Вучань года

У новы год у новым званні ўвайшлі 20 навучэнцаў устаноў адукацыі Міншчыны. Хлопцам і дзяўчатам, якія асабліва праявілі сябе ў мінулым годзе, было прысвоена ганаровае званне “Вучань года Мінскай вобласці — 2016”. Урачыстая цырымонія ўшанавання прайшла ў ЦТДіМ Салігорскага раёна.

— Другі год запар мы праводзім гэты конкурс, каб убачыць дзяцей, якія дасягнулі поспехаў у вучобе, творчасці, навуцы, спорце і грамадскай дзейнасці. На шчасце, такіх на Міншчыне мноства, — вітала вучняў года Галіна Мікалаеўна Казак, начальнік упраўлення адукацыі Мінаблвыканкама. — Насіць званне “Вучань года” — гэта вялікі гонар, але і вялікая адказнасць. Упэўнена, вы станеце сапраўднымі прафесіяналамі і сваімі працоўнымі поспехамі будзеце праслаўляць свой раён, нашу вобласць і нашу любімую краіну.

Ганаровае званне “Вучань года Мінскай вобласці — 2016” было прысуджана ў пяці намінацыях. Так, у кірунку “Адукацыйная дзейнасць” былі ўзнагароджаны дыпламанты інтэлектуальных спаборніцтваў. Як, напрыклад, Ілья Волах, навучэнец Мінскага абласнога кадэцкага вучылішча. Ілья мае дыплом II ступені IX Міжнароднай маладзёжнай НПК “Вялікая Айчынная вайна 1941—1945 гадоў у гістарычнай памяці народа”; дыплом I ступені VI Сувораўскіх чытанняў “Беларусь у гады Вялікай Айчыннай вайны: гераізм, трагедыя, памяць”. Таксама хлопец узнагароджаны медалём “За служэнне Радзіме з дзяцінства” Беларускага саюза сувораўцаў і кадэтаў.

А дасягненні Лізаветы Няборскай, якая вучыцца ў сярэдняй школе № 2 Мар’інай Горкі, найбольш праявіліся ў творчасці. 12-гадовая дзяўчынка сваімі спевамі скарыла не адно строгае журы. Ліза ўдзельніца тэлевізійных праектаў і шматразовая прызёрка міжнародных вакальных конкурсаў. Ліза і такія ж творчыя і мэтанакіраваныя вучні атрымалі ганаровае званне “Вучань года” ў кірунку “Творчая дзейнасць”.

Інавацыйная, навуковая, даследчая дзейнасць патрабуе вялікай колькасці часу і надзвычай сур’ёзнага падыходу. Менавіта такія — працавітыя, старанныя і сур’ёзныя — сталі “Вучнем года” ў кірунку “Інавацыйная дзейнасць”. Як, напрыклад, Уладзіслаў Майсеенка, навучэнец Уздзенскай раённай гімназіі, распрацоўшчык турыстычна-краязнаўчых праектаў, дыпламант І ступені ХХII Усерасійскіх юнацкіх чытанняў імя У.І.Вярнадскага ў Маскве, лаўрэат ІХ Міжнароднай маладзёжнай НПК “Вялікая Айчынная вайна 1941—1945 гадоў у гістарычнай памяці народа”. Уладзіслаў з 7 класа марыць стаць урачом і зараз штодзень займаецца біялогіяй і хіміяй па 5 гадзін.

У школьнікаў хапае часу не толькі на вучобу, але і на добрыя справы. Так, Ксенія Асомчык, навучэнка гімназіі № 1 Старых Дарог, не толькі добра вучыцца, але і з’яўляецца членам валанцёрскага атрада “Добрае сэрца”. Ксенія стала вучнем года ў кірунку “Грамадская дзейнасць”. Былі сярод узнагароджаных і спартсмены, як, напрыклад, суднамадэліст Ілья Роліч, навучэнец Чурлёнскага дзіцячага сада — сярэдняй школы Вілейскага раёна. Ілья не раз станавіўся прызёрам рэспубліканскіх спаборніцтваў і быў узнагароджаны ў кірунку “Спартыўная дзейнасць”.

Лепшыя вучні 2016 года ўжо зараз ставяць перад сабой новыя мэты, каб абавязкова дасягнуць іх у новым
2017 годзе.

Дар’я РЭВА.
Фота аўтара.

