Каб адчуць настрой маладых людзей, пачуць іх ідэі па ўдасканаленні маладзёжнай палітыкі, адказаць на тыя пытанні, якія іх хвалююць, у Оршы прайшоў адкрыты дыялог моладзі з міністрам адукацыі Рэспублікі Беларусь Ігарам Карпенкам, а таксама са старшынёй Аршанскага райвыканкама Ігарам Ісачанкам, намеснікам старшыні Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Нацыянальнага сходу Рэспублікі Беларусь Валянцінай Курсевіч, першым сакратаром Цэнтральнага камітэта БРСМ Дзмітрыем Варанюком.
З маладзёжнага боку да размовы былі запрошаны маладзёжныя лідары нашай краіны — маладзёжныя паслы Мэт устойлівага развіцця, прадстаўнікі маладзёжных парламентаў, члены Рэспубліканскага студэнцкага савета, прадстаўнікі грамадскіх аб’яднанняў і інш.
Спектр пытанняў, якія хвалююць моладзь, аказаўся даволі шырокім: ад ідэй аднаўлення гарадскіх паркаў да пасадкі парку сямейных дрэў, дзе кожная маладая сям’я зможа пасадзіць сваё дрэва; ад пашырэння міжнароднага супрацоўніцтва сярод студэнтаў да канкрэтных шляхоў дасягнення Мэт устойлівага развіцця. Актуальным аказалася і пытанне павелічэння ясляў для дзяцей маладых мам, якія хочуць выйсці на работу раней.
Прагучалі ідэі яшчэ большай папулярызацыі здаровага ладу жыцця, заняткаў спортам, у тым ліку і далучэнне да рэспубліканскіх спаборніцтваў працоўнай моладзі, што міністр адукацыі з задавальненнем падтрымаў: “Я толькі “за”. Мы заўсёды выступалі за садружнасць студэнтаў і працоўнай моладзі. У многім гэтаму спрыяе і тое, што сёння студэнты з першага курса практыкуюцца на прадпрыемствах. Магчыма, спартыўнае аб’яднанне гэтаму паспрыяе яшчэ больш”.
На прапанову студэнтаў змяніць стары фармат некаторых рэспубліканскіх маладзёжных праектаў Дзмітрый Варанюк адказаў таксама прапановай: “Мы час ад часу гэта робім, але неактуальны праект павінен быць заменены яго актуальнай альтэрнатывай. Прапаноўвайце! Мы заўсёды гатовы да вас прыслухацца”.
Пра адзін з прыкладаў выніку такой нядаўняй прадметнай размовы Дзмітрый Варанюк расказаў, анансаваўшы новы праект “Бітва ўнівераў”, які прапанавалі самі студэнты і які плануецца рэалізоўваць з восені пры падтрымцы тэлеканалаў. Удзельнікамі шоу стануць усе УВА краіны. Усе яны будуць выстаўляць сваю каманду ў розных кірунках — ад спорту да творчасці — і выяўляць пераможцу.
В.В.Курсевіч анансавала тое, што абмяркоўваецца пытанне стварэння маладзёжнай палаты пры Парламенце Рэспублікі Беларусь, якая будзе займацца заканадаўчай дзейнасцю нароўні з членамі парламента і адстойваць інтарэсы нашай моладзі. Плануецца, што гэта будзе моладзь ад 18 да 25 гадоў (па 5 чалавек ад кожнай вобласці і Мінска).
Святлану Шылко, студэнтку БДПУ, маладзёжнага пасла ўстойлівага развіцця, хвалюе выхаванне экалагічна свядомай асобы. У прыватнасці, яна ўпэўнена, што прасцей выхоўваць маленькага чалавека, чым перавыхаваць дарослага. І таму прапанавала ўнесці карэкціроўкі ў праграму дашкольнай адукацыі з улікам самых важных аспектаў, у прыватнасці, асобнага збору смецця. На што І.В.Карпенка сказаў: “Тут галоўную ролю павінны адыгрываць не дакумент, не праграма, не ўвядзенне асобных прадметаў, а толькі асабістая зацікаўленасць педагога і яго ўменне інтэрпрэтаваць існуючую праграму, у якой, дарэчы, экалагічнае выхаванне мае значнае месца. І, канечне, уласная адказнасць самога дзіцяці. Вось вам прыклад: на ўроку “Асновы бяспечнай жыццядзейнасці” дзеці ля дошкі дакладна ведаюць, як пераходзіць дарогу (перш чым ступіць на яе, трэба ўпэўніцца ў адсутнасці машын), ведаюць тармазны шлях машыны і г.д. А што мы бачым на вуліцах? У вушах у дзяцей — навушнікі, на твары насунуты капелюшы. Хіба можна ўбачыць так сігнал святлафора? Гэта ўжо ад майстэрства вадзіцеля залежыць, ці паспее машына затармазіць. Я гэта гавару да таго, што не ўсё павінна рашацца праграмай. Гэта вырашаюць жыццёвы вопыт, слова педагога, яго асоба”.
Шмат пытанняў тычылася змяненняў правіл і падыходаў да прыёмнай кампаніі ў гэтым годзе. Ігар Васільевіч супакоіў прысутных: сёлета ніякіх сур’ёзных змяненняў не будзе.
Прагучала пытанне незалежнай атэстацыі пасля сярэдняй школы. Абмяркоўвалася і трывожная тэндэнцыя пераходу ад падтрымліваючых заняткаў у школе да індывідуальных заняткаў у рэпетытараў. Па меркаванні міністра, у многім гэта абумоўлена рознасцю іспытаў пасля школы і падчас паступлення ва УВА: “Пагадзіцеся, калі 11-класнік на выпускных экзаменах піша па рускай ці беларускай мове пераказ, а пры паступленні здае тэст, то па сваёй форме экзамены не суадносяцца адзін з адным. Таму і атрымліваецца, што настаўнік зацікаўлены ў тым, каб падрыхтаваць вас добра напісаць пераказ. А хто павінен рыхтаваць да паступлення? У лепшым выпадку вам прапануюць платныя заняткі ў школе. А ў горшым — адправяць да рэпетытара. Таму мы будзем шукаць сярэдні варыянт, каб наблізіць экзамены — і выпускныя, і ўступныя — да адной формы. Як гэта будзе, пакуль не вырашана. Але не хвалюйцеся, громам сярод яснага неба гэтае новаўвядзенне не будзе. Пра любыя новаўвядзенні вы даведаецеся як мінімум за год ці за два да іх увядзення, каб вы паспелі грунтоўна падрыхтавацца”.
Святлана НІКІФАРАВА.
Фота Таццяны БОНДАРАВАЙ.