У аснове супрацоўніцтва з “Ашчадбанкам” — узаемаразуменне і давер

Прэзідэнт Беларусі Аляксандр Лукашэнка і прэзідэнт старшыня праўлення ПАТ “Ашчадбанк” Герман Грэф абмеркавалі на сустрэчы ў Мінску далейшае развіццё супрацоўніцтва ў банкаўскім сектары.

“Нашы банкаўскія справы — тыя пытанні, аб якіх мяне падрабязна інфармаваў Васіль Мацюшэўскі (першы віцэ-прэм’ер Беларусі. — Заўв. БелТА.), да гэтага мы абмяркоўвалі ва ўрадзе — там разуменне знойдзена”, — сказаў кіраўнік дзяржавы.

“Але я хачу сказаць галоўнае: калі Герман Оскаравіч будзе адносіцца, працуючы ў Беларусі, да нашых партнёраў, кліентаў, якія з банкам супрацоўнічаюць, так, як у Расіі да расійскіх, у нас ніколі не будзе пытанняў”, — падкрэсліў Аляксандр Лукашэнка. Паводле слоў прэзідэнта, ён добра інфармаваны аб пазіцыі Германа Грэфа на расійскім полі дзейнасці і чуў у гэтым плане шмат добрага.

У сваю чаргу Герман Грэф падзякаваў асабіста прэзідэнту, а таксама ўраду, Нацыянальнаму банку Беларусі за тое, што ў складаных сітуацыях, якія ўзнікалі ў 2015 і 2016 гадах, была знойдзена канструктыўная падтрымка і выхады. “Гэты год таксама будзе не вельмі просты, але ўжо значна лепшы, чым 2016-ы. А з 2018 года мы разлічваем пачаць ужо нармальную работу тут. Відавочнае ажыўленне і крэдытавання, і нашага партфеля актываў”, — сказаў ён.

Герман Грэф таксама падкрэсліў, што ўсе ўмовы, пастаўленыя раней пры куплі беларускага банка (ААТ “БПБ-Ашчадбанк” уваходзіць у групу “Ашчадбанк”), выкананы. “Мы мінімум у паўтара разу перавыканалі кожны з пяці пунктаў нашых абавязацельстваў. Сёння “Ашчадбанк” — найбуйнейшы інвестар у беларускую эканоміку. Гэта ў тым ліку вынік нашага вельмі добрага ўзаемадзеяння і даверу вам асабіста ў рэспубліцы”, — дадаў старшыня праўлення “Ашчадбанка”.

Адказваючы пасля сустрэчы з Прэзідэнтам Беларусі на пытанні журналістаў, Герман Грэф адзначыў усё большую ўстойлівасць валютнай сістэмы Беларусі да знешніх шокаў.

Паводле слоў Германа Грэфа, складаная сітуацыя ў эканоміцы як Расіі, так і Беларусі была выклікана шокавым уздзеяннем макраэканамічных фактараў, сярод якіх рэзкае зніжэнне цэн на нафту і працэсы, што адбыліся за гэтым.

“Гэты шок у прынцыпе ўжо завершаны. Палітыка Нацыянальнага банка Беларусі па пераводзе рэжыму беларускага рубля ў плаваючую валюту без прывязкі да якой-небудзь якарнай валютнай сістэмы сведчыць аб тым, што такі шок паўтарыцца больш не павінен, нават калі адбудуцца яшчэ нейкія непрадбачаныя сітуацыі”, — заявіў ён.

Герман Грэф таксама адзначыў тэндэнцыю да зніжэння інфляцыі.

“Адпаведна, мы бачым трэнд на зніжэнне ўліковай стаўкі Нацыянальнага банка Беларусі (стаўкі рэфінансавання. — Заўв. БелТА.). Зразумела, што гэта не можа быць зроблена ў ад зін момант, але трэнд да канца года будзе прасочвацца на значнае зніжэнне стаўкі, — лічыць кіраўнік “Ашчадбанка”. — Як вынік, я думаю, што да канца года крэдыты ў нацыянальнай валюце стануць больш даступнымі як для фізічных асоб, так і для юрыдычных”.

“Гэта дасць свой вынік. Пачнуць інвесціравацца тыя праекты, якія раней былі недаступныя для інвестараў з-за высокіх ставак. Значна больш даступным стане прыцягненне іпатэчных пазык. Мы ў “Ашчадбанку” ўпершыню ў канцы мінулага года знізілі стаўкі да 17,5 працэнта і адразу ўбачылі рост попыту на іпатэчныя пазыкі. А калі гэтая стаўка будзе недзе 10 працэнтаў, што рэальна пры спрыяльным збегу макраэканамічных умоў у 2018 годзе, то гэта вельмі значна зменіць макраэканамічнае асяроддзе”, — рэзюмаваў Герман Грэф.

Праблемы трэба вырашаць разам

Надзённыя праблемы і актуальныя пытанні сістэмы адукацыі краіны дэталёва абмяркоўвалі падчас сустрэчы міністра адукацыі Ігара Карпенкі з лепшымі прадстаўнікамі настаўніцтва Магілёўшчыны.

Акрамя міністра адукацыі, удзел у канструктыўным дыялогу прынялі старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Ірына Старавойтава, старшыня Пастаяннай камісіі па навуцы, адукацыі і культуры Палаты прадстаўнікоў Нацыянальнага сходу Ігар Марзалюк, начальнік упраўлення адукацыі Магілёўскага аблвыканкама Уладзімір Рыжкоў.

У пачатку гутаркі міністр расказаў аб асноўных праблемах сістэмы адукацыі, адзначыў перспектывы развіцця сферы. На яго думку, дасканалага разгляду патрабуе сёння работа па стварэнні новых падручнікаў, унясенні змяненняў у Кодэкс аб адукацыі.

Новую рэдакцыю кодэкса плануецца ўнесці ў Палату прадстаўнікоў Нацыянальнага сходу да 1 ліпеня, каб на восеньскай сесіі пачаўся яго разгляд у першым чытанні. Зараз вядзецца актыўная работа па ўнясенні дапаўненняў і змяненняў у галоўны дакумент педагогаў. Па словах Ігара Карпенкі, парламентарыям ужо накіраваны для вывучэння новаўвядзенні, каб загадзя прапрацоўваць іх ва ўзаемадзеянні з міністэрствам. Звяртаючыся да настаўнікаў, міністр заклікаў іх да ўдзелу ў абмеркаванні гэтага важнага заканадаўчага акта.

Што тычыцца распрацоўкі падручнікаў, то новыя вучэбныя дапаможнікі з’явяцца ў агульнаадукацыйных установах да канца 2020 года. Работа па іх падрыхтоўцы таксама інтэнсіўна вядзецца. І вельмі важна, што да гэтай справы ўсебакова прыцягваюцца настаўнікі-практыкі. Яны выступаюць у якасці і аўтараў, і рэцэнзентаў падручнікаў. Справядлівасць конкурснага адбору ў гэтым напрамку будзе знаходзіцца на асаблівым кантролі ў профільным ведамстве.

