Новыя спецыяльнасці, новаўвядзенні і змяненні ва ўступнай кампаніі — 2022, а таксама тэрміны залічэння ў навучальныя ўстановы краіны.
Каледжы і ліцэі чакаюць
Нагадаем, што ў Беларусі прафесіі можна атрымаць на трох узроўнях: прафесійна-тэхнічнай, сярэдняй спецыяльнай і вышэйшай адукацыі. Сёлета глабальных змяненняў не прадбачыцца, але пэўныя дапаўненні ўсё ж такі будуць. Так, выпускнікі спартыўна-педагагічных класаў з адзнакамі па профільных прадметах не ніжэйшымі за 8 балаў, а па астатніх — не ніжэйшымі за 7, маючы рэкамендацыі педсавета, змогуць паступаць на спецыяльнасці фізічнай культуры і спорту без уступных экзаменаў. Гэтак жа і абітурыенты з мэтавымі накіраваннямі змогуць паступаць на сельскагаспадарчыя спецыяльнасці без іспытаў.
У сваю чаргу паступленне па-за конкурсам патрабуе здачы ўступных экзаменаў, але ў такім выпадку абітурыент з ніжэйшымі баламі зможа быць залічаны ў выбраную УВА. Напрыклад, выпускнікі профільных класаў або груп ваенна-патрыятычнай накіраванасці, якія асвоілі факультатыўную праграму “Гатовы Радзіме служыць”, змогуць паступаць у вышэйшыя навучальныя ўстановы Міністэрства абароны і на ваенныя факультэты па-за конкурсам.
Прыём на ўзровень прафесійна-тэхнічнай адукацыі ў гэтым годзе будуць ажыццяўляць 122 установы прафтэхадукацыі і яшчэ 43 філіялы УВА, якія рэалізуюць адукацыйныя праграмы прафтэхадукацыі. “Плануецца прыняць каля 26 тысяч абітурыентаў. Прыём для атрымання прафтэхадукацыі вядзецца ў асноўным на бюджэтную форму навучання за рэдкім выключэннем, а прыём на платную форму складзе ўсяго толькі 50 чалавек. Пры гэтым навучанне, звязанае з прысваеннем адпаведнай кваліфікацыі і атрыманнем рабочай прафесіі, ажыццяўляецца ў вочнай форме. Таму на яго плануецца залічыць каля 24,6 тысячы чалавек, яшчэ 420 — на завочную форму і крыху больш за 980 — на вячэрнюю форму атрымання адукацыі”, — паведаміў начальнік галоўнага ўпраўлення прафесійнай адукацыі Міністэрства адукацыі Сяргей Каспяровіч.
Паводле яго слоў, на ўзровень прафтэхадукацыі штогод карэкціруецца структура прыёму з улікам рэгіянальных патрэб. “У 2022 годзе плануецца прыпыніць прыём па 132 спецыяльнасцях або прафесіях, якія не запатрабаваны ў пэўных рэгіёнах. Гэта не азначае, што прыёму па гэтых спецыяльнасцях не будзе ў іншым рэгіёне. Калі ў прадпрыемстваў канкрэтнага рэгіёна няма патрэбы ў нейкіх спецыялістах, рабочых, то ва ўстановах прафтэхадукацыі гэтага рэгіёна прыём па адпаведных спецыяльнасцях ажыццяўляцца не будзе, — патлумачыў Сяргей Антонавіч. — Затое будзе адкрыта падрыхтоўка па 141 прафесіі, якія запатрабаваны ў рэгіёнах. Такім чынам, прыпыненне набору на асобныя спецыяльнасці і адкрыццё прыёму на іншыя запатрабаваныя прафесіі ў любым выпадку забяспечаць рынак працы неабходнымі спецыялістамі”.
У структуры прыёму ва ўстановы прафтэхадукацыі будуць захаваны тэндэнцыі мінулых гадоў. Спецыяльнасці рэальнага сектара складуць каля 74%. Пры гэтым будзе крыху скарочаны прыём па профілях адукацыі “Камунікацыі”, “Права”, “Эканоміка”, “Сельская гаспадарка”, “Грамадскае харчаванне” і павялічаны прыём па напрамках “Мастацтва і дызайн” і інш.