Тытул “Студэнт года — 2016” знайшоў уладальніка!

Самая яркая студэнцкая падзея — фінал рэспубліканскага конкурсу “Студэнт года — 2016”— аб’яднала моладзь краіны ў чацвер. Каб свята прайшло па-зімоваму горача, на гэты раз арганізатары перанеслі яго з універсітэцкай актавай залы ў папулярны начны клуб. Адметным стала і тое, што конкурс, нарэшце, апраўдаў сваю назву — упершыню за яго гісторыю перамагла не студэнтка, а студэнт. На гэты раз перамогу святкаваў Дзмітрый Куксо — будучы эканаміст-менеджар з Полацкага дзяржаўнага ўніверсітэта.

Ідэя конкурсу, арганізатарам якога з 2011 года выступае Беларускі рэспубліканскі саюз моладзі пры падтрымцы Міністэрства адукацыі Рэспублікі Беларусь і Рэспубліканскага студэнцкага савета БРСМ, — прадтрымаць творчы запал студэнтаў, стварыць умовы для іх самарэалізацыі ў галіне грамадскай дзейнасці, навукі, мастацтва і спорту, прасоўвання сваіх ініцыятыў і праектаў.

У фінальным баі сышліся 9 лепшых студэнтаў — самых лепшых у вучобе, навуцы, спорце, творчасці, прамоўніцкім майстэрстве. Галоўныя ўмовы для канкурсантаў — навучанне на 2—5 курсах устаноў вышэйшай адукацыі, поспехі ў вучобе (сярэдні бал канкурсанта павінен быць не ніжэй за 8!), удзел у грамадскім жыцці, дзейнасці Саюза моладзі, міжуніверсітэцкіх, раённых, гарадскіх, рэспубліканскіх і міжнародных конкурсах у галіне студэнцкага самакіравання. Разам з тым канкурсанты са сваімі групамі падтрымкі паказалі журы і ўсім прысутным, як трэба працаваць у адзінай камандзе, каб перамагаць!

У склад журы сёлета ўваходзілі Ірына Старавойтава, старшыня Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці; Людміла Макарына-Кірбак, старшыня камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Нацыянальнага сходу Рэспублікі Беларусь; Наталля Пшанічная, начальнік упраўлення па справах моладзі Міністэрства адукацыі Рэспублікі Беларусь, знакамітыя беларускія спартсмены, тэлевядучыя і інш.

Канкурсантаў яны ацэньвалі па дзесяцібальнай сістэме. Дарэчы, сёлета правілы падвядзення вынікаў змяніліся. З мэтай празрыстасці вынікаў галасавання ўпершыню журы выстаўляла адзнакі ў рэжыме рэальнага часу, паднімаючы таблічкі з адзнакамі пасля заканчэння кожнага конкурсу.

Канкурсанты прайшлі шэраг выпрабаванняў — завочных: “Партфоліа”, “Маладзёжны праект”, конкурс прэзентацыі кніг “Крыніцы мудрасці”, і конкурсаў, якія стварылі студэнцкае шоу на сцэне. Гэта самапрэзентацыя “Я — студэнт!”, якая ўключыла відэаролік “Я — студэнт!” і творчую прэзентацыю, інтэлектуальны конкурс “Мая краіна — Беларусь” і творчы конкурс “Беларусь культурная”.

Але, акрамя гэтага, для перамогі трэба было мець і ўласныя козыры, якія ацэньваюцца па-за конкурсам. Для Дзмітрыя Куксо імі сталі інтэлігентнасць, адметны погляд на звычайныя рэчы і прыроджаная харызма.

“Я лічу сябе грамадзянінам свету (не прымаю нацыяналістычных сварак, расавых забабонаў і культурнай нянавісці) з рознабаковымі інтарэсамі, — зазначыў Дзмітрый напярэдадні фіналу. — Я цаню культуру сваёй краіны, сваёй малой радзімы, але пры гэтым паважаю культуры іншых народаў. Шчыра веру ў навуку, лічу, што менавіта навуковы падыход можа дапамагчы дасягнуць поспеху як кожнаму асобнаму чалавеку, так і чалавецтву ў цэлым. Перакананы, што чалавек варты большага, чым проста зарабляць грошы для існавання. Ён павінен рэалізоўваць свой творчы патэнцыял у тых сферах, да якіх ёсць схільнасць (навука, музыка, мастацтва і г.д.), і быць адзіным механізмам з іншымі людзьмі. Стварыць умовы для гэтага — адно з маіх жыццёвых імкненняў”.