— Педагагічнай грамадскасці неабходна звярнуць асаблівую ўвагу і на арганізацыю шостага школьнага дня, узмацненне працоўнага выхавання дзяцей. У цэлым суботні дзень праходзіць ва ўстановах адукацыі нядрэнна, у гэтым пераканаўся асабіста. Але элементаў працоўнага навучання ў мерапрыемствах, якія праводзяцца, пакуль недастаткова. Думаю, менавіта педагогі здольны падказаць, якія дапаўненні нам варта ўнесці ў школьную суботу, — сказаў Ігар Карпенка. — Увогуле, у вырашэнні ўсіх практычных пытанняў трэба ісці ад жыцця. Кіраўнікам адукацыйнай галіны варта навучыцца чуць голас настаўнікаў. Менавіта такім чынам мы зможам дасягнуць таго, каб сістэма адукацыі стабільна функцыянавала, развівалася, адпавядала рэаліям часу, выклікам сучаснага грамадства, — адзначыў Ігар Васільевіч.

Міністр мае намер у найбліжэйшы час праехаць па ўсіх рэгіёнах, каб на свае вочы пабачыць, як функцыянуюць не толькі гарадскія, але і сельскія малакамплектныя школы, як праходзіць аптымізацыя, як арганізаваны падвоз навучэнцаў, а таксама з мэтай працягнуць наладжванне двухбаковага дыялогу з настаўніцтвам краіны. Гэтыя словы выклікалі вялікае ажыўленне ў зале. Магілёўскія педагогі звярталіся да міністра з пытаннямі і прапановамі, дзяліліся сваімі меркаваннямі наконт розных аспектаў адукацыйнай дзейнасці. Так, першы народны настаўнік Беларусі выкладчык фізікі абласнога ліцэя № 1 Валерый Барашкоў выказаў занепакоенасць зніжэннем узроўню падрыхтоўкі будучых настаўнікаў.

— Пакуль гэтая работа наладжана не зусім належным чынам. Між тым якаснага навучання немагчыма дасягнуць без прафесійных педагогаў, — падкрэсліў Валерый Васільевіч.

Народны настаўнік акцэнтаваў увагу і на тым, што рэзкія рэформы ў сферы адукацыі непрымальныя. На нейкія змены трэба ісці свядома, добра прадумаўшы, якія рэакцыі яны выклікаюць. Выступіў Валерый Барашкоў і з прапановай: Міністэрству адукацыі штогод рабіць дэталёвы маніторынг работы навучальных устаноў у рэгіёнах.— Выразная статыстыка і аналітыка функцыянавання рэгіянальных устаноў адукацыі сапраўды стане той асновай, на якой мы будзем удасканальваць нашу работу, прымаць правільныя кіраўніцкія рашэнні, — падтрымаў прапанову Ігар Карпенка.

Агучыў Ігар Васільевіч таксама ідэю стварэння грамадскага савета пры міністры. Першы, каго ён бы хацеў там бачыць, — народны настаўнік Валерый Барашкоў.

— У склад такога савета варта ўключыць таксама шэраг іншых педагогаў-практыкаў, а магчыма, і бацькоў, і лепшых вучняў. Ведаючы меркаванні ўсіх зацікаўленых бакоў на розныя праблемы, атрымаецца знаходзіць найбольш эфектыўныя шляхі павышэнныя якасці адукацыі, — падкрэсліў кіраўнік адукацыйнага ведамства.
У ходзе дыялогу неаднаразова ўзнімалася праблема масавасці вышэйшай адукацыі. Рэйтынг прэстыжнасці рабочых прафесій нізкі, моладзь павальна нацэлена на навучанне ва ўстановах вышэйшай адукацыі, а эканоміцы сёння патрэбны рабочыя кадры. Каб змяніць сітуацыю, установам ССА і ПТА трэба больш чуйна рэагаваць на змены на рынку працы, знаходзіць дзейсныя формы прафарыентацыі. Варта наладзіць алгарытм работы і з заказчыкамі кадраў. Яны павінны несці адказнасць за працаўладкаванне падрыхтаваных рабочых і спецыялістаў.

Прысутныя на сустрэчы разважалі і аб патрэбнасці выканання настаўнікамі неўласцівых ім абавязкаў, дзейнасці педагагічных класаў, прафесійным развіцці выкладчыкаў. Пэўны рэзананс у зале выклікала пытанне аб неабходнасці падліку сярэдняга бала школьных атэстатаў. Меркаванні гучалі розныя. Была закранута агульная аб’ектыўнасць выстаўлення адзнак, прапаноўвалася ўвесці адказнасць настаўнікаў за завышаныя балы, калі выпускнік не пацвярджае іх на ЦТ. Адзінай высновы так і не прагучала, але адназначна, што гэтая вострая тэма яшчэ будзе разгледжана.

Пасля заканчэння карыснай размовы Ігар Васільевіч арыентаваў настаўніцтва на далейшую работу адзінай камандай. Пастаўленыя перад сістэмай адукацыі задачы будуць цалкам выкананы толькі тады, калі працаваць над іх рэалізацыяй разам.

Ганна СІНЬКЕВІЧ.
Фота аўтара.

На шляху да больш цеснага супрацоўніцтва

У чацвер адбылася сустрэча міністра адукацыі Ігара Карпенкі з паслом Германіі Петэрам Дэтмарам. Мерапрыемства прайшло па ініцыятыве нямецкага боку ў Міністэрстве адукацыі нашай краіны.

Размова пачалася са слоў спачування міністра адукацыі з нагоды трагедыі, якая нядаўна здарылася ў Берліне на калядным кірмашы. У адказ пасол Германіі падзякаваў і адзначыў, што супрацьстаяць тэрарызму можна толькі ў кансалідацыі. “Грамадства павінна быць моцным і згуртаваным”, — заўважыў Петэр Дэтмар.

Што тычыцца супрацоўніцтва ў сферы адукацыі, то паміж Беларуссю і Германіяй склаліся трывалыя сувязі, якія развіваюцца на розных узроўнях, асабліва актыўна паміж установамі адукацыі. Як заўважыў Ігар Карпенка, сёння паміж установамі агульнай сярэдняй адукацыі краін заключана каля 90 сумесных дагавораў.

“Увесь час адбываецца адукацыйны абмен, працуюць шматлікія праграмы, асабліва па падтрымцы вывучэння нямецкай мовы. Толькі ў вышэйшых навучальных установах каля 22 000 студэнтаў вывучаюць нямецкую мову, 6000 — як другую замежную мову. Акрамя таго, Германія — тая краіна, якая развівае і прасоўвае Балонскі працэс. У нас вучыцца шмат маладых людзей, якія ў будучыні будуць развіваць адносіны паміж нашымі краінамі”, — адзначыў Ігар Васільевіч.

