Аляксандр ЛУКАШЭНКА: “Патрэбны прапановы, якія сёння і заўтра дадуць магчымасць нашым людзям нармальна жыць”

Прэзідэнт Беларусі Аляксандр Лукашэнка патрабуе выканання ў поўным аб’ёме запланаваных у 2015 годзе паказчыкаў. Такую задачу ён паставіў перад урадам, прымаючы з дакладам прэм’ер-міністра краіны Андрэя Кабякова.

“Мае зямныя патрабаванні да ўрада ў тым, каб мы ўсё ж такі выканалі тое, што паставілі перад сабой у гэтым годзе”, — падкрэсліў Аляксандр Лукашэнка.
“Я разумею — складанасці і цяжкасці. Але лічыце, што ў нас ідзе ў эканоміцы вайна, ваеннае становішча. І мы павінны зрабіць усё для таго, каб вось у гэтых ваенных эканамічных умовах выканаць тыя задачы, якія перад сабой паставілі. Мы павінны іх вырашыць у гэтым годзе”, — заявіў прэзідэнт.
Кіраўнік дзяржавы запатрабаваў далажыць, як вырашаецца гэтая задача ва ўрадзе.
“Трэба абавязкова вырашыць тое, аб чым я гавару. Зямное, — адзначыў Аляксандр Лукашэнка. — Людзі ж не патрабуюць ад нас штосьці незвычайнае! Яны разумеюць, што мы працэнтаў на 80 трапілі ў гэты крызісны перыяд не па сваёй волі. Не мы таму віной”.
“Але вылазіць з гэтага, напружваючыся да неймавернасці, давядзецца нам. Нікуды ад гэтага не дзенешся. Чакаць, што будуць лепшыя часы ў нашых суседзяў, на нашых рынках, не даводзіцца. Вы бачыце, як развіваюцца падзеі. Таму давядзецца ісці, праломваючыся, канкурыруючы, на іншыя рынкі. Гэта задача кожнага”, — падкрэсліў прэзідэнт.
Аляксандр Лукашэнка адзначыў, што ў найбліжэйшым будучым будуць абмеркаваны стратэгічныя пытанні па развіцці краіны на наступную пяцігодку.
“Не хачу папракнуць цяперашні ўрад у гэтым, але ў нас склалася практыка: калі нешта не атрымліваецца, значыць, трэба прэзідэнту або грамадству падсунуць нейкія вялікія крокі ў будучыню, крокі не заўтрашняга дня (я ўжо не гавару пра сённяшні), а нейкай аддаленай перспектывы. І калі я знаёмлюся з такімі канцэптуальнымі рэчамі для нашай краіны, заўсёды думаю аб тым, хто ж будзе выконваць тое, што мы сёння вызначым”, — адзначыў кіраўнік дзяржавы.
“Па-другое, людзям трэба жыць не толькі заўтра, гэта, зразумела, вельмі важна, але людзі жывуць сёння. І мы павінны забяспечыць усё неабходнае для таго, каб людзі жылі нармальна”, — падкрэсліў прэзідэнт. Ён звярнуў увагу на тое, што гэта не перадвыбарная рыторыка. “Мне ў гэтай рыторыцы, калі ўжо казаць шчыра, неабходнасці няма. І я на гэта не арыентуюся”, — сказаў кіраўнік дзяржавы.
Аляксандр Лукашэнка звярнуў увагу на тое, што ў Беларусі вызначаны прыземленыя задачы для эканомікі. “Першая задача — гэта прадаваць тое, што мы вырабляем. І ні ў якім разе не на склад, ні ў якім разе не вывозіць некуды пад адказнае захоўванне. Я гэта кантралюю цяпер нават з дапамогай спецслужбаў”, — адзначыў прэзідэнт.
“Я вымушаны гэта рабіць, таму што ў нашага ўрада, асобных яго членаў і ў чыноўнікаў з’явілася такое, ведаеце, жаданне штосьці схаваць. І потым далажыць: “Глядзіце, мы вырабілі”. Добра. Але галоўнае, куды прадалі? І нават не гэта галоўнае — прадавайце, куды хочаце. Грошы, дзе грошы? Вось гэта галоўнае!” — падкрэсліў кіраўнік дзяржавы.