Тэрміны прыёму на ўзровень прафтэхадукацыі традыцыйныя: з 15 чэрвеня па 20 жніўня, але залічэнне на ўзровень прафесійна-тэхнічнай адукацыі прадоўжыцца да 25 жніўня.
У 2022 годзе прыём на ўзровень сярэдняй спецыяльнай адукацыі будуць ажыццяўляць 110 устаноў сярэдняй спецыяльнай адукацыі і 84 іншыя ўстановы адукацыі, якія рэалізуюць адпаведныя праграмы. План прыёму сфарміраваны з улікам патрэб заказчыкаў кадраў, усяго збіраюцца прыняць каля 39,5 тысячы чалавек. Пры гэтым на дзённую форму — 24,3 тысячы абітурыентаў, на завочную бюджэтную форму — 2 тысячы, на платную форму навучання — 13,2 тысячы чалавек (на дзённую — 9,3 тысячы і завочную — 3,9 тысячы). Прыём на ўзровень сярэдняй спецыяльнай адукацыі сёлета будзе ажыццяўляцца з 20 ліпеня па 18 жніўня.
Найбольшую колькасць абітурыентаў установы ССА чакаюць на спецыяльнасці па профілях “Тэхніка і тэхналогія”, “Ахова здароўя”, “Сельская і лясная гаспадарка”, “Садова-паркавае будаўніцтва”, “Педагогіка”, “Архітэктура і будаўніцтва”. “Акрамя таго, сёлета 17 устаноў сярэдняй спецыяльнай адукацыі пашырылі пералікі спецыяльнасцей, па якіх будуць ажыццяўляць падрыхтоўку. Напрыклад, Мінскі гарадскі педагагічны каледж і Ваўкавыскі каледж ГрДУ імя Янкі Купалы ўпершыню аб’яўляюць набор на новую спецыяльнасць “Педагагічнае суправаджэнне”. Падрыхтоўка па ёй іншымі ўстановамі адукацыі ў краіне раней не вялася, — праінфармаваў Сяргей Антонавіч. — Пры гэтым таксама адкрываюцца новыя спецыяльнасці для асобных устаноў. Так, у філіяле БНТУ “Мінскі дзяржаўны архітэктурна-будаўнічы каледж” адкрываецца спецыяльнасць “Архітэктурны дызайн гарадскога асяроддзя”. Беларускі дзяржаўны каледж прамысловасці будаўнічых матэрыялаў, філіял БДТУ, запрашае на спецыяльнасць “Абслугоўванне сістэм водападрыхтоўкі і водаачысткі”.
УВА прапануюць
УВА плануюць прыняць каля 53,5 тысячы абітурыентаў: на бюджэт — 27,7 тысячы чалавек, на платную форму навучання — 25,8 тысячы. “Пры гэтым у структуры бюджэтнай формы дамінуе дзённая форма навучання — гэта каля 23 тысяч чалавек, у той час як платная складае прыблізна 4,5 тысячы. А вось у структуры завочнай формы пераважае платная форма атрымання адукацыі, — паведаміў С.А.Каспяровіч. — Найбольшая колькасць месцаў адведзена профілям “Тэхніка і тэхналогія”, “Садова-паркавае будаўніцтва”, “Сельская і лясная гаспадарка”, “Ахова здароўя”, “Педагогіка”. Таксама ў гэтым годзе плануецца павелічэнне прыёму на медыцынскія спецыяльнасці, на бюджэтную форму атрымання адукацыі ў тым ліку”.