Петэр Дэтмар запэўніў міністра ў тым, што наладжанае эфектыўнае супрацоўніцтва будзе працягвацца, і выказаў падзяку Міністэрству адукацыі за цеснае кантактаванне і рэалізацыю праекта па ўступленні Беларусі ў Балонскі працэс. Пасол таксама адзначыў, што Германія і далей будзе падтрымліваць нашу краіну ў поўным уступленні ў агульную еўрапейскую адукацыйную прастору. Акрамя таго, Петэр Дэтмар задаволены актыўным вывучэннем нямецкай мовы беларускімі школьнікамі і выказаў спадзяванне на працяг такой практыкі.

“Канечне, нямецкая мова не можа канкурыраваць з англійскай, але веданне нямецкай мовы будзе толькі спрыяць палепшэнню сацыяльных, эканамічных зносін. Акрамя таго, валоданне замежнымі мовамі дае магчымасць развівацца і ўключацца ў сусветную прастору”, — сказаў пасол Германіі.

Выгоды міжнароднага супрацоўніцтва адчулі беларускія ўніверсітэты, якія рэалізоўваюць сумесныя адукацыйныя праекты. Актыўнымі ў гэтым кірунку з’яўляюцца ВНУ Гомеля, Магілёва, Беларускі дзяржаўны ўніверсітэт. Па словах нямецкага пасла, акадэмічнае супрацоўніцтва будзе працягвацца і ўзмацняцца. Ён прапанаваў спыніцца на зместавым напаўненні ўніверсітэцкага ўзаемадзеяння, бо існуе многа перспектыў у развіцці сумесных навуковых праектаў.

“У рэалізацыі паспяховага супрацоўніцтва вельмі добра зарэкамендаваў сябе падыход “знізу ўверх”, калі адносіны спачатку наладжваюцца не на ўзроўні ўніверсітэтаў, а паміж кафедрамі, факультэтамі. А затым, калі ўсталюецца структурнае супрацоўніцтва, універсітэты пачнуць працаваць на аснове дагавораў. Нам шмат чаго трэба будзе зрабіць, але мы з вамі стаім на правільным шляху развіцця для больш цеснага ўзаемадзяння”, — адзначыў пасол Германіі.

“Замежная мова будзе запатрабавана тады, калі будзе створаны трывалы падмурак для эканамічнага супрацоўніцтва паміж краінамі. І тое, што нашы адукацыйныя праекты развіваюцца ў тым ліку і ў межах гандлёва-эканамічнага супрацоўніцтва, гаворыць пра многае. Думаю, што ў рамках вывучэння нямецкай мовы было б карысна, каб мы, напрыклад, абменьваліся інфармацыяй пра развіццё ІТ, сучасных тэхналогій прамысловай вытворчасці. Трэба шукаць новыя падыходы, трэба падумаць пра іх кірункі і зместавае напаўненне”, — адказаў міністр адукацыі Ігар Карпенка.

Акрамя таго, ён прапанаваў аднавіць супрацоўніцтва ў рэалізацыі праектаў па развіцці сацыяльна-педагагічнай службы ў навучальнай установе. Вопыт нямецкіх калег па рабоце педагогаў-псіхолагаў, сацыяльных педагогаў быў бы для нас карысным.

“Для нас актуальнай з’яўляецца арганізацыя работы з дзецьмі-аўтыстамі. Нам не хапае навуковай і метадычнай базы, а спецыялісты патрабуюцца, таму было б цікава пазнаёміцца з праграмай падрыхтоўкі такіх спецыялістаў і практычным вопытам дыпламаваных спецыялістаў. Нам у Беларусі трэба ствараць сваю школу па гэтай тэме, каб развівацца і эфектыўна ўзаемадзейнічаць з соцыумам”, — адзначыў міністр.

Ігар Карпенка таксама прапанаваў выкарыстоўваць патэнцыял нашых універсітэтаў для вывучэння нямецкай моладдзю рускай і беларускай моў. Петэр Дэтмар падтрымаў гэтую ідэю. Хаця, магчыма, прапанаваць свае паслугі айчынныя ВНУ змогуць і самі. Плануецца, што ў канцы студзеня 2017 года дэлегацыя беларускіх рэктараў наведае ўніверсітэты Германіі.

Напрыканцы сустрэчы міністр адукацыі Ігар Карпенка павіншаваў пасла Германіі Петэра Дэтмара з надыходзячымі Калядамі і Новым годам і пажадаў спакою і дабрабыту яго сям’і і ўсяму нямецкаму народу.

Вольга ДУБОЎСКАЯ.
Фота Алега ІГНАТОВІЧА.

Шукаць рэзервы для нарошчвання аб’ёмаў узаемнага гандлю

Беларусь і Іркуцкая вобласць Расіі павінны знайсці рэзервы для нарошчвання аб’ёмаў узаемнага гандлю. Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Іркуцкай вобласці Сяргеем Леўчанкам.

“У 2015 годзе нам удалося дасягнуць максімальных за апошнюю пяцігодку паказчыкаў тавараабароту, якія склалі $115 млн. Аднак у гэтым годзе адбылося значнае зніжэнне, як і паміж Расіяй і Беларуссю. Каб выправіць сітуацыю, нам, вядома, неабходна шукаць рэзервы для нарошчвання аб’ёмаў узаемнага гандлю. Эканоміка — гэта аснова любых адносін, таму, хочаш — не хочаш, давядзецца знайсці гэтыя рэзервы. А яны ёсць”, — сказаў Аляксандр Лукашэнка.

Для паспяховай рэалізацыі пастаўленых перад Іркуцкай вобласцю задач прапаноўваецца больш актыўна выкарыстоўваць беларускія тавары і тэхналогіі.

“Лічу, што ёсць добрыя перспектывы для супрацоўніцтва па пастаўках вам кар’ернай, грузавой і іншай спецыяльнай тэхнікі, а таксама пагрузчыкаў для радовішчаў вугалю і іншых радовішчаў, — адзначыў кіраўнік дзяржавы. — Акрамя таго, мы гатовы пастаўляць вам сельскагаспадарчую, пасажырскую, дарожна-будаўнічую тэхніку, развіваць вытворчую кааперацыю, у тым ліку з прадпрыемствамі абаронна-прамысловага комплексу. Мы гатовы ствараць сумесныя прадпрыемствы на тэрыторыі вобласці і ісці тым шляхам, які пракладзены намі ўжо ў іншых рэгіёнах Расіі”.

