Найбольш актуальныя пытанні сацыяльна-эканамічнага развіцця рэгіёнаў краіны былі вынесены на нараду ў Прэзідэнта Беларусі Аляксандра Лукашэнкі.
У ліку ўдзельнікаў — кіраўніцтва ўрада, Нацыянальнага сходу, Адміністрацыі прэзідэнта, Дзяржаўнага сакратарыята Савета бяспекі, Кіраўніцтва справамі прэзідэнта і Камітэта дзяржкантролю, абласцей і Мінска, памочнікі кіраўніка дзяржавы ў рэгіёнах.
Аляксандр Лукашэнка нагадаў, што апошнім часам праведзены маштабныя мерапрыемствы, на якіх разгледжаны стан спраў і пастаўлены першачарговыя задачы для розных сфер эканомікі. Абмеркаваны пытанні жыллёва-камунальнай гаспадаркі, аграпрамысловага комплексу і будаўніцтва — галіны, якія шмат у чым вызначаюць стан беларускай эканомікі, а таксама яе магчымасці вырашаць сацыяльныя задачы.
Акрамя таго, падпісаны тры дырэктывы — дарожныя карты для АПК, будаўніцтва і ЖКГ. Яны ўстанаўліваюць сістэмныя задачы і неабходныя для іх вырашэння інструменты.
Намечаны шляхі ўдасканалення сістэмы адукацыі і перспектывы беларускай навукі.
“Вызначаны дакладныя этапы паскарэння развіцця рэгіёнаў. Мы дамовіліся на працягу двух гадоў забяспечыць паскоранае сацыяльна-эканамічнае развіццё адразу 11 буйных гарадоў. Сёння перад урадам і губернатарамі стаіць задача забяспечыць рэалізацыю ўсіх прынятых рашэнняў, планаў і дырэктыў на месцах. Агульная мэта гэтых праграмных рашэнняў — дасягненне дастойнага ўзроўню і якасці жыцця нашых грамадзян. Фундамент паспяховага развіцця дзяржавы — моцная эканоміка, таму перш за ўсё неабходна развіваць эканоміку рэгіёнаў, ствараць там рабочыя месцы з дастойным узроўнем зарплаты”, — падкрэсліў кіраўнік дзяржавы.
Перад губернатарамі Аляксандр Лукашэнка паставіў пытанні “Што перашкаджае безумоўна выконваць пастаўленыя задачы?”, “Якія фактары перашкаджаюць развіццю рэгіёнаў?”, “Што неабходна зрабіць для іх эфектыўнага і збалансаванага развіцця ў доўгатэрміновай перспектыве?”, “Як плануецца скарачаць рэгіянальныя адрозненні ва ўзроўні і якасці жыцця насельніцтва?”.
Пра выкананне планаў
Прэзідэнт канстатаваў, што пераважная большасць абласцей у мінулым годзе не дасягнула планавых лічбаў па валавым рэгіянальным прадукце і прадуктыўнасці працы. Ёсць праблемы і ў частцы выканання заданняў па экспарце тавараў, прыцягненні прамых замежных інвестыцый. Больш за тое, ніхто не знізіў узровень затрат на вытворчасць і рэалізацыю прадукцыі. “Асноўныя паказчыкі эфектыўнасці правалены. У гэтым годзе яшчэ не ўсе губернатары забяспечваюць выкананне тых планаў, якія мы намецілі”, — звярнуў увагу Аляксандр Лукашэнка.
Аднак кіраўнік дзяржавы падкрэсліў, што важны не столькі аб’ём вытворчасці, колькі яе эфектыўнасць і — канчатковы вынік — прыбытак і рэнтабельнасць.
Пра работу з інвестарамі
Прэзідэнт звярнуў увагу на той факт, што пакуль не выбудавана сістэмная работа з інвестарамі. Паводле яго слоў, тут важны індывідуальны падыход без валакіты і бюракратызму.
Асабліва кіраўнік дзяржавы адзначыў работу з кітайскімі партнёрамі. У гэтым плане на рэгіянальным узроўні падпісаны пагадненні з правінцыямі і гарадамі КНР.
“Дзе праекты і інвестыцыі? Нават па існуючых інвестпраектах работа вядзецца няякасна, не выконваюцца тэрміны рэалізацыі, аддача ад іх вельмі нізкая”, — сказаў прэзідэнт.
Аляксандр Лукашэнка ў плане інвестыцый засяродзіў увагу на важнасці не колькасных, а якасных паказчыкаў. У першую чаргу патрэбны вытворчасці заўтрашняга дня, новыя тавары і тэхналогіі, запатрабаваная на рынку прадукцыя.
“Інвестыцыі не дзеля інвестыцый. Інвестыцыі павінны быць такія, якія пакідаюць нешта ў краіне. Да нас шмат прыходзіць інвестараў, якія просяць поўнае вызваленне ад падаткаў, сацыяльных абавязацельстваў і іншага. Яшчэ і зарплату плацяць мізэрную, — заўважыў беларускі лідар. — Настаў той перыяд, калі інвестар павінен прыходзіць у краіну і працаваць на агульных умовах. Ільготы толькі тым, у кім мы жыццёва зацікаўлены”.
