Аляксандр ЛУКАШЭНКА: “Будаваць мы нашы саюзныя адносіны павінны выключна на раўнапраўнай аснове”

Беларуская зямля заўсёды была блізкай і роднай для рускага чалавека, такой і застанецца. Пра гэта Прэзідэнт Беларусі Аляксандр Лукашэнка заявіў на сустрэчы са старшынёй урада Расіі Міхаілам Мішусціным.

“Што датычыцца нашых адносін, вы павінны ведаць, што мы нікуды не збіраемся, як некаторыя спрабуюць прадставіць Беларусь. Мы знаходзімся на гэтым кавалку зямлі. Яна заўсёды была блізкай і роднай для рускага чалавека, расіяніна. І застанецца заў­сёды такой, нават калі мы з вамі не захочам. Народы без нас разбяруцца, як ім жыць. Але хацелася б, каб і мы пры гэтым працэсе прысутнічалі”, — падкрэсліў беларускі лідар.

Аляксандр Лукашэнка адзначыў, што беларускі бок, вядома ж, настойвае на тым, каб усе дамоўленасці выконваліся. “І з нашага боку ёсць спіс, і з расійскага. Каб мы выконвалі гэтыя дамоўленасці. І будаваць мы нашы саюзныя адносіны павінны выключна на раўнапраўнай аснове. Я як гісторык добра разумею і вывучаў гэтую тэму вельмі ўважліва. Саюзы, пабудаваныя не на раўнапраўнай аснове, не існуюць доўга”, — звярнуў увагу прэзідэнт.

“Ну і час змяніўся. Сёння ж немагчыма, як у сярэднія вякі, захапіць якую-небудзь краіну і падпарадкаваць на 100—150 гадоў. Сітуацыя іншая. Ды і не трэба. І ў Расіі сваіх зямель хапае, калі гаварыць пра Расію. Але калі нехта мысліць за межамі нашай краіны з другога боку такімі рэчамі і паняццямі, я думаю, жыццё яго недаўгавечнае, — адзначыў беларускі лідар. — Мы яшчэ з вамі пагаворым сам-насам, абмяняемся некаторымі думкамі і пытаннямі. Я вам раскажу пра тое, што адбываецца ў нас цяпер у гэты электаральны перыяд. Вельмі дзіўныя рэчы адбываюцца. Іншым разам я пачынаю доўга думаць, зыходзячы са свайго вопыту, адкуль гэта бярэцца. А вось, усялякае здараецца. Таму я вам потым раскажу пра гэта”.

Аляксандр Лукашэнка таксама перадаў добрыя пажаданні і прывітанне Прэзідэнту Расіі Ула­дзіміру Пуціну. “Мы яго чакаем пасля сустрэчы кіраўнікоў урадаў на вочную сустрэчу ўжо ў Мінску ў рамках ЕАЭС”, — сказаў ён.

Прэзідэнт Беларусі Аляксандр Лукашэнка, звяртаючыся да старшыні ўрада Расіі Міхаіла Мішусціна, выказаў думку, што Расія павінна быць лакаматывам працэсаў, асабліва эканамічных, на постсавецкай прасторы.

“Такі лёс Расійскай Федэрацыі”, — сказаў прэзідэнт.

Аляксандр Лукашэнка адзначыў, што ўдзельнікам праведзенага ў Мінску пасяджэння Еўразійскага міжурадавага савета, і асабліва расійскаму прэм’еру, давялося ў гэты дзень папрацавац­ь. “Таму што многія пытанні завязаны на Расійскую Федэрацыю. Вы — чалавек, новы на гэтай пасадзе (прэм’ер-міністра Расіі. — Заўв. БелТА.), і адказны чалавек, вам даводзілася на ўсё рэагаваць. У вас яшчэ няма гэтай шчыгрынавай скуры, калі можна нешта прапусціць міма вушэй. Таму на вас гэта навалілася вельмі сур’ёзна. І па Ніколу Ваваевічу Пашыняну (прэмер-міністр Арменіі, з якім Аляксандр Лукашэнка сустрэўся раней 17 ліпеня. — Заўв. БелТА.) зразумеў, што вам хапіла сёння”, — заўважыў кіраўнік дзяржавы.

“Вы для нас не чужы чалавек. І па нараджэнні. Карані недзе ў цэнтры Еўропы. У нас у Полацку геаграфічны цэнтр Еўропы. І вызначылі ўпершыню гэты цэнтр расійскія вучоныя з нашымі (у савецкі яшчэ час). Таму вы нам чалавек не чужы і па нараджэнні, і вы нам чалавек не чужы, паколькі прадстаўляеце блізкую, братэрскую нам Расійскую Федэрацыю, — падкрэсліў беларускі лідар. — Вы ў нас не госць, вы — дома. Гэта галоўнае. Я прашу гэта мець на ўвазе. Гэта не нейкая дыпламатычная заява. Мы сапраўды так лічым”.