Аляксандр Лукашэнка лічыць, што Беларусь і Іркуцкая вобласць таксама павінны папрацаваць над пошукам узаемавыгадных сумесных праектаў у сельскай гаспадарцы.

Нягледзячы на значную аддаленасць Іркуцкай вобласці, заўважыў кіраўнік дзяржавы, ёсць перспектывы супрацоўніцтва і ў будаўніцтве. “У вас вельмі амбіцыйныя задачы: вы плануеце будаваць жылля да 1,5 млн кв.м у год. Вопыт у Беларусі ёсць. У свой час мы былі паказальным будаўнічым комплексам. Мы гэта не разгубілі, — звярнуў увагу Аляксандр Лукашэнка. — Перавага наша ў тым, што мы гатовы будаваць аб’екты пад ключ: ад праектавання да ўстаноўкі ўваходных дзвярэй”.

У сваю чаргу губернатар Іркуцкай вобласці Сяргей Леўчанка адзначыў, што Іркуцкая вобласць Расіі зацікаўлена супрацоўнічаць з Беларуссю ў сельскай гаспадарцы, прамысловасці і лесаперапрацоўцы.

“Паглядзеўшы на вашы прадпрыемствы і вынікі, мы хацелі б з вашым урадам, Міністэрствам сельскай гаспадаркі і харчавання завесці больш канкрэтныя адносіны для таго, каб разам зрабіць некалькі праграм па тых відах прадукцыі, якіх нам пакуль не хапае ў рэгіёне”, — сказаў Сяргей Леўчанка.

Яшчэ адным напрамкам супрацоўніцтва можа стаць партнёрства ў прамысловай сферы. “Мы ў гэтым годзе паспелі ўжо дастаткова сур’ёзна пераарыентавацца на вашу тэхніку, якая канкурэнтаздольная не толькі з пункту гледжання якасці і прадукцыйнасці, але і цэн. У гэтым годзе больш як на 200% павялічваем пастаўкі з МАЗа ў Іркуцкую вобласць”, — звярнуў увагу губернатар.

У Іркуцкай вобласці размешчана самая вялікая ў Расіі лесасека. “Таму разам з міністрам ляснога комплексу мы да вас прыбылі, каб паглядзець сумесныя праекты па перапрацоўцы і здабычы лесу”, — сказаў Сяргей Леўчанка.

Іркуцкая вобласць плануе наладзіць супрацоўніцтва з Беларуссю і ў сферы здабычы прэснай вады. “У нас знаходзіцца возера Байкал — гэта 80% усёй прэснай вады ў Расіі. Мы сур’ёзна займаемся і інфраструктурай, і пытаннямі ачысткі, водаадвядзення і водазабеспячэння. У вас нядрэнны вопыт, добрыя азёры і тэхніка”, — дадаў губернатар.

Палітычная стабільнасць — важны фактар добрасуседства

Славакія праяўляе інтарэс да цеснага супрацоўніцтва з Беларуссю як мінімум па пяці эканамічных напрамках. Аб канкрэтных вектарах развіцця ўсебаковага беларуска-славацкага ўзаемадзеяння размова ішла на сустрэчы Прэзідэнта Беларусі Аляксандра Лукашэнкі са старшынёй урада Славакіі Робертам Фіца.

У час перагавораў вялікая ўвага была ўдзелена перспектывам двухбаковых кантактаў у гандлёва-эканамічнай сферы. Кіраўнік дзяржавы падтрымаў прапановы славацкага боку па сумесных праектах у фармацэўтыцы, атамнай энергетыцы, вытворчасці шын, дрэваапрацоўцы, газавай сферы, а таксама ў абароннай прамысловасці. Прычым беларускі бок гатовы ў самыя кароткія тэрміны пачаць дэталёвае абмеркаванне гэтых праектаў.

У Славакіі ў сваю чаргу будуць рады беларускім бізнесменам, адзначыў Роберт Фіца.

Славацкі госць расказаў аб гістарычных аспектах развіцця Славакіі, аб няпростых момантах “разводу” з Чэхіяй. Цяпер, паводле слоў старшыні ўрада Славакіі, краіна дынамічна развіваецца, пераадольваючы многія праблемы, у тым ліку негатыўныя наступствы неабдуманай прыватызацыі. Цяперашні ўрад прыкладае неабходныя намаганні, каб вярнуць кантроль дзяржавы над стратэгічна важнымі аб’ектамі. Многія былі распрададзены яшчэ ў 90-я гады, але не па рыначным кошце, а істотна ніжэйшым, і фірмам, якія не былі зацікаўлены інвесціраваць у развіццё гэтых важных прадпрыемстваў і кампаній.

Роберт Фіца сказаў шмат добрых слоў пра Беларусь, якая вызначаецца стабільным і дынамічным развіццём, узважанасцю пры прыняцці рашэнняў, у тым ліку якія тычацца прыватызацыі. Акрамя таго, палітычная стабільнасць у Беларусі з’яўляецца важным фактарам добрасуседства.

Беларусь мае вельмі канструктыўную пазіцыю адносна ініцыятывы “Усходняе партнёрства”, лічыць старшыня ўрада Славакіі, таму важна ведаць меркаванне беларускага боку па развіцці ініцыятывы.

Разам з тым ён параіў больш папулярызаваць Беларусь, яе поспехі і выдатныя мясціны, каб у Еўропе больш ведалі менавіта пра беларускія дасягненні.

Праведзеная сустрэча Аляксандра Лукашэнкі і Роберта Фіца — гэта своеасаблівыя вялікія інвестыцыі ў развіццё беларуска-славацкіх адносін, якія, па ўзаемным меркаванні, маюць добрыя перспектывы.

Да Парыжа ўжо рукой падаць

Днямі Міністэрства адукацыі нашай краіны наведаў Надзвычайны і Паўнамоцны Пасол Французскай Рэспублікі ў Рэспубліцы Беларусь Дзідзье Канес, які сустрэўся з міністрам адукацыі М.А.Жураўковым. На сустрэчы прысутнічалі прадстаўнікі дэпартамента французскай мовы і адукацыі Міністэрства замежных спраў і міжнароднага развіцця Французскай Рэспублікі, франка-беларускага цэнтра еўрапейскіх даследаванняў. Міністэрства адукацыі нашай краіны прадстаўлялі супрацоўнікі ўпраўленняў міжнароднага супрацоўніцтва, агульнай сярэдняй адукацыі, вышэйшай адукацыі.

М.А.Жураўкоў у пачатку сустрэчы павіншаваў Дзідзье Канеса з прызначэннем на дыпламатычную пасаду ў якасці пасла Францыі ў Беларусі.

