Аднавілі рарытэт

Выкладчыкі і студэнты факультэта механізацыі сельскай гаспадаркі Беларускай дзяржаўнай сельскагаспадарчай акадэміі ўласнымі сіламі аднавілі трактар “Універсал-2” 1954 года выпуску.

—Гэты трактар памятае не адно пакаленне выпускнікоў нашага факультэта. Ён 55 гадоў стаяў на пастаменце ля ўвахода ў вучэбны корпус № 8. Ідэя аднавіць яго ўзнікла спантанна, аднак знайшлося шмат энтузіястаў сярод педагогаў і студэнтаў, якія адважыліся паспрабаваць вярнуць рарытэтны трактар да жыцця, — расказаў дэкан факультэта механізацыі сельскай гаспадаркі У.У.Гусараў.

Работа па аднаўленні трактара кіпела на працягу некалькіх тыдняў. Яго разбіралі па частках умелыя рукі ў двух корпусах факультэта механізацыі сельскай гаспадаркі. Так, рухавік разбіраўся ў вучэбным корпусе № 2 пад кіраўніцтвам асістэнта кафедры тэхнічнага сэрвісу і агульнаінжынерных дысцыплін В.С.Міронава і загадчыка лабараторыі А.У.Сафонава. А аднаўленчыя работы хадавой часткі трактара праводзіліся ў вучэбным корпусе № 8 пад кіраўніцтвам старшых выкладчыкаў У.С.Петрусенкі і І.У.Гусарава. Актыўна працавалі над аднаўленнем рарытэта студэнты Павел Раманаў, Раман Зіновенка, Міхаіл Забела, Арцём Дзядзюля, Дзмітрый Кугач, Уладзіслаў Міхалкін, Андрэй Мурашка, Максім Самута і іншыя хлопцы. Значную дапамогу, у тым ліку матэрыяльную, аказалі выпускнікі факультэта, цяпер кіраўнікі камерцыйных прадпрыемстваў — С.П.Кокіц і В.С.Котаў.

— Работа была праведзена каласальная. Чаго варта было толькі вярнуць да жыцця рухавік, які не заводзіўся больш як 60 гадоў. Над аднаўленнем хадавой часткі таксама прыйшлося добра папраца­ваць. Некаторыя неабходныя запчасткі мы шукалі па ўсёй краіне, іншыя выточвалі самастойна. Але вынік быў варты таго, бо наш старэнькі трактар — паехаў. Гэта стала магчыма дзякуючы таму, што над яго аднаўленнем працавалі не проста педагогі і студэнты, а сапраўдны калектыў аднадумцаў, — адзначыў Уладзімір Уладзіміравіч.

Дарэчы, акрамя трактара “Універсал-2”, выкладчыкі і студэнты БДСГА ўласнымі сіламі аднавілі такія трактары-ветэраны, як Т-40 і ДТ-75. У планах адкрыццё выставы дзеючай рэтратэхнікі. Наведваць яе змогуць усе жадаючыя на бязвыплатнай аснове.

Ганна СІНЬКЕВІЧ.
Фота прадастаўлена ўстановай адукацыі.