Беларусь і Узбекістан за два гады змаглі поўнасцю абнавіць свае адносіны. Аб гэтым Прэзідэнт Беларусі Аляксандр Лукашэнка заявіў на перагаворах з Прэзідэнтам Узбекістана Шаўкатам Мірзіёевым у вузкім фармаце.

“Няма неабходнасці гаварыць пра тое, як мы чакалі вас. Літаральна за апошнія два гады мы з вамі поўнасцю перавярнулі нашы адносіны. Наогул, не было чаго пераварочваць, трэба было нанава іх ствараць. І за два гады мы зрабілі, на шчасце, значна больш, чым за папярэднія двац­цаць пяць гадоў нашых адносін”, — сказаў Аляксандр Лукашэнка.

У той жа час прэзідэнт падкрэсліў, што тавараабарот паміж краінамі (амаль $160 млн за 2018 год) не адпавядае існуючаму патэнцыялу. Беларусь і Узбекістан, як упэўнены ён, валодаюць значна большымі магчымасцямі.

Аляксандр Лукашэнка адзначыў, што фішкай візіту Прэзідэнта Узбекістана ў Беларусь стала развіццё міжрэгіянальнага супрацоўніцтва. Бакі ажыццявілі шмат узаемных візітаў на рэгіянальным узроўні, арганізавалі форум, выставу узбекскай прадукцыі, Дні культуры Узбекістана. Акрамя таго, перад візітам узбе­кскага лідара ў Мінску быў устаноўлены бюст паэта, дзяржаўнага дзеяча Алішэра Наваі.

“Усё гэта надае вельмі сур’ёзныя грані вашаму візіту ў Беларусь. Тое, што губернатары сам-насам перагаварылі і ўжо заключылі мноства дагавораў, — гэта галоўнае. Наша справа — адкрыць дарогу. Мы яе адкрылі. Па гэтай дарозе павінны пайсці тыя, хто будзе выконваць нашы рашэнні і рэалізоўваць дарожную карту, якую зацвердзілі ўрады Узбекістана і Беларусі”, — дадаў прэзідэнт.

“Няма закрытых тэм у Беларусі, няма тых пытанняў, якія мы маглі б не вырашыць. Мы можам выра­шыць любыя пытанні ўзаемна. Нашы эканомікі не перасякаюцца, мы ўзаемадапаўняльныя. Усё, што мы вырабляем, трэба ва Узбекістане. Усё, што вы вырабляеце, неабходна нам. У той прамысловай і сельскагаспадарчай рэвалюцыі, якую вы пачалі ва Узбекістане, мы, я думаю, будзем не лішнімі і сваё месца знойдзем”, — рэзюмаваў Аляксандр Лукашэнка.

Шаўкат Мірзіёеў у час перагавораў з Прэзідэнтам Беларусі Аляксандрам Лукашэнкам у вузкім фармаце адзначыў, што гэта першы ў гісторыі двухбаковых адносін візіт Прэзідэнта Узбекістана ў Беларусь і падрых­тоўка да яго была да­сканалай з боку абедзвюх краін. “Ва ўсіх службах ёсць узаемнае вельмі сур’ёзнае жаданне супрацоўні­чаць, — канстатаваў ён. — Цяпер трэба прайсці па тых кропках росту, дзе можам узаемадзейнічаць на пер­спектыву. У нас такіх вельмі шмат”.

Шаўкат Мірзіёеў адзначыў, што перагаворы з беларускім лідарам, якія прайшлі 31 ліпеня, былі вельмі змястоўнымі, давернымі. “Мы вельмі падрабязна абмеркавалі выклікі і ўсё, што адбываецца ў свеце”, — сказаў ён. На яго думку, рашэнні і дамоўленасці, дасягнутыя за 25 гадоў двухбаковых адносін, выконваюцца і даюць пазітыўны вынік. Аднак патэнцыял рэалізаваны не ў поўнай меры. “Той тавараабарот, які існуе, мы павінны нарасціць у разы, таму што для гэтага ёсць усе падставы”, — упэўнены прэзідэнт.

Адным з важных вынікаў візіту ён назваў актывізацыю прамых кантактаў паміж рэгіёнамі. “Самае галоўнае, што пачалі сустракацца нашы рэгіёны. Ім не трэба перашкаджаць, трэба дапамагаць рэгіёнам, ад­к­рыць дарогу. Мы стварылі ім добрую базу для ўзаемных зносін”, — сказаў Шаўкат Мірзіёеў.

Прэзідэнт асабліва падкрэсліў зацікаўленасць Узбекістана ў наладжванні кантактаў з беларускімі прадпрыемствамі. “Нам вельмі па­трэбна кааперацыя. Беларусь у многіх галінах за гады незалежнасці дасягнула вялікіх поспехаў. Я заўсёды гавару членам урада, міжурадавай камісіі, што трэба часцей сустракацца, каб было менш папер, а больш выніку”, — дадаў ён.

Цяпер у лідараў дзвюх краін ёсць добрая магчымасць абмяняцца меркаваннямі па шырокім коле пытанняў, у тым ліку ў міжнародным парадку дня, як адзначыў Шаўкат Мірзіёеў. Гэта мае важнае значэнне, паколькі Узбекістан знаходзіцца ў Цэнтральнай Азіі, а Беларусь размяшчаецца ў цэнтры Еўропы. “Праблемы, якія існуюць, вельмі падобныя”, — лічыць узбекскі лідар.