Бабруйскія рабінзоны

- 10:21Выхаванне, Краязнаўства

Непадалёку Бабруйска на левым беразе Бярэзіны знаходзіцца ўнікальны прыродны ландшафт, які спалучае дубова­грабавы, цёмнахваёвы лес, сасновы бор і бярозавыя гаі. 

Асабліва прывабным з’яўляецца возера Крыніца з халоднай, чыстай вадой і спадзістым пясчаным берагам.

Невыпадкова менавіта гэтае месца стала зыходным пунктам адной з груп Цэнтра турызму, краязнаўства і экскурсій дзяцей і моладзі Бабруйска. Навучэнцы на працягу навучальнага года спасцігалі турыстычную грамату на занятках аб’яднання па інта­рэсах “Спартыўны турызм”, і вось, нарэшце, настаў час прымяніць веды на практыцы. Паўтара дзясятка хлопчыкаў і дзяўчынак самага актыўнага школьнага ўзросту ­11—14 гадоў пад кіраўніцтвам двух педагогаў цэнтра прыступілі да рэалізацыі праграмы турыстычнага лагера “Бабруйскія рабінзоны” на тэрыторыі ўрочышча Белы Бераг.

Першая задача — адшукаць месца знаходжання лагера. Дадзены геаграфічныя каардынаты, і прапанаваны праграмы навігацыі. Выкарыстоўваючы магчымасці сваіх смартфонаў, веды і навыкі, атрыманыя на занятках па арыентаванні, удзельнікі лагера пракладва­юць маршрут і, узяўшы рукзакі з няхітрым турысцкім скарбам, адпраўляюцца ў дарогу.

Урочышча Белы Бераг добра знаёма бабруйчанам. У спякотныя выхадныя бераг возера запаўняюць шматлікія аматары пляжнага адпачынку, турысты з палаткамі і мангаламі, шумныя карпаратыўныя кампаніі. Але калі надыходзяць будні або непагадзь — тут зноў цішыня і спакой. Толькі спеў птушак і шум дрэў, патрывожаных ветрам, напаўняюць Белы Бераг.

Пераадолеўшы шырокую пойму Бярэзіны, група, нарэшце, дасягае мэты. Нягле­дзя­чы на стомленасць, неабходна прысту­паць да наступнага этапу — разбіцця лагера. Разбіць лагер — значыць пабуда­ваць, абсталяваць месца, якое стане лясным домам на некалькі дзён. І вось палатачны гарадок надзьмуў ветразі, добраўпарадкавана месца вогнішча, на якім будзе варыцца самая смачная ў свеце каша і ля якога сагрэюцца не толькі азябшыя ад вячэрняй прахалоды рукі, але і душа пад гукі гітары, якая патанула ў “зорна-снежным” начным эфіры.

А далей маршрут і дарога да самага халоднага возера бярэзінскай поймы — Бярозавага, закінутага сярод цёмных альховых лясоў, прагулка ў царства Бабы Ягі па экалагічнай сцяжынцы запаведнага дубовага гаю, праз цёмны грабавы лес, які хавае стагадовыя дубы. Пошукі слядоў сівой легенды Любінага бору, які хавае месца старажытнага язычніцкага капішча, дарога да святога ўрочышча Малая Прошча, якое асабліва шануецца ў свята Святой Тройцы мясцовымі жыхарамі, якія арганізуюць хрэ­сныя хады ад вёскі Любонічы.

Лагер “Бабруйскія рабінзоны” прапанаваў удзельнікам і разнастайную спартыўна-турыстычную праграму спаборніцтваў. Аднымі з заняткаў у тэхніцы турызму, якія найбольш спадабаліся, сталі заняткі на вадзе — асваенне прыёмаў кіравання турыстычнай байдаркай, пераадоленне перашкод, рух па воднай дарозе з дапамогай турыстычных сплаўных сродкаў.

Бабруйскія рабінзоны ў Год гістарычнай памяці на тэрыторыі ўрочышча Белы Бераг прынялі ўдзел у праграме “Дзень археалогіі”. Ён прадугледжваў археалагічную разведку на бераг канала, які злучыў возера Крыніца з іншымі воднымі аб’ектамі поймы і прайшоў па тэрыторыі старажытнага паселішча бронзавага веку. Па сённяшні дзень на белым пяску можна знайсці керамічныя чарапкі ручной лепкі. А потым, разведаўшы найбліжэйшыя радовішчы гліны, паспрабаваць самім вырабіць па старажытнай тэхналогіі гліняны гаршчок, без ганчарнага круга, вылепліваючы і злучаючы паміж сабой гліняных “чарвячкоў” з вострым донцам, каб гаршчок трывала стаяў у вогнішчы. Паспрабаваць абпаліць свой “шэдэўр” у полымі вогнішча і прывезці ў падарунак дадому, як і свой “наскальны” малюнак, выкананы на аркушы паперы вугалем з вогнішча, які захаваў настрой і пейзаж старажытна-сучасны.

Запальванне вогнішча без запалак, пошукі ядомых і лекавых раслін, выраб лука і стрэл і спробы з іх дапамогай трапіць у цэль, будаўніцтва прытулку ад дажджу і вызначэнне бакоў гарызонту па мясцовых прыкметах… І, вядома, вясёлы адпачынак: актыўныя гульні, купанне, зносіны з равеснікамі.

Праз паўтара тыдня ляснога жыцця дзецям хацелася дадому — засумавалі па бацьках. Але ненадоўга, на дзень або два, а потым зноў на Белы Бераг!

Святлана МАКСІМОВІЧ,
метадыст Цэнтра турызму, краязнаўства і экскурсій дзяцей і моладзі Бабруйска.
Фота аўтара.