— Мы вельмі рады вас бачыць у нашым міністэрстве і спадзяёмся, што ваш візіт стане працягам шматгадовага і эфектыўнага супрацоўніцтва паміж нашымі краінамі, асабліва ў галіне адукацыі і культуры, — падкрэсліў Міхаіл Анатольевіч. — У нас з пасольствам Францыі заўсёды былі вельмі добрыя сяброўскія і дзелавыя стасункі, якія прынеслі плён абедзвюм краінам і нашым народам.

Міністр адукацыі нагадаў, што наша супрацоўніцтва ў сферы адукацыі з Францыяй ажыццяўляецца на аснове прамых дагавораў і дамоўленасцей паміж установамі адукацыі, навуковымі арганізацыямі дзвюх краін.

Так, у прыватнасці, установы вышэйшай адукацыі Беларусі сёння маюць звыш 25 прамых дагавораў аб супрацоўніцтве з вышэйшымі навучальнымі ўстановамі Францыі. Найбольш актыўна працуюць у гэтым напрамку БДУ, БДУІР, БДТУ, БДЭУ, шэраг рэгіянальных універсітэтаў.

Згодна з дамоўленасцямі, рэалізуюцца навукова-даследчыя праекты, праводзіцца абмен выкладчыкамі і навуковымі супрацоўнікамі, аспірантамі і студэнтамі.

— У нас склаліся вельмі цёплыя адносіны з выкладчыцкім складам універсітэтаў, са студэнцкай супольнасцю Францыі, і наша супрацоўніцтва па абмене студэнтамі і выкладчыкамі працягваецца ўжо шмат гадоў, — адзначыў Міхаіл Анатольевіч. — Вось і на нядаўняй міжнароднай канферэнцыі па ІТ-сферы, якая праходзіла ў БДУ, я сустракаўся са сваімі калегамі-прафесарамі з Францыі. На маю кафедру ў БДУ таксама штогод прыязджалі студэнты з Францыі, якія праходзілі стажыроўку на працягу месяца. У сваю чаргу нашы студэнты, выкладчыкі, навуковыя супрацоўнікі праходзяць стажыроўку, павышэнне кваліфікацыі ў навуковых цэнтрах і ва ўніверсітэтах Францыі. Хачу згадаць цэнтр ядзерных даследаванняў як найбольш яскравы прыклад таго, як нашы студэнты і выкладчыкі праходзяць курсавую падрыхтоўку і займаюцца даследчай дзейнасцю па ядзернай энергетыцы. Я таксама прымаю ў гэтым удзел. Дарэчы, мая былая аспірантка цяпер узначальвае адзін з дэпартаментаў у навуковым цэнтры горада Тулузы.

М.А.Жураўкоў адзначыў і кантакты паміж краінамі ў сферы школьнай адукацыі, непасрэдна паміж навучальнымі ўстановамі, педагогамі і школьнікамі. У мінулым навучальным годзе французскую мову як вучэбны прадмет вывучалі больш за 22 тысячы школьнікаў. На факультатыўных занятках яе сёння вывучаюць 654 вучні. У Беларусі ёсць некалькі вядомых гімназій, якія маюць добрую гісторыю вывучэння французскай мовы, і для многіх выпускнікоў гэта становіцца прафесіяй. Аднак у апошнія гады адзначаецца зніжэнне колькасці школьнікаў, якія выбралі для вывучэння гэтую мову. Па словах міністра адукацыі, трэба адрадзіць інтарэс нашых дзяцей да французскай мовы. Лепшым пасылам для гэтага павінна стаць станоўчая дынаміка ў культурных і адукацыйных адносінах дзвюх краін. Гэта дазволіла б больш эфектыўна развіваць супрацоўніцтва ў сферы агульнай сярэдняй адукацыі, ажыццяўляць абмен школьнікамі. Такое, як кажуць, жывое знаёмства нашых вучняў з гісторыяй, культурай, адукацыяй Францыі стала б своеасаблівай прафесійнай арыентацыяй на вывучэнне французскай мовы.

Міхаіл Жураўкоў паведаміў, што ў наступным навучальным годзе плануецца правесці эксперымент у некалькіх школах, дзе ў профільных філалагічных класах будуць вывучацца дзве замежныя мовы, у тым ліку і французская. Прыцягваць да вывучэння замежнай мовы, а таксама французскай, трэба з дашкольнага ўзросту, заявіў міністр. З гэтай мэтай трэба адкрываць гурткі, дзе ўрокі французскай мовы могуць весці студэнты МДЛУ. Міхаіл Жураўкоў адзначыў, што трэба пашыраць інфармацыйнае поле паміж краінамі, у тым ліку ў сферы адукацыі і культуры, распрацоўваць сумесныя праекты, праводзіць семінары і канферэнцыі, каб станавіцца бліжэй адзін да аднаго. Сумесная праца, як нішто іншае, аб’ядноўвае людзей і стымулюе да вывучэння мовы, адзначыў міністр.

Пасол Дзідзье Канес расказаў, што за час сваёй дзейнасці пасольства Францыі арганізавала шмат разнастайных мерапрыемстваў, якія спрыяюць умацаванню супрацоўніцтва паміж Беларуссю і Францыяй і павышэнню матывацыі вывучэння французскай мовы ў Беларусі. Пасол нагадаў, што доўгі час пасольства Францыі сумесна з Міністэрствам адукацыі рэалізуе праект “Двухмоўная франкафонная адукацыя”, які распаўсюдзіўся на многія рэгіёны нашай краіны. Выкладанне французскай мовы ў школах ажыццяўляецца беларускімі настаўнікамі, якія прайшлі стажыроўку ў міжнародных адукацыйных цэнтрах за кошт сродкаў французскага боку. У рамках рэалізацыі праекта кабінеты французскай мовы аснашчаны сучаснай лінгафоннай тэхнікай, маюць наглядныя дапаможнікі, вучэбную і метадычную літаратуру, слоўнікі, карты, якія паступаюць з Францыі. З мінулага года паміж краінамі дзейнічае пагадненне аб адкрыцці і функцыянаванні двухмоўных франкафонных секцый. Навучанне ў такіх секцыях прадугледжвае вывучэнне французскай мовы на павышаным узроўні і нямоўных дысцыплін на французскай мове (DNL) па праграмах факультатыўных заняткаў, а таксама пры дапамозе арганiзацыi на французскай мове пазакласнай і пазашкольнай работы. Такі праект спрыяе павелічэнню колькасці навучэнцаў, якія вывучаюць французскую мову, станоўча ўплывае на развіццё культурных і эканамічных адносін паміж краінамі, павышае зацікаўленасць у вывучэнні мовы. Мяркуецца пры пасольстве ў Мінску адкрыць інфармацыйнае бюро, каб расказаць пра Францыю і магчымасці навучання ва ўніверсітэтах.