Дзмітрый сур’ёзна захоплены сацыяльна-гуманітарнымі дысцыплінамі, робіць першыя крокі ў паглыбленым вывучэнні матэматычнага аналізу і статыстычнага аналізу даных, сочыць за развіццём тэхналогій. І ў навуцы атрымаў першыя поспехі: будучы студэнтам, напісаў дзве навукова-даследчыя працы, кожная з якіх адзначана дыпломам ІІ ступені на рэспубліканскім конкурсе, дзевяць навуковых публікацый, прымае ўдзел у шматлікіх навукова-практычных канферэнцыях. Ёсць у яго шмат ідэй для далейшых даследаванняў.

“Мне ёсць у чым удасканальвацца і ёсць чаму вучыцца. Таму я не збіраюся спыняцца ў сваім развіцці, — запэўнівае юнак. — Акрамя таго, увесь мой вольны час займае музыка. Я спяваю і іграю на розных інструментах (баян, гітара, духавыя, з нядаўніх часоў — блок-флейта), так што я чалавек-ансамбль, а ўлічваючы, што мае сябры таксама, разам мы ператвараемся ў цэлы аркестр! А калі сур’ёзна, то музыка — гэта лекі і крыніца сіл для маёй душы ў любой сітуацыі”.

У гэтым кірунку Дзмітрыю таксама ёсць чым ганарыцца: ён стаў дыпламантам двух вакальных конкурсаў, у школьныя гады прымаў удзел у інструментальных конкурсах, іграў у духавым аркестры, а пасталеўшы і паставіўшы голас, быў салістам ваеннага духавога аркестра. Часта прымае ўдзел у канцэртах, дорыць людзям радасць, з-за чаго, прызнаецца, і сам атрымлівае не меншае задавальненне.

“У цэлым я чалавек сур’ёзны і цаню ў людзях грунтоўнасць, хоць часам і падурэць таксама можна, і нават трэба. Цаню дабрыню і бескарыслівасць і адказваю тым жа. Паважаю людзей са светлай галавой, зносіны з імі і мяне робяць лепшым”.

Трымаючы ў руках галоўную ўзнагароду конкурсу, Дзмітрый пагаджаецца са словамі Наталлі Пшанічнай, якая, уручаючы яе, зазначыла, што гэта — не толькі прызнанне, але і вялікая адказнасць: “Мне цэлы год трэба будзе ўвасабляць сабой студэнцтва Беларусі. Гэта вельмі адказны тытул. І я пастараюся не падвесці студэнтаў Беларусі і з гонарам несці гэтае званне”.

Акрамя тытула “Студэнт года — 2016”, Дзмітрый Куксо атрымаў падарункі ад партнёраў, галоўныя сярод якіх — акустычная сістэма ад кампаніі SVEN — вытворцы тэхнікі для работы і забаў, і турыстычная пуцёўка па маршруце Талін — Хельсінкі — Стакгольм.

Прызы атрымалі і прызёры. Дыплом II ступені прысуджаны Вераніцы Кажанеўскай, будучаму лагапеду з Гродзенскага дзяржаўнага ўніверсітэта імя Янкі Купалы. Дыплом III ступені атрымаў Андрэй Андрук, студэнт Беларускага дзяржаўнага ўніверсітэта інфарматыкі і радыёэлектронікі.

У традыцыйнай дадатковай намінацыі “Студэнт года — 2016 ONLINE” канкурсантаў ацэньвалі інтэрнэт-карыстальнікі, галасуючы за аўтарскія гумарыстычныя відэаролікі на тэму “Я — студэнт!” (галасаванне праходзіла на канале YouTube). Перамогу ў ёй атрымаў Кірыл Дрозд з універсітэта грамадзянскай абароны Міністэрства па надзвычайных сітуацыях Рэспублікі Беларусь.

Арганізатары забяспечылі ўсім канкурсантам і іх шматлікім групам падтрымкі запамінальны энергічны адпачынак на танцпляцоўцы, яркія і дынамічныя выступленні зорак беларускай эстрады, музыкантаў, майстроў светлавога шоу.