Пра якасць рабочых месцаў
Прэзідэнт канстатаваў, што большасць рабочых месцаў, якія ствараюцца ў краіне, не адносіцца да высокапрадукцыйных і прадугледжвае нізкую кваліфікацыю работнікаў і невысокі ўзровень заработнай платы.
Таму і ў гэтым пытанні кіраўнік дзяржавы робіць акцэнт на якасці — стварэнні экспартна арыентаванай і імпартазамяшчальнай прадукцыі з высокай дабаўленай вартасцю, што ў сваю чаргу паўплывае на даходы работнікаў.
У гэтым жа рэчышчы актуалізавана задача па стварэнні ў раёнах і гарадах умоў і стымулаў для прыцягнення працоўных рэсурсаў пад патрэбнасць эканомікі рэгіёнаў.
Пра зарплаты
Аляксандр Лукашэнка не пакінуў убаку і тэму зарплат. Пакуль патрабаванні кіраўніка дзяржавы па забеспячэнні росту зарплаты не выконваюцца ў поўным аб’ёме. Больш за тое, ёсць факты нясвоечасовых выплат, за што раней пайшлі спагнанні на ўзроўні кіраўніцтва рэгіёнаў.
“Вы ведаеце, што тэма занятасці і своечасовай выплаты зарплат — пад маім асаблівым кантролем. І сваіх жорсткіх установак у гэтым пытанні мяняць я не маю намеру”, — падкрэсліў беларускі лідар.
Пра будаўнічы комплекс
У будаўнічым комплексе, паводле слоў кіраўніка дзяржавы, не забяспечваецца апераджальнае развіццё інжынернай і транспартнай інфраструктуры, а таксама стварэнне аб’ектаў сацыяльнай сферы. Напрыклад, у Бараўлянах у дзіцячых дашкольных установах сёння дэфіцыт месцаў.
“Па-ранейшаму адзначаюцца факты самавольнага будаўніцтва, аб якіх мясцовая ўлада, здаецца, даведваецца толькі са сродкаў масавай інфармацыі, — заўважыў прэзідэнт. — Наогул жа, я сумняваюся, што гэта самая мясцовая ўлада аб гэтым не ведала да таго, як у СМІ гэта прагучала. Але вы самі выбіраеце свой шлях. Глядзіце”.
Пра сельскую гаспадарку
Ад сферы сельскай гаспадаркі, як і па іншых напрамках, Аляксандр Лукашэнка патрабуе самай строгай дыктатуры тэхналогіі і вытворчай дысцыпліны, выканання рэгламентаў і нарматываў. “Ніхто нікога ўгаворваць больш не будзе”, — падкрэсліў ён.
“Правалаў у гэтым годзе быць не павінна. І хопіць усе свае пралікі спісваць на надвор’е. У нас дастаткова сіл і сродкаў для таго, каб пасеяць у любое надвор’е. Гаспадаркі павінны быць забяспечаны тэхнікай, палівам, мінеральнымі ўгнаеннямі і насеннем”, — заявіў кіраўнік дзяржавы.
Аляксандр Лукашэнка звярнуў увагу і на ролю ўрада ў пытанні мабілізацыі сродкаў. Перад кіраўніцтвам урада пастаўлена задача на працягу тыдня вырашыць усе пытанні, якія ад яго залежаць, у плане забеспячэння пасяўной кампаніі.
“Але больш за ўсё мяне непакоіць і насцярожвае тое, што месцамі пры правядзенні палявых работ няма элементарнага парадку. Рэгіёны вельмі дрэнна падрыхтаваны да гэтай кампаніі. Бачыце, вясна рана прыйшла, не разварушыліся”, — заявіў кіраўнік дзяржавы.
Прэзідэнт нагадаў аб сітуацыі, якая выявілася ў час яго нядаўняй рабочай паездкі ў Магілёўскую вобласць: “У некаторых гаспадарках у перыяд асноўных работ трактароў і камбайнаў пад плотам не менш, чым у полі. Як гэта выглядае ў жыцці, вы таксама бачылі ў “Купалаўскім”, і як захоўваецца вельмі дарагая тэхніка”.
Пра азеляненне і навядзенне парадку
“Безгаспадарчасць ваша недапушчальна. Бягучы год — год навядзення парадку, каб наша Беларусь уся была ў кветках і зеляніне. Краіна павінна быць прыгожай”, — падкрэсліў кіраўнік дзяржавы.
Ён, напрыклад, нагадаў аб задачах па стварэнні насаджэнняў уздоўж дарог. “Гэта ж практычна. Менш трэба будзе абкошваць прыдарожныя палосы. Але воз і цяпер там. Запатрабую з кожнага памочніка па абласцях і Мінску”, — папярэдзіў прэзідэнт.
Пастаўлены задачы па азеляненні як буйных, так і малых населеных пунктаў з прыцягненнем да гэтых работ мясцовых жыхароў.