Міністэрства адукацыі зацікаўлена ў пашырэнні практыкі арганізацыі стажыровак у Францыі настаўнікаў і выкладчыкаў французскай мовы, якія працуюць ва ўстановах адукацыi нашай краіны, правядзенні ў нас вучэбных семінараў па новых тэхналогіях навучання замежным мовам, а таксама ва ўдзеле французскага боку ў правядзенні летніх лінгвістычных лагераў для навучэнцаў беларускіх устаноў агульнай сярэдняй адукацыі, якія вывучаюць французскую мову. Пасол падтрымаў намеры Міністэрства адукацыі і запэўніў, што пасольства Францыі ў Беларусі будзе гэтаму актыўна садзейнічаць.

Ала КЛЮЙКО.
Фота аўтара.

Дапаўняць адно аднаго і думаць аб эфектыўнай кааперацыі

Беларусь і Расія з развалам СССР страцілі сістэму, падобнай да якой не было ў свеце. Аб гэтым Прэзідэнт Беларусі Аляксандр Лукашэнка заявіў на сустрэчы са старшынёй фракцыі Камуністычнай партыі Расійскай Федэрацыі ў Дзяржаўнай Думе Генадзем Зюганавым.

“Мы страцілі краіну, але самае страшнае, што мы страцілі сістэму, якую стваралі дзесяцігоддзямі і падобнай да якой не было ў свеце, якую трэба было адшліфаваць, дапрацаваць — і мы былі б зусім іншай дзяржавай нават пры развале Савецкага Саюза, — сказаў Аляксандр Лукашэнка. — І сёння рэшткі гэтай сістэмы, якую трэба было б, відаць, захаваць, мы пачынаем дабіваць, асабліва ў эканоміцы, у сацыяльна-эканамічным развіцці”.

Кіраўнік дзяржавы таксама адзначыў, што некаторыя праблемныя моманты застаюцца ва ўзаемаадносінах Беларусі і Расіі. “Хоць мы і рушылі наперад далей за ўсіх у нашых адносінах, ёсць нюансы, якія насцярожваюць нас, кіраўніцтва краіны, і вельмі крыўдзяць людзей”, — звярнуў увагу прэзідэнт.

Генадзь Зюганаў згадзіўся з меркаваннем Прэзідэнта Беларусі адносна распаду СССР. “Мы былі б ужо наперадзе планеты ўсёй. А цяпер дажылі да таго, што нас ледзь не спрабуюць выставіць з Алімпійскіх гульняў”, — дадаў лідар КПРФ.

Генадзь Зюганаў таксама адзначыў, што, “калі б мы дапаўнялі адно аднаго і адначасова менш таргаваліся вакол цаны то на нафту, то на газ, то на мяса, то на малако, а думалі аб эфектыўнай кааперацыі, мы былі б канкурэнтныя з кім хочаце, прычым наша прадукцыя была б не горшая і на трэць таннейшая за еўрапейскую, і мы не аддалі б свае рынкі нікому”.

Лідар КПРФ адзначыў, што Беларусь мае цудоўны машынабудаўнічы комплекс, а таксама ўдзяляе шмат увагі развіццю сельскай гаспадаркі. “Я быў на ўсіх вашых вялікіх прадпрыемствах. Ваш МАЗ стандарту Еўра-6 падобны на касмічны карабель, адна з лепшых машын. Вашы трэйлеры, якія возяць нашы “Таполі”, мы сёння ўжо не зробім, а вы дапамагаеце нам умацаваць абарону. Мы разам вырашаем гэтыя задачы”, — сказаў ён.

Генадзь Зюганаў паабяцаў, што яго партыя зробіць усё для ўпэўненага развіцця Саюзнай дзяржавы.

“Для мяне ёсць некалькі найвышэйшых каштоўнасцей у жыцці: перш за ўсё, гэта справядлівасць, дружба народаў, гуманізм і пачуццё любові да Радзімы. Я лічу, што беларуская зямля з’яўляецца захавальніцай лепшых гэтых якасцей”, — сказаў Генадзь Зюганаў.

Старшыня КПРФ таксама дадаў, што наведаў Музей гісторыі Вялікай Айчыннай вайны. Паводле яго слоў, там можна адчуць, што такое сапраўдны гераізм, патрыятызм і дружба народаў.

Генадзь Зюганаў адзначыў, што заўсёды прыязджае ў Беларусь як на другую радзіму. “Я цяпер праехаў па горадзе і павінен сказаць, што Мінск выглядае цудоўна: чыста, утульна, радасна, светла. Ён развіваецца, як самы сучасны не толькі еўрапейскі, але і сусветны цэнтр культуры і сапраўднага дабрабыту. Вы многае зрабілі для таго, каб пазбавіцца надакучлівай рэкламы і адначасова захаваць мастацка-архітэктурнае аблічча горада і яго маральна-этычныя асновы”, — звярнуў увагу старшыня Камуністычнай партыі Расіі.

Прэзідэнт Беларусі Аляксандр Лукашэнка ўручыў старшыні фракцыі Камуністычнай партыі Расійскай Федэрацыі ў Дзяржаўнай Думе Генадзю Зюганаву ордэн Дружбы народаў.

“Столькі, колькі робіце вы ў Расіі, і гэта не для ліслівасці сказана, ніхто не рабіў і не робіць, — звярнуўся Аляксандр Лукашэнка да лідара КПРФ. — Мы ўзнагародзілі вас не да выбараў, а даўно. Проста ў нас не было выпадку, каб я асабіста вам уручыў гэтую ўзнагароду”.

Прэзідэнт Беларусі адзначыў, што Камуністычная партыя — самая блізкая да народа. “Я вельмі рад, што кіраўніцтва Расіі нарэшце зразумела, што Кампартыя — гэта партыя не развалу, не процістаяння, не рэвалюцыі і вайны, а што яна нацэлена на стварэнне”, — звярнуў увагу кіраўнік дзяржавы.

Генадзь Зюганаў удастоены ўзнагароды за значны асабісты ўклад ва ўмацаванне дружалюбных адносін і супрацоўніцтва паміж Беларуссю і Расіяй, станаўленне Саюзнай дзяржавы, развіццё эканамічных, навукова-тэхнічных і культурных сувязей.

Паедуць у Кыргызстан ушанаваць героя

Міністр адукацыі нашай краіны М.А.Жураўкоў правёў сустрэчу з Надзвычайным і Паўнамоцным Паслом Кыргызскай Рэспублікі ў Рэспубліцы Беларусь Кубанычбекам Амураліевым.

Міхаіл Анатольевіч Жураўкоў на пачатку сустрэчы заўважыў, што супрацоўніцтва паміж Кыргызстанам і Беларуссю мае адну агульную гісторыю, якая пачынаецца з савецкіх часоў. Да сённяшняга часу гэтыя сувязі паміж краінамі ні разу не перапыніліся, а, наадварот, набіраюць моц. Пры ўсім гэтым адносна іншых краін — нашых усходніх партнёраў — Кыргызская Рэспубліка пакуль недастаткова выкарыстоўвае магчымасці адукацыйнай галіны Беларусі для навучання сваёй моладзі. Таму хацелася б, каб і дыпламатычны корпус Кыргызстана паспрыяў развіццю зносін паміж краінамі больш імклівымі тэмпамі.

