Надзея Уладзіміраўна ЗДРОК, начальнік аддзела па адукацыі Ганцавіцкага райвыканкама:
–Прыняцце новай рэдакцыі Кодэкса аб адукацыі — важны крок на шляху ўдасканалення пэўных норм з улікам сучасных рэалій. Абноўлены кодэкс устанаўлівае непарушныя (якасць адукацыі, сацыяльныя гарантыі) і новыя (інклюзія, абавязковая агульная сярэдняя адукацыя) прынцыпы.
Апошняе новаўвядзенне надзвычай важнае: сфарміраваць асобу з устойлівым светапоглядам магчыма толькі пры атрыманні агульнай сярэдняй адукацыі, бо ў школах праводзіц-
ца змястоўная работа, накіраваная на развіццё такіх якасцей, як патрыятызм, дабрыня, спагадлівасць, узаемадапамога і інш.
Актуальнымі сталі змяненні, якія тычацца ўмоў паступлення ў 10 клас гімназій. Так, пры пераходзе вучняў у гэты клас для іх уводзіцца конкурс, па выніках якога залічваюцца дзеці з сярэднім балам не ніжэйшым за 7 і з адпаведнымі ацэнкамі па прадметах, што вывучаюцца на павышаным узроўні. Такім чынам, профільныя класы будуць складацца з вучняў, якія маюць трывалыя веды ў межах выбранага профілю. Акрамя таго, такая арганізацыя залічэння стане дадатковай матывацыяй для васьмікласнікаў і дзевяцікласнікаў.
Змяненні закранулі і арганізацыю адукацыйнага працэсу ў шосты школьны дзень. Так, вучні 5—8 класаў змогуць наведваць факультатыўныя заняткі па суботах, што дазволіць знізіць нагрузку на дзяцей на працягу вучэбнага тыдня.
З новаўвядзенняў хацелася б адзначыць павелічэнне працягласці навучальнага года, які цяпер заканчваецца 31 жніўня. Гэта цалкам лагічна, бо на летніх канікулах на базе ўстаноў адукацыі праводзяцца выхаваўчыя мерапрыемствы, дзейнічаюць школьныя лагеры, арганізавана другасная занятасць.
Карэнным чынам мяняецца прынцып правядзення экзаменаў у 11 класе. Гэтыя змяненні закрануць выпускнікоў наступнага года, якія будуць здаваць толькі 2 абавязковыя экзамены: па матэматыцы і рускай ці беларускай мове. Экзамены пройдуць у форме цэнтралізаванага экзамену, сертыфікаты якога будуць прыраўноўвацца да сертыфікатаў цэнтралізаванага тэсціравання. Цэнтралізаваны экзамен вырашыць не толькі пытанне аб’ектыўнасці адзнак (здаваць яго вучні будуць не ў школах, а ў спецыяльна вызначаных пунктах без сваіх настаўнікаў), але і пытанне нагрузкі на выпускнікоў, якім даводзілася рыхтавацца адначасова да выпускных экзаменаў і ЦТ. Усё гэта дазволіць старшакласнікам больш дасканала падрыхтавацца па профільных прадметах, што патрабуюцца для паступлення ва УВА.
Уводзіцца новы від дадатковай адукацыі — дадатковая адукацыя адораных дзяцей і моладзі, накіраваная на выяўленне і развіццё ў вучняў здольнасцей да навукова-даследчай і вынаходніцкай дзейнасці. Установай дадатковай адукацыі адораных дзяцей і моладзі вызначаны дзіцячы тэхнапарк.
Уведзены 10-гадовы тэрмін атрымання адукацыі асобамі, якія асвойваюць праграмы спецыяльнай адукацыі ў другім аддзяленні спецыяльнай школы, спецыяльнай школы-інтэрната для вучняў з інтэлектуальнай недастатковасцю і ЦКРНіР. 10-гадовы тэрмін навучання ў ЦКРНіР дазволіць перайсці вучням у тэрытарыяльныя цэнтры сацыяльнага абслугоўвання насельніцтва адразу пасля атрымання адукацыі ў ЦКРНіР.
У сельскіх установах адукацыі спецыяльны клас цяпер можа адкрывацца пры наяўнасці аднаго вучня з АПФР, калі нельга арганізаваць адукацыйны працэс у класе інтэграванага навучання і выхавання. Гэта рэалізоўвае права асаблівых дзяцей на атрыманне адпаведнай адукацыі.
Лічу, што абноўлены кодэкс складзены аптымальна і адпавядае запытам часу.
Сяргей ГРЫШКЕВІЧ.