Святлана НІКІФАРАВА.
Фота Алега ІГНАТОВІЧА.

Арыгінальныя бізнес-ідэі ад моладзі

ІІІ Міжнародны конкурс “StartUp-кааперацыя!” — 2016, на якім маладыя людзі — студэнты, магістранты і аспіранты з Беларусі, Расіі і Украіны — прадстаўлялі свае бізнес-праекты, прайшоў у Беларускім гандлёва-эканамічным універсітэце спажывецкай кааперацыі.

Сёлета конкурс сабраў 59 удзельнікаў амаль з 30 праектамі. Найбольш актыўнай аказалася ўкраінская моладзь: імі было прадстаўлена 15 праектаў, і многія аказаліся ў ліку пераможцаў. Нашы юнакі і дзяўчаты прапанавалі 10 праектаў. Распрацоўкі былі розныя і закраналі сферы грамадскага харчавання, турызму і актыўнага адпачынку, адукацыі і IT-сферы.

Конкурс праводзіцца на высокім узроўні і падтрымліваецца Гомельскім аблвыканкамам, а сярод арганізатараў — савет маладых навукоўцаў і Цэнтр бізнес-адукацыі БГЭУСК, Гомельскі тэхнапарк, Гомельскае аддзяленне Беларускай гандлёва-прамысловай палаты.

Да канкурсантаў прад’яўляюцца даволі жорсткія патрабаванні. Прапанаваныя ідэі павінны быць актуальнымі, улічваецца арыгінальнасць і навізна бізнес-праекта, яго запатрабаванасць на рынку, перспектыва акупнасці. Падчас прэзентацыі неабходна апісаць сваю бізнес-ідэю, канкурэнтаздольнасць прадукту, прадставіць вытворчы план, фінансавыя разлікі, план па кіраванні кадрамі. Кваліфікаванае журы, у склад якога нязменна ўваходзяць прадстаўнікі бізнес-супольнасці і органаў улады, ацэньвае таксама майстэрства прэзентацыі, магчымасць продажу ідэі або прыцягнення інвестыцый.

Прызавыя месцы размяркоўваліся ў першай і другой лізе. Такім чынам, 1-е месца атрымалі праекты “Распрацоўка металадэтэктара на аснове рэгістрацыі змены напружанасці магнітнага поля” Белгародскага ўніверсітэта кааперацыі, эканомікі і права і “Перапрацоўка вугляроднай і неарганічнай сыравіны “ІНТЭР Пласа” Палтаўскага ўніверсітэта эканомікі і гандлю. 2-е месца — у Беларускага гандлёва-эканамічнага ўніверсітэта спажывецкай кааперацыі (“Букеты з цукерак”) і Гомельскага гандлёва-эканамічнага каледжа (“Вытворчасць лялечных домікаў”). Дарэчы, праект каледжа быў прызнаны лепшым стартапам у галіне развіццёвых гульняў для дзяцей. На 3-м месцы — Палтаўскі ўніверсітэт эканомікі і гандлю з праектам “Лазня на колах”, а таксама праект “BLISS” Гомельскага дзяржаўнага тэхнічнага ўніверсітэта імя П.В.Сухога.

Акрамя таго, былі названы лепшыя стартапы ў сферах вытворчасці, гасцінічнага бізнесу, грамадскага харчавання, рамеснай дзейнасці, паслуг і інш. Пераможцы конкурсу атрымалі магчымасць стажыравацца на прыватных прадпрыемствах з мэтай папулярызацыі і фінансавання прадстаўленых на конкурсе праектаў.

Горад шчаслівай будучыні

На конкурс атрымання статусу першай маладзёжнай сталіцы краіны было пададзена больш за 30 заявак. Пасля іх дэталёвага аналізу былі вызначаны 10 фіналістаў. Спецыяльная камісія наведала кожны горад-прэтэндэнт, азнаёмілася з умовамі арганізацыі адукацыйнага працэсу і адпачынку моладзі, яе сацыяльнай падтрымкі, узроўнем добраўпарадкаванасці населенага пункта, эфектыўнасцю рэалізацыі рэгіянальнай маладзёжнай праграмы.
У выніку высокае званне было нададзена Баранавічам.
У пятніцу і суботу тут прайшло маштабнае рэспубліканскае свята “Баранавічы — маладзёжная сталіца Рэспублікі Беларусь — 2016”.

