Актуальнай задачай застаецца праблема пакрыцця ўрону

- 11:06Інфармацыйная гадзіна

У Беларусі замацоўваецца тэндэнцыя па зніжэнні колькасці цяжкіх злачынстваў. Аб гэтым паведаміў генеральны пракурор Аляксандр Канюк.

Аляксандр Канюк прыняў удзел у пасяджэнні падагульняючай калегіі пракуратуры Гродзенскай вобласці.

“Мы канстатуем зніжэнне злачыннасці. Важна, што знізілася перш за ўсё колькасць цяжкіх і асабліва цяжкіх злачынстваў, забойстваў, замахаў на забойства”, — сказаў Аляксандр Канюк. Тэндэнцыя па зніжэнні колькасці злачынстваў адзначаецца як у цэлым па краіне, так і ў Гродзенскай вобласці. У рэгіёне ў 2017 годзе ўзбуджана на 8,8 працэнта менш крымінальных спраў у параўнанні з 2016 годам (8,4 тысячы супраць 9,2 тысячы). Адзначаецца зніжэнне рэцыдыўнай, групавой злачыннасці, а таксама злачынстваў, учыненых у стане алкагольнага ап’янення і ў грамадскіх месцах. Знізілася колькасць крадзяжоў, рабаванняў, разбояў, выкраданняў і вымаганняў.

Генеральны пракурор падкрэсліў, што павелічэнне колькасці выяўленых карупцыйных правапарушэнняў і злачынстваў звязана перш за ўсё з больш актыўнымі дзеяннямі праваахоўных органаў па іх выяўленні: пракуратуры, КДБ, МУС, Дэпартамента фінансавых расследаванняў.

Паводле слоў Аляксандра Канюка, адной з найбольш актуальных задач застаецца праблема пакрыцця ўрону. “У цэнтры ўвагі як знешняя дэбіторская запазычанасць, так і пакрыццё страты па крымінальных справах і іншых напрамках. У Генпракуратуры і на месцах створаны спецыяльныя падраздзяленні, якія займаюцца пракурорскім наглядам за органамі прымусовага выканання”, — адзначыў ён.

Перад супрацоўнікамі пракуратуры былі пастаўлены і іншыя задачы. “У прыватнасці, ёсць праблема фармалізму. Я акцэнтую ўвагу пракурораў раёнаў і абласцей на тым, што ім менш трэба займацца нарадамі і пісаць паперы, а больш бываць на месцах, глядзець, як жывуць людзі”, — заявіў генеральны пракурор. Ён дадаў, што пракуроры таксама часцей павінны бываць на прадпрыемствах, у сельгасарганізацыях.