БрДУ імя А.С.Пушкіна пачне прыём на новую спецыяльнасць “Урбаналогія і сіці-менеджмент”. БДУ плануе ажыццяўляць прыём на новыя спецыяльнасці “Геатэхналогія турызму і экскурсійная дзейнасць” і “Біяінжынерыя і біяінфарматыка”. Акрамя таго, БНТУ ўжо аб’явіў набор на спецыяльнасць “Эканоміка і арганізацыя вытворчасці” па напрамку “Лічбавыя тэхналогіі на прамысловым прадпрыемстве” — гэта так званая індустрыя 4.0. БДТУ будзе набіраць на мадэрнізаваную спецыяльнасць “Тэхналогія і перапрацоўка біяпалімераў”, а МДЛУ — на спецыяльнасць “Японская мова і другая замежная мова” са спецыялізацыяй “Спецыяльны пераклад”. У сваю чаргу ПДУ запрашае на спецыяльнасць “Штучны інтэлект (інструментальныя сродкі і тэхналогія праектавання інтэлектуальных сістэм)”, а ГДТУ імя П.В.Сухога — на спецыяльнасць “Кіраванне дызайн-праектамі на прамысловым прадпрыемстве”. У ГрДУ імя Янкі Купалы запланаваны набор на новыя спецыяльнасці “Журналістыка”, “Аналітычная біяхімія” і “Біяхімія лекавых сродкаў”, у ВДУ імя П.М.Машэрава — на спецыяльнасць “Спартыўна-педагагічная дзейнасць”, а ў МДУ імя А.А.Куляшова — “Кіраванне
інфармацыйнымі рэсурсамі”.
РІКВ паведамляе
Цэнтралізаванае тэсціраванне ў 2022 годзе пачнецца 14 чэрвеня з беларускай мовы, а завершыцца асноўны этап ЦТ 6 ліпеня.
–Як і ў мінулыя гады, чакаецца, што самымі масавымі прадметамі стануць руская мова і матэматыка. ЦТ па гэтых прадметах будзе праходзіць на працягу двух дзён. Рассадка прадугледжваецца камфортная і бяспечная. Акрамя таго, сёлета ў інтарэсах абітурыентаў было прынята рашэнне павялічыць на 30 мінут час выпрабаванняў па фізіцы і матэматыцы, — расказаў дырэктар Рэспубліканскага інстытута кантролю ведаў Юрый Міксюк.
Рэгістрацыя на ЦТ пачнецца 2 мая і прадоўжыцца да 1 чэрвеня ўключна ў 41 пункце тэсціравання. Яна будзе праводзіцца ў зручнай для абітурыентаў форме. Так, запоўніць анкету папярэдняй рэгістрацыі можна ў асабістым кабінеце на сайце РІКВ або асабіста наведаць выбраны пункт тэсціравання.
— Калі гаварыць пра матэрыялы ЦТ, то спецыфікацыя на сайце РІКВ ужо даўно размешчана. Абітурыенты змаглі з ёй азнаёміцца, прайсці рэпетыцыйнае тэсціраванне ў розных формах. Таму можна гаварыць, што істотных змяненняў у плане складанасці і структуры тэстаў няма і не будзе. Абітурыенты могуць спакойна рыхтавацца да здачы ЦТ, а затым прыйсці і паказаць свае веды, — падкрэсліў Ю.І.Міксюк.
Графік ЦТ:
- 14 чэрвеня — беларуская мова,
- 16 і 17 чэрвеня — руская мова,
- 19 чэрвеня — грамадазнаўства,
- 21 і 22 чэрвеня — матэматыка,
- 24 чэрвеня — біялогія,
- 26 чэрвеня — замежная мова (англійская, нямецкая, французская, іспанская, кітайская),
- 28 чэрвеня — хімія,
- 30 чэрвеня — фізіка,
- 2 ліпеня — гісторыя Беларусі,
- 4 ліпеня — геаграфія,
- 6 ліпеня — сусветная гісторыя (найноўшы час).
Рэзервовыя дні:
- 12 і 14 ліпеня — беларуская і руская мовы,
- 12 і 16 ліпеня — астатнія прадметы.
Пачатак ЦТ ва ўсе дні — 11:00.
Вольга АНТОНЕНКАВА.
Фота Алега ІГНАТОВІЧА.