Бачыць перспектывы развіцця сістэмы адукацыі

У ходзе рабочай паездкі міністр адукацыі наведаў Гомельскі дзяржаўны аўтамеханічны каледж. Ён, дарэчы, па леташніх выніках прызнаны лепшай установай сярэдняй спецыяльнай адукацыі краіны. Менавіта тут знаходзіцца адзін з рэсурсных цэнтраў, які ў сваім профілі з’яўляецца драйверам развіцця. Ён быў створаны ў 2008 годзе, але кардынальна абноўлены зусім нядаўна — у 2019—2020 гадах. Праграма абсталявання рэсурсных цэнтраў працуе, і маладыя людзі, дзякуючы ёй, набываюць унікальныя навыкі, якія дазваляюць урэшце стаць высокакваліфікаванымі спецыялістамі.

Сучаснае высокатэхналагічнае абсталяванне выкарыстоўваецца для навучання, і ўжо відавочная эфектыўнасць заняткаў, якія праводзяцца на яго базе. Між тым, нагадвае міністр, у краіне цяпер дзейнічае 51 рэсурсны цэнтр:

— Гэтыя цэнтры больш-менш раўнамерна размеркаваны па ўсіх тэрыторыях. 16 з іх мы абсталявалі па апошнім слове тэхнікі. Дарэчы, рэсурсныя цэнтры не будуць расці як грыбы і іх стварэнне будзе выключна ў кампетэнцыі міністра адукацыі. Нам трэба так пакрыць рэсурснымі цэнтрамі краіну, каб не было паўтораў спецыяльнасцей, каб яны працавалі на падрыхтоўку спецыялістаў, і да таго ж актуальна развіваць сеткавыя формы ўзаемадзеяння. Напрыклад, калі няма абсталявання больш высокага класа ў адной установе, навучэнцы могуць паехаць у іншую, дзе яно ёсць, і там прайсці інтэнсіўны курс лабараторных заняткаў, адпрацаваць навыкі і вярнуцца ў сваю ўстанову далей праходзіць навучанне. Мы гэтую форму сеткавай адукацыі заклалі і ў новую рэдакцыю Кодэкса аб адукацыі. Прычым гэта можа тычыцца не толькі сістэмы ПТА і ССА, але і УВА. Сістэма ПТВ і ССА можа такім чынам выкарыстоўваць пляцоўкі УВА для навучання. Удзел у руху WorldSkills паўплываў на тое, што мы атрымліваем доступ да новай інфармацыі па розных кірунках падрыхтоўкі кадраў. Мы бачым новыя тэхналогіі, матэрыялы, пры­стасаванні, якія выкарыстоўваюцца ў свеце. І гэта ўсё ўкараняецца ў адукацыйны працэс, удасканальваюцца вучэбныя планы і праграмы. Вось гэта галоўнае. Дарэчы, у новую рэдакцыю кодэкса мы закладваем адыход ад тыпавога вучэбнага плана і праграмы. Паспрабуем спрасціць схему карэкціроўкі вучэбнага плана і праграмы.

Падчас сустрэчы з дырэктарскім корпусам Гомеля было шмат пытанняў, якія тычыліся змен у сістэме адукацыі, што адбудуцца пасля канчатковага ўдасканальвання праекта Кодэкса аб адукацыі. Работа дыялогавых пляцовак па абмеркаванні змен у Кодэкс аб адукацыі працягваецца, нагадаў міністр. На гэты момант Кодэкс аб адукацыі прыняты Палатай прадстаўнікоў толькі ў першым чытанні. Цяпер ідзе яго дапрацоўка да другога чытання.

— Таму мы папрасілі ва ўсіх рэгіёнах арганізаваць дыялогавыя пляцоўкі і разам з дэпутацкім корпусам яшчэ раз папрацаваць над нашым галоўным нарматыўным дакументам, — тлумачыць міністр. — Абноўлены кодэкс накіраваны ў Савет Рэспублікі, сенатары таксама далучыліся да гэтай работы. Спадзяёмся, што восенню ён будзе прыняты ў другім чытанні. У жніўні плануем правесці Рэспублікан­скі педагагічны савет. На ім абмяркуем, як ідзе падрыхтоўка Кодэкса аб адукацыі да прыняцця ў другім чытанні. Акрамя таго, плануем абмеркаваць Канцэпцыю развіцця сістэмы адукацыі да 2030 года. Яна размешчана на сайце Міні­стэрства адукацыі. З ёй можна азнаёміцца і зноў-такі ў рамках дыялогавых пляцовак абмерка­ваць, унесці карэктывы, свае заўвагі, прапановы. На педсавеце мы таксама плануем абмеркаваць пытанне змены падыходаў да ўступнай кампаніі ў вышэйшыя і сярэднія спецыяльныя навучальныя ўстановы. Падчас педагагічнага форуму будзе арганізавана работа секцый, на якіх яшчэ раз асобна будуць разгледжаны гэтыя дакументы. Ва ўсіх будзе магчымасць выступіць і агучыць свае прапановы. Мы павінны бачыць перспектывы развіцця сістэмы адукацыі. І гэта будзе залежыць у тым ліку ад важных дакументаў, якія мы прымем.

Ці застануцца ў сістэме адукацыі цэнтры дапрызыўнай падрыхтоўкі? На гэтае пытанне дырэктара Гомельскага гарадскога міжшкольнага цэнтра № 2 дапрызыўнай падрыхтоўкі Леаніда Прыходзькі міністр адукацыі адказаў адназначна станоўча. Але заўважыў, што такія ўстановы хутчэй за ўсё стануць філіяламі ўстаноў адукацыі — структурнымі падраздзяленнямі вызначаных школ.

Яшчэ адно пытанне тычылася ўзаемадзеяння законных прадстаўнікоў вучняў з адукацыйнымі ўстановамі. Дырэктар гомельскай гімназіі № 51 Аляксандр Пахучы вызначыў праблему: некаторыя баць­кі лічаць сваім абавязкам вучыць настаўнікаў, як тым выкладаць матэматыку ці рускую мову. У сваім адказе Ігар Карпенка звяртае ўвагу на фармулёўку:

— У кодэксе раней было напісана, што ўдзельнікі адукацыйнага працэсу маюць права знаёміцца са зместам адукацыі. Цяпер мы дадалі “у парадку, вызначаным уста­новай адукацыі”. Значыць, менавіта вы будзеце вызначаць гэты парадак. Палічыце патрэбным да­зволіць прысутнічаць на ўроку — дазволіце. Прашу толькі, каб адміністрацыі ўстаноў адукацыі былі даступнымі для зносін з законнымі прадстаўнікамі вучняў.

Дарэчы, былі агучаны не толькі праблемы. Дырэктар Гомельскага гарадскога ліцэя Таццяна Чаплінская выказала міністру адукацыі словы падзякі за арганізацыю Нацыянальнага дзіцячага тэхнапарка:

— Дзеці, якія прайшлі навучанне ў тэхнапарку, прыехалі ў вялікім захапленні ад таго, як быў арганізаваны адукацыйны працэс. Яны атрымалі новыя веды і новы стымул, каб далей развівацца. Гэта выдатна, што ідэя рэалізавалася. Нават праходжанне адборачных этапаў дае дзецям магчы­масць паднімацца на прыступку вышэй над сабой.

Ірына АСТАШКЕВІЧ.
Фота аўтара.