Абнародаваны вынікі кантрольных мерапрыемстваў на аб’ектах з масавым знаходжаннем людзей

Дэпартамент па наглядзе за бяспечным вядзеннем работ у прамысловасці Міністэрства па надзвычайных сітуацыях (Дзяржпрамнагляд) расказаў пра вынікі кантрольна-прафілактычных мерапрыемстваў у гандлёва-забаўляльных цэнтрах і іншых аб’ектах з масавым знаходжаннем людзей. Такая інфармацыя размешчана на сайце МНС.

У мэтах выканання даручэння кіраўніка дзяржавы з 27 па 30 сакавіка праведзены кантрольна-прафілактычныя мерапрыемствы адносна ГЗЦ і іншых масавых аб’ектаў, дзе эксплуатуюцца патэнцыяльна небяспечныя аб’екты, што пад кантролем Дзяржпрамнагляду.

У гэты перыяд Дзяржпрамнагляд правёў 151 маніторынг суб’ектаў гаспадарання: праверана 160 масавых аб’ектаў, якія эксплуатуюць 987 патэнцыяльна небяспечных аб’ектаў (ліфтаў, эскалатараў, травалатараў, кацельняў, аб’ектаў газаразмеркавальнай сістэмы і газаспажывання).

У выніку выяўлены 1062 парушэнні патрабаванняў прамысловай бяспекі, з якіх 71 уплывае на бяспечную эксплуатацыю і стварае пагрозу ўзнікнення надзвычайных сітуацый. Адносна небяспечных аб’ектаў вынесена 37 прапаноў аб прыпыненні іх работы. “Усімі суб’ектамі, на якіх былі праверкі, прынята рашэнне аб прыпыненні эксплуатацыі небяспечных аб’ектаў да ўстаранення парушэнняў, што паслужылі падставай уручэння прапановы”, — адзначылі ў Дзяржпрамнаглядзе.

Тыповымі парушэннямі сталі адсутнасць вытворчага кантролю за выкананнем патрабаванняў прамысловай бяспекі пры эксплуатацыі небяспечных аб’ектаў, няякаснае правядзенне тэхнічнага абслугоўвання і рамонту ліфтаў, адсутнасць эксплуатацыйнай і тэхналагічнай дакументацыі, а таксама дакументацыі, якая пацвярджае ажыццяўленне тэхабслугоўвання і бягучага рамонту, адсутнасць спецыялістаў, адказных за бяспечную эксплуатацыю аб’ектаў, і асоб, якія іх замяшчаюць, прайшлі падрыхтоўку і праверку ведаў па пытаннях прамысловай бяспекі і інш.