“Гэта (падтрыманне парадку. — Заўв.БелТА.) наша візітная картка. І вам трэба навесці парадак раз і назаўсёды. Тады людзі будуць разумець, які парадак павінен быць і як яго падтрымліваць”, — падкрэсліў Аляксандр Лукашэнка.
Пра вынікі
Нарада прадаўжалася амаль дзве з паловай гадзіны. Былі падрабязна абмеркаваны розныя пытанні ў сферы рэгіянальнага развіцця, а кіраўніком дзяржавы дадзены даручэнні. Пастаўлены канкрэтныя задачы і вызначаны шляхі вырашэння тых ці іншых праблемных момантаў.
Адной з галоўных тэм стала сітуацыя ў сельскай гаспадарцы, у прыватнасці, ход пасяўной кампаніі. Аб ім падрабязна далажылі кіраўнікі рэгіёнаў. Абмеркаваны пытанні забяспечанасці палівам, мінеральнымі ўгнаеннямі, фінансавання. Тут адказнасць на ўрадзе, якому неабходна аператыўна вырашаць праблемы, што ўзнікаюць, ва ўзаемадзеянні з губернатарамі.
У цэлым было адзначана, што на ўзроўні ўрада ўсе неабходныя ў маштабах краіны рашэнні па забеспячэнні якаснага правядзення веснавых палявых работ прыняты, аднак прэзідэнт патрабуе і строгага кантролю выканання пастаўленых задач.
Чарговы раз гучала тэма навядзення парадку, падтрымання дысцыпліны, дакладнага прытрымлівання ўсіх тэхналагічных працэсаў на вытворчасці. Пакуль жа размовы і абяцанні на розных узроўнях часам пераважаюць над практычнай работай у гэтым напрамку.
Абмяркоўвалася і праблематыка стварэння новых рабочых месцаў, узроўню заработнай платы і забеспячэння своечасовасці яе выплаты. У тым ліку размова ішла аб стратных арганізацыях, іх далейшым функцыянаванні
і знаходжанні шляхоў па вывядзенні іх на ўстойлівую работу. Пры гэтым падкрэслена недапушчальнасць прыпісак і ашуканства.
Галоўная мэта, якую ставіць Аляксандр Лукашэнка перад органамі ўлады, — згладзіць разрывы ва ўзроўні і якасці жыцця па ўсёй краіне.
У цэлым патрабаванні кіраўніка дзяржавы простыя і зразумелыя: тое, за што адказвае ўлада на розных узроўнях, павінна быць зроблена, але значная частка адказнасці ляжыць і на саміх
работніках, кіраўніках нізавога звяна. Паколькі падтрыманне вытворчай дысцыпліны і парадку садзейнічае паляпшэнню фінансава-эканамічных паказчыкаў прадпрыемстваў, што ўплывае непасрэдна на якасць і ўзровень жыцця.
Асобна прэзідэнт звярнуў увагу на перспектывы развіцця прадпрыемстваў, пошук і ўкараненне новых напрамкаў работы. Разам з рэалізацыяй задач па імпартазамяшчэнні гэта павінна садзейнічаць эканамічнаму развіццю і стварэнню новых высокапрадукцыйных рабочых месцаў.
Падрабязнасцямі нарады з журналістамі падзяліліся і некаторыя яе ўдзельнікі. Напрыклад, старшыня Мінаблвыканкама Анатоль Ісачанка апісаў гэтую нараду як зрэз выканання пастаўленых раней задач. “Была звернута ўвага на тое, што мы не зрабілі і што не атрымліваецца. Вядома, прыязджаючы на месца, мы робім усё, каб выканаць пастаўленыя задачы, — сказаў ён. — Пытанні заўсёды ёсць, але яны вырашаюцца на месцах, вырашаюцца спецыялістамі, сумесна з урадам. Невырашальных і глабальных пытанняў проста няма”.
“Асаблівасць гэтага года — ранняя вясна. Вельмі сухое надвор’е. Таму трэба паспець своечасова ўсё зрабіць. Сяўба ранніх яравых збожжавых ужо напалову завершана. Але адчуваецца няхватка па асобных пазіцыях. Абмеркавалі на нарадзе ў тым ліку пытанні забеспячэння палівам, знойдзены рашэнні. Думаю, гэта ўсё пасадзейнічае, каб у аптымальныя тэрміны правесці сяўбу”, — расказаў губернатар Гродзенскай вобласці Уладзімір Краўцоў.
Паводле яго слоў, прэзідэнт яшчэ раз нагадаў аб тым, каб разам з традыцыйнымі культурамі ў сельскай гаспадарцы знаходзілі месца і новыя напрамкі. “Ёсць неабходнасць вырабляць нешта новае. Тым больш клімат мяняецца. І вінаград, і кавуны… Як бы хто скептычна ні ставіўся, але ў нас сёння ёсць прыклады, калі сапраўды вырошчваюць добрыя прадукты”, — сказаў старшыня Гродзенскага аблвыканкама. У гэтым напрамку ў вобласці ў тым ліку паспяхова супрацоўнічаюць з замежнымі кампаніямі, прыватнымі інвестарамі.
Па матэрыялах БелТА.