Студэнцкая рака

Тое, што Баранавічы сталі першай маладзёжнай сталіцай краіны, для многіх пакаленняў студэнтаў з Брэсцкай і Гродзенскай абласцей не з’яўляецца нечаканасцю. Каб даведацца чаму, дастаткова наведаць у нядзелю падчас навучальнага года станцыю Баранавічы-Палескія: у сярэднім кожныя паўгадзіны пасля прыбыцця электрычак і дызель-цягнікоў пероны станцыі ператвараюцца ў своеасаблівую раку студэнтаў. Сотні маладых людзей з Ганцавіч, Лунінца, Століна, Мастоў, Ваўкавыска, Бярозы, Івацэвіч, іншых райцэнтраў і шматлікіх вёсак накіроўваюцца на заняткі ва ўстановы вышэйшай адукацыі Мінска, Гродна, Брэста, а з 2004 года — і ў Баранавіцкі дзяржаўны ўніверсітэт. Шчыльнасць моладзі ў гэты час на асобна ўзяты перон нават перавышае адпаведныя паказчыкі сталіцы. Аднак не толькі гэты факт стаў прычынай надання Баранавічам статусу маладзёжнай сталіцы. У горадзе створаны ўсе ўмовы для самарэалізацыі, якаснай вучобы і адпачынку моладзі: напрыклад, адкрыты маладзёжны парк “Натхнёныя Перамогай”, пабудаваны сацыяльныя, спартыўныя аб’екты і, безумоўна, сучасныя карпусы ўніверсітэта.

Ад сэрца да сэрца

У гэтых карпусах 29 і 30 студзеня падчас Рэспубліканскага студэнцкага форуму абмяркоўваліся аспекты работы з сучаснай моладдзю. А пачыналіся святочныя мерапрыемствы з афіцыйнага надання Баранавічам статусу маладзёжнай сталіцы ў Лядовым палацы на базе баранавіцкай дзіцячай юнацка-спартыўнай школы па хакеі і фігурным катанні. Адначасова з урачыстай цырымоніяй адкрыцця свята “Баранавічы — маладзёжная сталіца Рэспублікі Беларусь — 2016” быў дадзены старт рэспубліканскаму грамадзянска-патрыятычнаму праекту “Збяры Беларусь у сваім сэрцы”, які стаў лагічным працягам аднайменнай краязнаўчай акцыі, сутнасць якой, нагадаем, заключалася ў наведванні юнымі краязнаўцамі некалькіх адметных мясцін кожнага з сямі рэгіёнаў краіны і падрыхтоўцы па выніках падарожжаў відэафільмаў. Збіраць Беларусь з яе багатай гістарычнай, культурнай спадчынай, яе таленавітымі жыхарамі ўдзельнікі баранавіцкага свята пачалі падчас наведвання рэспубліканскай выставы “Свет творчасці дзяцей і моладзі”. Экспазіцыі “Пазнаем Беларусь разам”, “Упрыгожым Беларусь кветкамі”, “ТэхнаЭвалюцыя”, падрыхтаваныя супрацоўнікамі Рэспубліканскага цэнтра экалогіі і краязнаўства, Рэспубліканскага цэнтра інавацыйнай і тэхнічнай творчасці разам з брэсцкімі і баранавіцкімі калегамі, прадставілі багатую палітру творчасці навучэнцаў і студэнтаў.— Год моладзі быў багаты на адкрыцці, падарыў нам шмат цікавага, у тым ліку першую маладзёжную сталіцу краіны. Конкурс, на якім вызначаўся горад-шчасліўчык, быў вельмі цікавым. За высокае званне змагалася шмат гарадоў, аднак пачэснае права быць маладзёжнай сталіцай нездарма атрымалі Баранавічы. Тут створаны ўсе неабходныя ўмовы для творчай і прафесійнай самарэалізацыі маладых людзей, іх якаснага адпачынку. У рамках рэспубліканскага свята вас чакае шмат цікавага. Гэта і студэнцкі форум, на які прыехала рэкордная колькасць удзельнікаў і які ў гэтыя дні будзе праходзіць чацвёрты раз. Пра важнасць форуму сведчыць той факт, што яго рашэнні з’яўляюцца для нас своеасаблівай дарожнай картай па арганізацыі работы са студэнцкай моладдзю. Стартуе і грамадзянска-патрыятычны праект “Збяры Беларусь у сваім сэрцы”. Упэўнены, што кожны яго ўдзельнік збярэ ў сваім сэрцы нашу Беларусь, — адзначыў на ўрачыстым адкрыцці свята намеснік міністра адукацыі Віктар Віктаравіч Якжык.
Праект “Збяры Беларусь у сваім сэрцы” дазволіць удзельнікам адкрываць для сябе гарады і вёскі, пракладваць новыя маршруты, наведваць гістарычныя і памятныя мясціны, убачыць прыгажосць усіх куточкаў нашай краіны. Сваімі знаходкамі навучэнцы і студэнты змогуць дзяліцца на старонках афіцыйных груп у сацыяльных сетках. Адным са значных вынікаў рэалізацыі праекта “Збяры Беларусь у сваім сэрцы” стане падрыхтоўка маладых экскурсаводаў, якія потым змогуць прафесійна праводзіць экскурсіі па ўжо правераных маршрутах. Гэтыя маршруты будуць праходзіць ад горада да горада, ад чалавека да чалавека, ад сэрца да сэрца.

