Першым спаборніцтвам для ўдзельнікаў рэгіянальнага этапу рэспубліканскага конкурсу па асновах прафесійнай падрыхтоўкі сярод школьнікаў JuniorSkills Belarus стаў “Графічны дызайн”.
У Гомельскім абласным цэнтры тэхнічнай творчасці дзяцей і моладзі расказалі, што ў абласным этапе паўдзельнічалі 30 дзяцей са Жлобінскага і Калінкавіцкага раёнаў, а таксама з Гомеля.
Конкурснае заданне складалася з распрацоўкі фірменнай сімволікі і афішы на тэму “Ноч музеяў”. Як растлумачыла галоўны эксперт кампетэнцыі Ілона Юрыс, стаўленне да работ, нягледзячы на юны ўзрост удзельнікаў, было як да работ прафесійных дызайнераў.
Па выніках трохгадзіннай працы эксперты вызначылі пераможцаў. Ва ўзроставай катэгорыі 10—13 гадоў першае месца заняла Валерыя Маханава з гімназіі № 14 Гомеля, другое і трэцяе месцы — у Ілоны Федзяй і Софіі Пляскінай з камп’ютарнай акадэміі “Крок”. Ва ўзроставай катэгорыі 14—17 гадоў лепшым стаў Віктар Крохін (Гомельскі абласны цэнтр тэхнічнай творчасці дзяцей і моладзі). На другім месцы — Вераніка Мартыненка (камп’ютарная акадэмія “Крок”). На трэцім — Ганна Гойдра (адукацыйны цэнтр праграмавання і высокіх тэхналогій ITeen Academy).
Акрамя конкурсных спаборніцтваў, дзеці наведалі ГДТУ імя П.В.Сухога, дзе пазнаёміліся з
3D-тэхналогіямі сканіравання і друку, прамысловай робататэхнікай, пабывалі ў лабараторыі інжынірынгавай і вытворчай кампаніі “МИРТЕК”.
Ірына АСТАШКЕВІЧ.