Аляксандр Лукашэнка адзначыў, што гэтую праблему трэба вырашыць у бягучым годзе. “Трэба выйсці на вырашэнне задач, якія мы з вамі перад сабой паставілі, і вырашаць вось гэтыя зямныя задачы. Захаваць працоўныя калектывы. Я вельмі добра бачу, як некаторыя кіраўнікі сябе паводзяць, забываючы аб тым, што заўтра самі будуць і пенсіянерамі, і людзьмі, якіх трэба будзе, можа, абараняць. Таму трэба гэта бачыць і зыходзіць па-чалавечы з гэтага”, — сказаў беларускі лідар.
“І самае галоўнае, калі ўжо гаварыць аб канцэптуальных вашых прапановах, — я не хачу стварыць такое буржуазнае або буржуазна-дэмакратычнае грамадства, дзе будзе прорва паміж багатымі — чытай, нашымі бізнесменамі, прадпрымальнікамі, можа, нейкімі чынушамі і гэтак далей — і звычайным народам. Вось гэтая прорва абавязкова прывядзе да скандалу як мінімум. А як максімум — і мы гэта праходзілі ўжо — да рэвалюцый. Дэстабілізавана будзе грамадства, і, можа, мы яшчэ раней і хутчэй паўторым украінскі варыянт. Можа, без знешняга ўмяшання”, — адзначыў кіраўнік дзяржавы.
Ён перасцярог урад ад з’яўлення прапаноў, адарваных ад жыцця, далёкіх ад выканання. “Нам патрэбны прапановы, якія сёння і заўтра дадуць магчымасць нашым людзям нармальна жыць”, — падкрэсліў прэзідэнт.
“Я глыбока не ўнікаў у гэтыя праблемы, але бачыў, што многія дзяржавы гэта перажывалі, і бачу наступствы такіх рэформ. У нас таксама ў некаторых сверб, у часткі нашага грамадства: вось не атрымліваецца, патрэбны нейкія змены. Тыпу 1 млн рабочых месцаў. Праўда, ніхто не думае аб тым, што рабочыя месцы патрэбны з заўтрашняга дня, каб прадаць прадукцыю. Ды і дзе мы возьмем гэты мільён чалавек пад мільён рабочых месцаў? Ведаеце, папулісцкія такія вось лозунгі. Па-другое, каб стварыць мільён рабочых месцаў, трэба $10 млрд, а можа, нават больш. Гэта павінны быць месцы, якія дадуць добрую прадукцыю”, — сказаў Аляксандр Лукашэнка.
Як заявіў пасля сустрэчы з прэзідэнтам журналістам прэм’ер-міністр Андрэй Кабякоў, рэальная зарплата ў Беларусі па выніках бягучага года будзе не ніжэйшай за мінулагодні ўзровень.
Андрэй Кабякоў канстатаваў, што рэальная зарплата пакуль ніжэйшая за ўзровень 2014 года. “З іншага боку, выразна абазначылася тэндэнцыя па скарачэнні гэтага адставання. Калі на пачатак года рэальная зарплата складала каля 96 працэнтаў, то цяпер ужо 98 працэнтаў. Мы разлічваем, што па выніках яна будзе не ніжэйшай за 100 працэнтаў”, — адзначыў ён.
Для гэтага, нягледзячы на няпростыя з’явы ў сусветнай і ўнутранай эканоміцы, ёсць падставы, дадаў ён. Так, у Беларусі склаўся значны прафіцыт бюджэту, сальда знешняга гандлю таварамі і паслугамі па выніках пяці месяцаў было дадатным і склала $675 млн.
Галоўнай задачай урада ў другім паўгоддзі будзе аднаўленне эканамічнага росту, заявіў прэм’ер-міністр Андрэй Кабякоў.
Андрэй Кабякоў удакладніў, што многае будзе залежаць ад знешніх фактараў, умоў знешняга гандлю. Калі яны будуць не горшыя, чым ужо існуючыя, то ва ўрадзе чакаюць прыкметнага ажыўлення эканомікі, яе адаптацыі да знешніх фактараў. “Мы разлічваем, што будзе атрыманы хоць і невялікі, але эканамічны рост”, — сказаў прэм’ер-міністр.
“Размова не ідзе аб тым, што мы будзем разганяць эканамічны рост за кошт павелічэння ўнутранага попыту. Мы будзем нарошчваць экспарт у рэгіёны, у якіх будуць запатрабаваны нашы тавары”, — удакладніў Андрэй Кабякоў. Гэтая задача таксама будзе выконвацца дзякуючы рэалізацыі інвестыцыйных праектаў, у тым ліку тых, якія фінансуюцца за кошт замежных крэдытных ліній.