Раўненне на Баранавічы

Па словах старшыні Баранавіцкага гарвыканкама Юрыя Анатольевіча Грамакоўскага, тое, што Баранавічы аб’яўлены маладзёжнай сталіцай, накладвае на жыхароў горада вялікую адказнасць. Гэта прызнанне высокіх дасягненняў моладзі на шматлікіх конкурсах, спаборніцтвах, алімпіядах, у прафесійным жыцці. З іншага боку, гэта вялікі крэдыт даверу на ўвесь бягучы год. “Нам ёсць чым ганарыцца. Упэўнены, мы годна пранясём гэтае званне, а конкурс на атрыманне статусу маладзёжнай сталіцы стане традыцыйным, бо гэта стымул для далейшага развіцця населенага пункта. Жадаю, каб ваша знаходжанне ў Баранавічах стала яркай і незабыўнай падзеяй, каб вашы знаёмствы, абмен вопытам сталі асновай моцнага сяброўства і далейшых міжуніверсітэцкіх зносін. Ад вас, маладых, разумных, мэтанакіраваных, таленавітых, залежыць шчаслівае сёння і ўпэўненая будучыня Беларусі. Перакананы, вам спадабаецца ў Баранавічах, вы прыедзеце да нас яшчэ не адзін раз”, — адзначыў Юрый Анатольевіч.
— За вамі — будучыня краіны. Вы ведаеце, наколькі складана сёння ўтрымаць гэтую будучыню, мір на нашай планеце, аднак ваш энтузіязм, ваша мэтанакіраванасць дазволяць пераадолець любыя цяжкасці, дасягнуць самых высокіх мэт, — звярнуўся да ўдзельнікаў свята рэктар Баранавіцкага дзяржаўнага ўніверсітэта Васіль Іванавіч Качурка.