— Мы зацікаўлены ў больш цесным супрацоўніцтве паміж нашымі краінамі, у тым ліку ў адукацыі, культуры, навуцы, — заявіў М.А.Жураўкоў. — З нашага боку мы маем не толькі жаданне ўмацоўваць сувязі, але і ствараем усе ўмовы для таго, каб у нашых навучальных установах вучыліся кыргызскія студэнты.

Сёння ўзаемадзеянне ў галіне адукацыі паміж краінамі забяспечвае шэраг пагадненняў, у тым ліку аб паглыбленні інтэграцыі ў эканамічнай і гуманітарнай галінах, аб узаемным прызнанні і эквівалентнасці дакументаў аб адукацыі, вучоных ступенях і званнях, аб супрацоўніцтве ў галіне атэстацыі навуковых і навукова-педагагічных кадраў, аб супрацоўніцтве ў галіне адукацыі і навукі. У мэтах развіцця прамых кантактаў паміж установамі адукацыі дзвюх краін беларускімі ўніверсітэтамі заключаны пагадненні з шэрагам універсітэтаў Кыргызстана. У адпаведнасці з дамоўленасцю аб супрацоўніцтве БДУ з Бішкекскім гуманітарным універсітэтам імя К.Карасаева створаны Беларуска-Кыргызскі вучэбна-адукацыйны цэнтр навучання кыргызскіх і кітайскіх грамадзян рускай мове і падрыхтоўкі іх да атрымання адукацыі ва ўстановах вышэйшай і сярэдняй спецыяльнай адукацыі Рэспублікі Беларусь.

У мінулым навучальным годзе ва ўстановах адукацыі Беларусі вучылася 45 грамадзян Кыргызстана, з іх 37 атрымоўваюць вышэйшую адукацыю на платнай аснове. У новым навучальным годзе 1 грамадзянін Кыргызскай Рэспублікі будзе прыняты ў БНТУ для навучання па адукацыйнай праграме дактарантуры.

Міхаіл Анатольевіч Жураўкоў паведаміў паслу Кыргызстана, што ў беларускіх універсітэтах рыхтуюць па спецыяльнасцях самых розных профіляў. Па кожным з іх створана сучасная вучэбная база, змест навучання адпавядае патрабаванням заказчыкаў кадраў, адукацыя носіць практыка-арыентаваны характар. УВА Беларусі наладзілі цесныя кантакты з прадпрыемствамі і арганізацыямі, дзе студэнты могуць праходзіць практыку, на іх базе арганізаваны кафедры. Акрамя таго, пабудавана сучасная студэнцкая вёска з добрымі ўмовамі для быту і адпачынку студэнтаў.

Міністр адукацыі нашай краіны адзначыў, што цяпер у адукацыйнай галіне Беларусі вядзецца развіццё сістэмы двайных дыпломаў, навучанне для замежных студэнтаў арганізавана на англійскай мове.

— Як бачна, — заўважыў Міхаіл Анатольевіч, — у нашай краіне створаны ўсе ўмовы для якаснага навучання і паўнацэннага адпачынку студэнцкай моладзі, у тым ліку і з вашай краіны, якую мы чакаем да нас на вучобу.

Магчыма, было б дарэчы больш актыўна арганізоўваць прамыя кантакты паміж кантрэтнымі ўніверсітэтамі, стажыроўкі прафесарска-выкладчыцкага складу, абмен студэнтамі, рэалізоўваць сумесныя адукацыйныя і навуковыя праекты.

Міністр прапанаваў арганізаваць сустрэчу рэктараў ВНУ Кыргызстана для азнаямлення з вядучымі ўніверсітэтамі Беларусі. Міхаіл Анатольевіч прапанаваў таксама больш актыўна арганізоўваць абмен школьнікамі дзвюх краін. У НДЦ “Зубраня” для такога супрацоўніцтва створаны міжнародныя тэматычныя змены. Міністр адукацыі ўнёс прапанову правесці Дні беларускай адукацыі ў Кыргызстане з арганізацыяй круглых сталоў, навуковых семінараў, наведваннем навучальных устаноў, сустрэч з педагогамі.

Кубанычбек Амураліеў падтрымаў усе прапановы кіраўніка Міністэрства адукацыі нашай краіны і выказаў спадзяванне, што многія праекты будуць рэалізаваны ў самай бліжэйшай перспектыве. Дыпламат расказаў, што нядаўна сустракаўся з мінскімі школьнікамі, якія вучацца ў школе, размешчанай па вуліцы Джумаша Асаналіева, Героя Савецкага Саюза, удзельніка Вялікай Айчыннай вайны. Пасля гэтай сустрэчы ўзнікла ідэя арганізаваць паездку беларускіх дзяцей на радзіму героя.

— Безумоўна, такія сустрэчы яшчэ больш паўплываюць на наша супрацоўніцтва і ўмацуюць сувязі паміж нашымі краінамі, — падкрэсліў Кубанычбек Амураліеў.

Ала КЛЮЙКО.

Захаваць баланс інтарэсаў бізнесу і працоўных

Рабочая сустрэча кіраўніцтва Федэрацыі прафсаюзаў Беларусі і Нацыянальнага банка прайшла ў Мінску ў штаб-кватэры ФПБ, паведамілі ў прэс-службе федэрацыі.

Бакі разгледзелі ініцыятыву Федэрацыі прафсаюзаў Беларусі па стварэнні гарантыйнага фонду на выпадак нявыплаты заработнай платы пры банкруцтве прадпрыемстваў. “Такі фонд можа фарміравацца на салідарнай аснове, а расходавацца як у якасці дапамогі працоўным, так і на фінансавую падтрымку на тэрміновай і зваротнай аснове асобных прадпрыемстваў. Ідэя стварэння гарантыйнага фонду нараўне з выкарыстаннем іншых інструментаў сацыяльнай падтрымкі працоўных калектываў пры правядзенні рэарганізацыі прадпрыемстваў падтрымана кіраўніцтвам Нацбанка. Дасягнута дамоўленасць прадоўжыць прадметнае абмеркаванне гэтых пытанняў у найбліжэйшы час”, — сказалі ў прэс-службе.

