600 школьнікаў на веласіпедах

Да акцыі “Дзень без аўтамабіля” актыўна далучыліся школьнікі Гомельшчыны. 22 верасня яны прыехалі да месца вучобы на веласіпедах. Наяўнасць яго была галоўнай умовай экалагічнага квеста, арганізаванага Гомельскім абласным эколага-біялагічным цэнтрам дзяцей і моладзі.

Мерапрыемства праводзілася дыстанцыйна. Для ўдзелу трэба было зайсці ў інтэрнэт і зарэгістравацца на сайце. На старт выйшлі 84 каманды з большасці раёнаў вобласці. Самым масавым у­дзелам а­дзначылася каманда гомельскай сярэдняй школы № 12 — больш за 30 юных веласіпедыстаў разам з дырэктарам. Усяго ў гульні паўдзельнічала больш за 600 чалавек.

Пасля заканчэння заняткаў на сайце ўключыўся таймер першага задання. Дзеці павінны былі зрабіць крэатыўнае фота з веласіпедам і размясціць яго ў сацыяльных сетках з хэштэгамі #гомельбезавто і #gomelbezavto. Не прайшло і 10 мінут, як у сацыяльных сетках пачалі з’яўляцца першыя фота­здымкі.

Другім заданнем стала напісанне верша са словамі “веласіпед”, “прырода”, “экалогія”, “паветра”, “школа”. Юныя таленавітыя паэты аказаліся на вышыні. Трэцяе заданне — прыдумац­ь незвычайны веласіпед і зрабіць яго мадэль з падручных матэрыялаў. У ход пайшлі папера, старыя газеты, ролікі ад скотча, сапсаваныя кампакт-дыскі і нават зламаныя мабільнікі. Наступнае заданне — фотаздымкі на вуліцах сваіх гарадоў і вёсак. Тут фотамадэлямі выступілі каты, сабакі і птушкі. У кадр трапілі як дзікія, так і свойскія жывёлы.

Завяршальным і самым складаным заданнем квеста было інтэрв’ю з веласіпедыстам на вуліцах населенага пункта. Для таго каб разгаварыц­ь прыхільнікаў двухколавага транспарту, дзецям прыйшлося праявіць цуды камунікабельнасці. Інтэрв’ю атрымаліся жывымі і эмацыянальнымі. З творчымі заданнямі паспяхова справіліся ўсе каманды. Вызначыц­ь пераможцаў вела-квеста дапамагла анлайн-віктарына. У старэйшай узроставай групе пераможцай стала каманда Гомельскага гарадскога
ліцэя № 1, у малодшай — каманда гімназіі № 71 Гомеля.

Ірына АСТАШКЕВІЧ.