Надзея і будучыня

Амаль паўтара стагоддзя Баранавічы вядомы як горад чыгуначнікаў, а з нядаўняга часу яшчэ і як горад студэнтаў. Нездарма цэнтральнае месца сярод урачыстасцей было адведзена Рэспубліканскаму студэнцкаму форуму “Моладзь — надзея і будучыня Беларусі”. Што рабіць для таго, каб гэтая будучыня была шчаслівай? Як моладзі рэалізаваць свае патрэбы? Як палепшыць работу студэнцкага самакіравання? Якімі шляхамі ўдасканальваць формы сацыяльнай падтрымкі студэнтаў, падтрымкі маладзёжных ініцыятыў? Вось няпоўны пералік пытанняў, якія абмяркоўваліся падчас пленарнага пасяджэння форуму, работы яго дыскусійных пляцовак.Пашырэнне работы дыскусійных пляцовак падчас рэспубліканскіх студэнцкіх форумаў з’яўляецца, па словах Віктара Віктаравіча Якжыка, добрай традыцыяй, якую трэба падтрымліваць. Адметнай падзеяй сёлетняга студэнцкага форуму стала правядзенне круглага стала, на якім кіраўніцтва Міністэрства адукацыі сумесна з прарэктарамі па выхаваўчай рабоце, начальнікамі ўпраўленняў па выхаваўчай рабоце ўстаноў вышэйшай адукацыі разглядалі і аналізавалі сучасныя падыходы ў арганізацыі ідэалагічнай і выхаваўчай работы з моладдзю. Больш падрабязна пра гэта чытайце ў наступным нумары нашага выдання.
— Быць першай маладзёжнай сталіцай — гэта вялікі гонар і вялікая адказнасць, таму вам неабходна не толькі ў гэтым, але і ў наступныя гады адпавядаць высокаму статусу. На вас адказнасць за наш заўтрашні дзень. Праўду гавораць: той, хто не цэніць мінулае, не мае будучыні, таму цаніце вопыт папярэдніх пакаленняў. Давайце зробім так, каб пакаленне пераможцаў у Вялікую Айчынную вайну ніколі не пашкадавала пра тое, што перадало нам у спадчыну самае дарагое — перамогу і адроджаную краіну. У нашай дзяржаве створаны рэальныя магчымасці для самарэалізацыі і прафесійнага росту маладых людзей, станаўлення і развіцця працоўнай дзейнасці. Перад вамі шырокія магчымасці: ад пазнання да рэалізацыі сваіх сіл як у навуцы, эканоміцы, так і ў мастацтве, грамадскім жыцці. Мы ганарымся маладым пакаленнем — разумным і перспектыўным, прыгожым і мэтанакіраваным, таму смела ідзіце наперад, ажыццяўляйце самыя амбіцыйныя ідэі, рэалізоўвайце задуманае, няхай вашы дасягненні служаць на карысць нашай Рэспублікі Беларусь, — звярнулася да ўдзельнікаў форуму дэпутат Палаты прадстаўнікоў Нацыянальнага сходу Рэспублікі Беларусь, член пастаяннай камісіі па заканадаўстве, старшыня Рэспубліканскага маладзёжнага савета Інеса Анатольеўна Кляшчук.

Кірункі дзейнасці

Вялікая колькасць маладзёжных ідэй, ініцыятыў ажыццяўлялася ў мінулым годзе. Начальнік упраўлення па справах моладзі Міністэрства адукацыі Наталля Іванаўна Пшанічная нагадала, што ідэя аб правядзенні ў краіне Года моладзі прагучала 29 кастрычніка 2013 года на маладзёжным форуме “Маладосць. Традыцыі. Будучыня”, які прайшоў з удзелам кіраўніка дзяржавы. Старт Году моладзі даў 42-і з’езд БРСМ. “Гэты год прайшоў для сістэмы адукацыі, краіны ў цэлым пад знакам святкавання 70-годдзя Вялікай Перамогі. Гэта, безумоўна, важнае, стрыжнявое грамадзянска-патрыятычнае мерапрыемства. Год 70-годдзя Вялікай Перамогі, Год моладзі і год выбараў Прэзідэнта Рэспублікі Беларусь зрабілі 2015-ы надзвычай важным у жыцці краіны. У мінулым годзе ў кожнай установе адукацыі актыўна рэалізоўваліся такія праекты, як “ВЫБІРАЙ.BY!”. Упершыню прайшоў Рэспубліканскі форум сельскай моладзі, а таксама форум спецыялістаў у сферы арганізацыі работы з моладдзю. Яркай і запамінальнай атрымалася спецыяльная “зубраняцкая” змена “Маладзёжнай ініцыятыве — “так”!”. Актыўная работа студэнцкіх атрадаў — таксама дасягненне Года моладзі. У іх рабоце прыняло ўдзел каля 70 тысяч маладых людзей. Пасля завяршэння Года моладзі будуць і далей актыўна працаваць студэнцкі і маладзёжны рэспубліканскія саветы. Наогул, для сістэмы адукацыі любы год — гэта год моладзі”, — адзначыла Наталля Іванаўна.Адметнай падзеяй, якая вызначыла на найбліжэйшыя гады кірункі міжнароднага супрацоўніцтва ў сферы маладзёжнай палітыкі, стала падпісанне мемарандума аб супрацоўніцтве паміж міністэрствамі адукацыі краін Вышаградскай групы і Усходняга партнёрства. І, безумоўна, самым важным праектам стала вызначэнне маладзёжнай сталіцы. Ажыццяўленне маладзёжнай палітыкі немагчыма без прыняцця нарматыўна-прававых актаў. Па словах Наталлі Іванаўны, цяпер дапрацоўваюцца змяненні ў Закон Рэспублікі Беларусь “Аб асновах дзяржаўнай маладзёжнай палітыкі”, пашыраюцца кампетэнцыі Міністэрства адукацыі. На змену праграме “Моладзь Беларусі”, разлічанай на 2011—2015 гады, падрыхтавана падпраграма “Маладзёжная палітыка” на 2016—2020 гады, якая ўвойдзе ў склад дзяржаўнай праграмы “Адукацыя і маладзёжная палітыка”.