Як адзначыў старшыня ФПБ Міхаіл Орда, для ўсіх вельмі важна захаваць баланс інтарэсаў бізнесу і працоўных. “Для прафсаюзаў асабліва важна, каб у чалавека была работа і магчымасць зарабляць. А гэта залежыць ад таго, наколькі эфектыўна працуюць прадпрыемствы, — сказаў ён. — Мы бачым, што сёння складваецца няпростая сітуацыя ў эканоміцы і на рынку працы. Патрэбны новыя рабочыя месцы. Аб гэтым ішла размова і на V Усебеларускім народным сходзе. Кіраўнік дзяржавы паставіў перад усімі органамі ўлады задачу стварыць за пяцігодку 250 тысяч рабочых месцаў. Але для гэтага патрэбны інвестыцыі і даступныя крэдыты”.

Старшыня праўлення Нацыянальнага банка Павел Калаур падкрэсліў: “Асноўная задача на гэты час — захоўваючы макраэканамічную збалансаванасць, выйсці на ўстойлівы рост нацыянальнай эканомікі. Аднак трэба разумець, што без структурных рэформ тут не абысціся. Наша агульная задача — мінімізаваць магчымыя негатыўныя наступствы і падтрымаць слабаабароненыя слаі насельніцтва. Без гэтага належнага эфекту мы не атрымаем”.

Удзельнікі рабочай сустрэчы таксама абмеркавалі актуальныя пытанні грашова-крэдытнай палітыкі краіны, пытанні ўзаемадзеяння банкаў з рэальным сектарам эканомікі. Размова ў тым ліку ішла аб магчымых перспектывах зніжэння крэдытных ставак у эканоміцы, механізмах падтрымкі малога і сярэдняга бізнесу.

Аляксандр ЛУКАШЭНКА: “Мы не маем ні перад адной дзяржавай абавязацельстваў, якія супярэчылі б нашаму супрацоўніцтву з ЗША”

Беларусь жадае нармалізацыі адносін з ЗША на ўзаемавыгадных умовах. Аб гэтым заявіў Прэзідэнт Беларусі Аляксандр Лукашэнка на сустрэчы з часовым павераным у справах ЗША ў Беларусі Скотам Роландам.

“Незалежнасць і суверэнітэт для мяне як прэзідэнта і для беларускага народа — гэта святое. Гэта ікона. Мы ніколі не згодзімся з тым, каб быць несуверэннай дзяржавай, быць залежнай ад некага”, — падкрэсліў у час сустрэчы беларускі лідар.

«Мы зробім усё, каб быць такой (незалежнай і суверэннай. — Заўв. БелТА) дзяржавай. Без усялякай празмернасці, без гвалту, нейкай помпы. Мы зробім гэта прыгожа і спакойна, і мы заўсёды будзем незалежнымі. Бог бачыць, што беларускі народ заслужыў гэта сваёй гісторыяй, і вы гэта добра ведаеце”, — сказаў Аляксандр Лукашэнка.

“Мы ніколі не ўтойвалі той факт, што без нармалізацыі адносін са Злучанымі Штатамі мы не будзем мець паўнацэннай знешняй палітыкі. Мы не ўтойваем, што вельмі хацелі б нармалізацыі адносін з ЗША на ўзаемавыгадных умовах”, — заявіў кіраўнік беларускай дзяржавы.

Прэзідэнт Беларусі адзначыў паляпшэнне адносін паміж Беларуссю і ЗША. “Калі сказаць, што ў нас усё добра ў адносінах паміж дзяржавамі, то, напэўна, гэта будзе выглядаць не зусім шчыра нават дыпламатычна. Але таго, што ў нас усё значна лепш, чым было, і што мы рухаемся ў нармальным, правільным напрамку, напэўна, і вы не станеце адмаўляць”, — адзначыў Аляксандр Лукашэнка.

“Пры добрай волі кіраўніцтва Злучаных Штатаў мы вельмі многае можам зрабіць у найбліжэйшай будучыні”, — падкрэсліў беларускі лідар.

Аляксандр Лукашэнка канстатаваў, што ў Беларусі ёсць пэўныя абавязацельствы перад краінамі-суседзямі, у тым ліку цеснае супрацоўніцтва з Расіяй, а таксама такімі дзяржавамі, як Кітай і Індыя. “Гэта нашы стратэгічныя саюзнікі, партнёры. Мы з імі заключылі адпаведныя пагадненні”, — сказаў ён.

Кіраўнік дзяржавы таксама закрануў тэму развіцця беларуска-амерыканскага гандлёва-эканамічнага супрацоўніцтва. “Калі са Злучаных Штатаў прыязджаюць бізнесмены і я з імі сустракаюся, абмяркоўваючы інвестыцыйны клімат у Беларусі, я ім гавару: працуйце ў нас, у Беларусі, па амерыканскіх законах, мы створым вам такое прававое поле. Яны гавораць: не, мы хочам па беларускіх законах. І я ім за гэта ўдзячны, — расказаў Аляксандр Лукашэнка. — Гэта для мяне вельмі моцны рычаг і аснова для размовы з іншымі бізнесменамі. Трэба аддаць належнае, што сапраўды амерыканцы — людзі зусім розныя, але гэта шчырыя людзі, якія, бачачы свой інтарэс, хацелі б цесна супрацоўнічаць з нашай Беларуссю”.

“Я гэта гавару для таго, каб вы разумелі, што ў нас няма забароненых тэм у супрацоўніцтве з вамі. Мы не маем ні перад адной дзяржавай абавязацельстваў, якія супярэчылі б нашаму супрацоўніцтву з ЗША. Нават расіяне нам заўсёды гавораць аб тым, што мець нармальныя адносіны з Заходняй Еўропай і ЗША — гэта абсалютна прымальна і неабходна”, — заявіў Аляксандр Лукашэнка.

“Яшчэ раз падкрэсліваю: калі на гэта будзе добрая воля Злучаных Штатаў, мы вырашым любыя праблемы. Аснова павінна быць адна — шчырасць, прыстойнасць, адкрытасць і давернасць”, — дадаў беларускі лідар.

Часовы павераны ў справах Злучаных Штатаў Амерыкі ў Беларусі Скот Роланд, у сваю чаргу, адзначыў, што бачыць магчымасць поўнай нармалізацыі беларуска-амерыканскіх адносін. “Мы вельмі рады за прагрэс, якога дасягнулі тут за апошнія два гады. Хочам падзякаваць вам і Міністэрству замежных спраў, якое супрацоўнічала з намі па многіх пытаннях. Мы спадзяёмся, што гэта дае станоўчы імпульс для поўнай нармалізацыі адносін у будучыні”, — заявіў дыпламат.

“Вашынгтон хацеў, каб я вам перадаў: мы гатовы і ў далейшым супрацоўнічаць з Беларуссю, каб была добрая будучыня. Галоўнае, каб тэрытарыяльны суверэнітэт і незалежнасць Беларусі былі на самым высокім і моцным узроўні”, — сказаў Скот Роланд.

“Вы ў гэтым можаце не сумнявацца”, — запэўніў беларускі лідар.