.

“Прычына вяртання ў дзіцячыя дамы — часта непрафесіянальнае і несвоечасовае аказанне дапамогі сям’і”, — лічыць намеснік дырэктара дэпартамента дзяржпалітыкі ў сферы абароны правоў дзяцей Мінадукацыі і навукі Расійскай Федэрацыі Ірына Раманава. Па яе словах, службы суправаджэння часам толькі намінальна выконваюць свае задачы, а часам даводзяць сітуацыю да вяртання ў дзіцячыя дамы.

Эксперты скардзяцца на тое, што спецыялісты ігнаруюць вучэбныя семінары, якія праводзяцца ведамствам. А ад некампетэнтнасці сацыяльных работнікаў пакутуюць сем’і.

Аднак нават кваліфікаваны спецыяліст праблемы не ўбачыць, наведваючы сям’ю толькі раз у некалькі месяцаў. Закон дапускае частыя праверкі, але толькі калі ў органы апекі паступіць трывожны сігнал. Калі строгае выхаванне ператвараецца і кваліфікуецца як пабоі, дзяцей вернуць у дзіцячы дом. Каб прадухіліць бяду, у Мінадукацыі і навукі плануюць увесці абавязковае суправаджэнне асобных груп прыёмных сем’яў.

Практыка паказвае, што прыёмным бацькам неабходны групы падтрымкі. Клубаў і асацыяцый прыёмных сем’яў становіцца ўсё больш. Цяпер чыноўнікі абмяркоўваюць увядзенне абавязковага для прыёмных бацькоў навучання. Пры гэтым рыхтаваць трэба ўсіх, у тым ліку блізкіх сваякоў і тых, хто ўжо мае вопыт выхавання дзяцей-сірот.

“Мы прапрацуем пытанні, якія будуць развіваць прыёмную сям’ю як прафесіянальную”, — патлумачыла Т.Раманава.

Павышэнне кваліфікацыі дапаможа дарослым вырашаць праблемы з выхаваннем прынятага ў сям’ю дзіцяці, а таксама крытычна падыходзіць да розных парад, якія даюцца з усіх бакоў. Гэта павінна паменшыць колькасць выпадкаў вяртання дзяцей з прыёмных сем’яў.

Што датычыцца прадухілення злачынстваў супраць дзяцей, то гэтую функцыю ўзяў на сябе Следчы камітэт.
Кансультатыўны савет па пытаннях аказання дапамогі дзецям-сіротам і дзецям, якія засталіся без апекі бацькоў, пры Следчым камітэце выступіў з прапановай удасканаліць працэдуру адбору апекуноў і прыёмных бацькоў. Як паведаміў на мінулым пасяджэнні савета кіраўнік СК Аляксандр Бастрыкін, з 2013 года назіраецца значны рост злачынстваў, якія здзяйсняюцца блізкімі сваякамі ў адносінах да дзяцей. Калі ў 2013 годзе ў СК 8 155 дзяцей праходзілі ў якасці пацярпелых, то ў 2015-м — ужо 11 774. Каля 2 тысяч дзяцей пацярпелі ад членаў сям’і. У сувязі з гэтым СК прапаноўвае больш старанна правяраць патэнцыяльных прыёмных бацькоў на наяўнасць судзімасці, фактаў крымінальнага праследавання, псіхічных захворванняў, наркатычную і алкагольную залежнасць, схільнасць да агрэсіі.

Яшчэ адна сур’ёзная тэма, што патрабуе пільнай увагі, — сацыяльныя пенсіі дзецям, якія страцілі або засталіся без апекі бацькоў. Аляксандр Бастрыкін нагадаў, што да гэтага часу без заканадаўчага рашэння застаецца пытанне аб налічэнні сацыяльнай пенсіі дзецям, бацькі якіх невядомы. Праблема ў тым, што такім дзецям няма каму плаціць аліменты, а пенсію па страце кармільца дзяржава ім не налічвае.

