Адстаючыя ў развіцці рэгіёны будуць вызначаць на падставе інтэгральнага паказчыка

Парадак аднясення адміністрацыйна-тэрытарыяльных адзінак да тэрыторый, якія адстаюць па ўзроўні сацыяльна-эканамічнага развіцця, вызначаны ўрадам.

Згодна з дакументам, раёны і гарады абласнога падпарадкавання вызначаюцца тэрыторыямі, якія адстаюць па ўзроўні сацыяльна-эканамічнага развіцця, на аснове разліку інтэгральнага паказчыка ўзроўню сацыяльна-эканамічнага развіцця для кожнага рэгіёна.

Інтэгральны паказчык разлічваецца для кожнага рэгіёна паэтапна, зыходзячы з прадстаўленай аблвыканкамамі інфармацыі аб аб’ёме ўласных даходаў кансалідаваных бюджэтаў раёнаў і бюджэтаў гарадоў абласнога падпарадкавання, а таксама зыхо­дзячы з афіцыйнай статыстыкі па такіх паказчыках, як сярэднегадавая колькасць насельніцтва, колькасць занятых у эканоміцы, выручка ад рэалізацыі прадукцыі, тавараў, работ, паслуг, намінальная налічаная сярэднямесячная заработная плата, рознічны тавараабарот на душу насельніцтва.

Значэнне інтэгральнага паказчыка для кожнага рэгіёна не больш за 72 працэнты з’яўляецца крытэрыем аднясення рэгіёнаў да тэрыторый, якія адстаюць па ўзроўні сацыяльна-эканамічнага развіцця.

Міністэрству эканомікі даручана ў 2019 і 2020 гадах аналізаваць узровень развіцця рэгіёнаў на падставе ўстаноўленых крытэрыяў і штогод да 15 лістапада прадстаўляць ва ўрад узгоднены з аблвыканкамамі пералік тэрыторый, якія адстаюць па ўзроўні сацыяльна-эканамічнага развіцця.