Беларусь зацікаўлена прыцягнуць новыя італьянскія кампаніі ў свабодныя эканамічныя зоны ў Кітайска-беларускі індустрыяльны парк “Вялікі камень”. Аб гэтым заявіў Прэм’ер-міністр Беларусі Сяргей Румас у ходзе рабочага візіту ў Італію.
Напярэдадні кіраўнік беларускага ўрада правёў сустрэчу з намеснікам Старшыні Савета Міністраў Італіі міністрам эканамічнага развіцця, працы і сацыяльнай палітыкі Луіджы Дзі Маё. За апошнія 10 гадоў гэта першая сустрэча на ўзроўні кіраўніцтва ўрадаў Беларусі і Італіі.
“Мы абмяркоўвалі не толькі вынікі сумеснага гандлёва-эканамічнага супрацоўніцтва, якое дэманструе на працягу некалькіх гадоў устойлівы рост, але і пераход да інвестыцыйнага супрацоўніцтва. У Беларусі паспяхова працуюць каля 260 італьянскіх кампаній. Для іх вылучана цэлая прамысловая акруга ў свабоднай эканамічнай зоне “Брэст”. Там прысутнічае няшмат кампаній, але на гэта ёсць шэраг аб’ектыўных прычын. Мы абмяркоўвалі, як можна прыцягнуць туды новы італьянскі капітал, якія вытворчасці можна перанесці”, — расказаў Сяргей Румас.
Прэм’ер-міністр звярнуў увагу, што для работы італьянскага бізнесу створаны добрыя ўмовы як у свабодных эканамічных зонах, так і ў Кітайска-беларускім індустрыяльным парку “Вялікі камень”.
Кааліцыйны ўрад у Італіі сфарміраваны прыкладна 8 месяцаў назад, і, як адзначыў Сяргей Румас, яго мэты ў многім сугучны з тым, над чым працуе беларускі ўрад. “Вялікая ўвага ўдзяляецца ўнутранаму парадку дня, новы ўрад вельмі ўважліва глядзіць на сітуацыю з рабочымі месцамі, сацыяльнай абаронай работнікаў — гэта якраз тыя напрамкі, якімі займаецца і беларускі ўрад”, — растлумачыў ён.
Італія традыцыйна ўваходзіць у лік важных гандлёвых партнёраў Беларусі. Тавараабарот паміж краінамі ў 2018 годзе вырас у параўнанні з 2017 годам на 15,2 працэнта (да $912,7 млн). Найбольшую долю ў беларускім экспарце занялі калійныя ўгнаенні, металапрадукцыя, мэбля, лесаматэрыялы.