Маладзёжная ініцыятыва

Гаспадар сёлетняга студэнцкага форуму Баранавіцкі дзяржаўны ўніверсітэт валодае поўным комплексам рэсурсаў для рэалізацыі сістэмы выхаваўчага ўздзеяння на ўсіх удзельнікаў адукацыйнага працэсу. Па словах прарэктара па выхаваўчай рабоце БарДУ Паўла Іванавіча Папко, прыярытэт у выхаваўчай рабоце аддаецца мерапрыемствам, накіраваным на фарміраванне і ўдасканальванне прафесійных і сацыяльна-асобасных кампетэнцый студэнтаў. Асабліва дзейснай з’яўляецца рэалізацыя праектаў (напрыклад, “Гармонія ў сям’і — росквіт у краіне”, “Народныя традыцыі, абрады і звычаі як захаванне нацыянальнай самабытнасці нашага краю”, “Школа лідара “Творчы актывіст ХХІ стагоддзя” і інш.). У сваім дакладзе на пленарным пасяджэнні форуму, якое было прысвечана пытанням інавацыйнай дзейнасці студэнтаў у пазавучэбны час, Павел Іванавіч адзначыў, што перашкодай да інтэнсіўнага інавацыйнага развіцця з’яўляецца пэўная інертнасць і недастаткова высокая актыўнасць або запыт саміх спажыўцоў адукацыйных паслуг.Выхадам з такой сітуацыі з’яўляецца належная падтрымка маладзёжных ініцыятыў. Ініцыятыва, па словах старшыні Грамадскага рэспубліканскага студэнцкага савета Яўгена Харука, — гэта праяўленне актыўнай грамадзянскай пазіцыі ў той ці іншай сферы грамадскай дзейнасці. Важным тут з’яўляецца пытанне матывацыі. “Матывацыя — пабуджэнне дзейсна задавальняць свае патрэбы, а іх у студэнтаў вельмі многа. Усё, дзе студэнт ажыццяўляе свае ідэі, і ёсць студэнцкае самакіраванне. Любая студэнцкая арганізацыя займаецца самакіраваннем. Правесці канцэрт, спаборніцтва, экскурсію — гэта і ёсць самакіраванне. Раней моладзь далучалі да актыўнага студэнцкага жыцця пераважна праз выдзяленне месцаў у інтэрнаце, выезды за мяжу, работу ў студэнцкіх атрадах. Аднак ёсць адна рэч, якая застаецца дзейснай ва ўсе часы, — гэта самарэалізацыя. Асноўная магчымасць далучыць маладых людзей да актыўнага грамадскага жыцця — гэта даць ім магчымасць самарэалізавацца, таму аптымальнай з’яўляецца сітуацыя, калі студэнт праяўляе актыўнасць у некалькіх аб’яднаннях, што дазваляе яму рэалізаваць як мага большую колькасць сваіх патрэб”, — лічыць Яўген Харук.

Свята з працягам

Урачыстасці з нагоды афіцыйнага надання Баранавічам статусу маладзёжнай сталіцы краіны сталі добрым пачаткам шматлікай колькасці гарадскіх, абласных, рэспубліканскіх мерапрыемстваў, якія, безумоўна, пройдуць у горадзе чыгуначнікаў і горадзе моладзі з не меншым поспехам і размахам, чым рэспубліканскае свята “Баранавічы — маладзёжная сталіца Рэспублікі Беларусь — 2016”. Спаборніцтвы, турніры, фестывалі нададуць гораду новы імпульс развіцця. Яго кіраўніцтва запрашае ў госці кожнага, тым больш што дабірацца ў Баранавічы (буйны чыгуначны вузел і першую маладзёжную сталіцу краіны) зручна практычна з любога куточка Беларусі.

Ігар ГРЭЧКА.
Фота аўтара і Алега ІГНАТОВІЧА.