Міністэрства адукацыі далучылася да рэспубліканскай добраахвотнай грамадскай акцыі “Дай лесу новае жыццё!”, якая праходзіць у краіне па 12 красавіка. Падрабязнасці – у матэрыяле карэспандэнта “Настаўніцкай газеты”.
Сёлета яна прысвечана Году добраўпарадкавання і 80-годдзю Перамогі ў Вялікай Айчыннай вайне. Як і летась, пасадка дрэў прайшла на тэрыторыі Негарэльскага вучэбна-доследнага лясгаса, паблізу мемарыяльнага комплексу “Літавец”.
Перш чым высадзіць дрэвы, міністр адукацыі Андрэй Іванец прыняў удзел у мітынгу па ўвекавечанні памяці тых, хто загінуў у аднайменным урочышчы падчас Вялікай Айчыннай вайны.
Літавец — былая вёска на тэрыторыі Дабрынеўскага сельсавета Дзяржынскага раёна, сястра Хатыні, якую нямецка-фашысцкія захопнікі знішчылі разам з жыхарамі ў студзені 1943 года падчас карнай аперацыі “Якаб”. 14 студзеня 1943 года фашысты і паліцаі расстралялі людзей, дзяцей, немаўлят у калысках, а потым падпалілі іх жыллё. Усяго было забіта 196 чалавек. У вёсцы фашысты пакінулі цэлай школу і некалькі дамоў, але праз тыдзень зноў наведаліся сюды і спалілі тыя будынкі.
— Літаральна праз месяц будзем адзначаць 80-годдзе Вялікай Перамогі, — звярнуў увагу Андрэй Іванец. — Сёння мы знаходзімся ў вельмі знакавым і важным месцы не толькі баявой славы. Тут фашысты паказалі свой сапраўдны твар. Практычна 200 мірных нявінных жыхароў, у тым ліку 58 дзяцей, загінулі падчас карнай аперацыі. Гэта цана зверстваў, што чыніліся ў маленькім населеным пункце, у невялікай вёсачцы пасярод лесу. Мы ўжо не першы раз наведваем гэты мемарыял. Наша задача — перадаваць гэтую памяць праз пакаленні, даносіць яе нашым дзецям. З кожным годам сведкаў страшнай трагедыі становіцца ўсё менш, і толькі праз памяць пакаленняў мы зможам захаваць гістарычную памяць. Народная сцежка да такіх месцаў ніколі не павінна зарастаць.
Пасля ўскладання кветак да помніка загінуўшым прадстаўнікі Міністэрства адукацыі далучыліся да акцыі “Дай лесу новае жыццё!”. А.Іванец звярнуў увагу, што пасадка лесу ўвасабляе сабой зараджэнне новага жыцця, з’яўляецца яе сімвалам. Менавіта таму профільнае ведамства пастаянна прымае ўдзел у акцыях і мерапрыемствах, прысвечаных азеляненню, аднаўленню лясоў.
Падчас удзелу ў акцыі “Дай лесу новае жыццё!” міністр адукацыі і яго каманда аднавілі каля 4 га лесу: высадзілі 20 000 сеянцаў сасны звычайнай і 5000 саджанцаў бярозы павіслай.
Сёлета на тэрыторыі Негарэльскага вучэбна-доследнага лясгаса, які з’яўляецца базай для правядзення навуковых даследаванняў і практычнага навучання студэнтаў БДТУ, работнікі Міністэрства адукацыі высаджвалі сеянцы сасны і бярозы.
— Акцыя “Дай лесу новае жыццё!” — не адзіная форма работы з моладдзю ў плане працоўнага навучання, — падкрэсліў Андрэй Іванавіч. — У Беларусі ўдзяляецца значная ўвага фарміраванню працоўных навыкаў у дзяцей, а таксама выхаванню павагі і любові да працы, каб развіць у падрастаючага пакалення адказнасць, самастойнасць і гатоўнасць да актыўнай працоўнай дзейнасці ў будучыні.
За ўсімі ўстановамі адукацыі краіны замацаваны прамысловыя і сельскагаспадарчыя прадпрыемствы. У першую чаргу гэта зроблена для таго, каб школьнікі не толькі прывучаліся да працы, але і бачылі, чым займаецца рэальны сектар эканомікі. Такое ўзаемадзеянне з арганізацыямі — гэта не толькі працоўнае выхаванне, але і прафарыентацыя.
— Па ініцыятыве кіраўніка дзяржавы таксама ўдзельнічаем у рэспубліканскім праекце “Сады надзеі”, — дадаў Андрэй Іванец. — Свае сады і прысядзібныя ўчасткі маюць амаль 2000 школ па ўсёй краіне. Яны патрабуюць пастаяннага догляду, абнаўлення, таму мы ўсе разам працуем на карысць краіны.
Пра своечасовасць дапамогі Міністэрства адукацыі ў пасадцы дрэў сказаў галоўны ляснічы Негарэльскага вучэбна-доследнага лясгаса Аляксандр Янушкоў.
— Як толькі распускаецца лісце, пачынаюць з’яўляцца пупышкі на пасадачным матэрыяле, ён не будзе прыжывацца альбо страціць працэнт прыжывальнасці, — растлумачыў ляснічы. — А значыць, чым раней высадзім саджанцы, тым лепш. Акцыя з удзелам Міністэрства адукацыі — гэта вялікая і важная для нас дапамога. Высаджваліся дрэўцы пад меч Колесава. Гэта ручны інструмент, які ўяўляе сабой вузкую стальную лапату, якая прызначана для пасадкі сеянцаў і саджанцаў лясных культур. Усё тое, што чалавек бярэ ад прыроды, ён вяртае ёй падчас суботнікаў і мерапрыемстваў па азеляненні.
Наталля САХНО
Фота Мінадукацыі