За вырашэнне гэтай праблемы ўзяліся і дэпутаты. Спікер Савета Федэрацыі Валянціна Матвіенка ўнесла ў Дзярждуму законапраект, якім прапаноўваецца ўключыць дзяцей, пра бацькоў якіх нічога невядома, у пералік асоб, што маюць права на атрыманне сацыяльнай пенсіі ў выпадку страты кармільца.

Кабмін падтрымаў законапраект пры ўмове яго дапрацоўкі з улікам заўваг. У прыватнасці, ва ўрадзе адзначылі, што неабходна заканадаўча вызначыць статус такіх дзяцей ад часу ўстанаўлення права на сацыяльную пенсію да моманту перадачы іх пад апеку або ўсынаўленне.

“Яднаннем і любоўю выратуемся”

Прэзідэнт Беларусі Аляксандр Лукашэнка адзначае ўклад Патрыярха Маскоўскага і ўсяе Русі Кірыла ва ўмацаванне духоўнага адзінства Беларусі і Расіі. Аб гэтым кіраўнік дзяржавы заявіў 22 лістапада ў храме Хрыста Збавіцеля ў Маскве, выступаючы з віншавальнай прамовай у гонар 70-годдзя патрыярха.

“У Беларусі вы карыстаецеся самым заслужаным аўтарытэтам і народнай любоўю. Вас ведае кожны чалавек: і хрысціянін, і мусульманін, і прадстаўнікі іншых канфесій. Гэта вынік вашай працы і добрага стаўлення да нашай краіны як прадстаяцеля Рускай праваслаўнай царквы, — сказаў Аляксандр Лукашэнка. — Пад вашым першасвяціцельскім кіраўніцтвам Праваслаўная царква садзейнічае ўмацаванню духоўнага адзінства нашых славянскіх народаў — Беларусі і Расіі, заснаванага на такіх хрысціянскіх каштоўнасцях, як міралюбнасць, узаемадапамога, гуманізм і справядлівасць”.

Кіраўнік дзяржавы выказаў удзячнасць патрыярху Кірылу за тую ўвагу, якую ён праяўляе да беларускага народа. “Кожны ваш візіт на беларускую зямлю становіцца значнай падзеяй. Дзе б вы ні праводзілі богаслужэнне — у легендарным Полацку, гераічным Брэсце, старажытным Віцебску ці ў стольным Мінску, усюды вас прымалі як свайго добрага пастара і настаўніка”, — канстатаваў Аляксандр Лукашэнка.

Прэзідэнт адзначыў, што для патрыярха Кірыла Беларусь не новая, паколькі ён да выбрання прадстаяцелем РПЦ служыў на Смаленшчыне і ў Калінінградскім рэгіёне. “Перамяшчаючыся паміж імі — вы аб гэтым заўсёды гаворыце, — вы беларускую зямлю не проста бачылі, вы яе палюбілі. Палюбілі гэты цудоўны славянскі народ. І я ўпэўнены, што ў далейшым ваша праца будзе такой жа добрай і плённай, а Праваслаўная царква будзе ўсяляк садзейнічаць вырашэнню духоўных, маральных і сацыяльных праблем сучаснасці”, — сказаў прэзідэнт.

Паводле слоў прэзідэнта, працай і малітвамі патрыярха Кірыла Руская праваслаўная царква прадаўжае развівацца і ўмацоўвацца ў сваёй велічы, займаючы дастойнае месца ў хрысціянскім свеце. Пры гэтым асаблівая ўвага ўдзяляецца адзінству РПЦ. “Сёння, калі ў свеце войны, рэлігійныя і міжнацыянальныя канфлікты, асаблівым сэнсам напаўняюцца словы прападобнага Сергія Раданежскага: “Яднаннем і любоўю выратуемся”. Дзякуючы вашай актыўнай жыццёвай пазіцыі, царква адыгрывае важную ролю ў падтрыманні згоды ў грамадстве, дружбы і супрацоўніцтва паміж народамі, захаванні міру і стабільнасці на планеце”, — сказаў беларускі лідар.