Такое рашэнне было прынята па выніках пасяджэння камітэта ў Жэневе, паведамілі ў пастаянным прадстаўніцтве Беларусі пры аддзяленні ААН і іншых міжнародных арганізацыях у Жэневе.
У рабоце камітэта прыняла ўдзел дэлегацыя Беларусі на чале з першым намеснікам міністра антыманапольнага рэгулявання і гандлю Артурам Карповічам. Рашэнне аб прадастаўленні Беларусі статусу наглядальніка было прынята аднагалосна. У падтрымку выступілі ЗША, краіны ЕС, Японія, Паўднёвая Карэя, Швейцарыя, Сінгапур, Малдова, Канада, Нарвегія. Беларусь стала першай краінай, якая аформіла такі статус да далучэння да Сусветнай гандлёвай арганізацыі (СГА) і атрымала права ўдзельнічаць у дыскусіях на пляцоўцы камітэта па дзяржзакупках.
Артур Карповіч падзякаваў удзельнікам камітэта за падтрымку і адзначыў, што Беларусі карысны вопыт СГА ў сферы эфектыўнага рэгулявання сектара дзяржзакупак і ўкаранення лепшых сусветных практык у гэтай галіне. Ён праінфармаваў іх аб рэгуляванні рынку дзяржзакупак у Беларусі, прадставіў даклад аб апошніх змяненнях у заканадаўстве ў гэтай галіне.
Беларуская дэлегацыя правяла двухбаковыя сустрэчы з прадстаўнікамі сакратарыята СГА і краінамі — членамі гэтай арганізацыі, а таксама прыняла ўдзел у семінары па пытаннях далучэння новых краін да пагаднення СГА па дзяржзакупках. Дасягнута дамоўленасць аб правядзенні сумесна з СГА і ЕБРР у Мінску ў верасні 2018 года рэгіянальнага семінара па дзяржзакупках.
Згодна з усталяванай у СГА працэдурай, перагаворы па далучэнні Беларусі да пагаднення па дзяржзакупках будуць пачаты пасля афармлення членства Беларусі ў СГА.
Пагадненне СГА па дзяржзакупках з’яўляецца шматбаковым дагаворам з абмежаванай колькасцю ўдзельнікаў і рэгулюе дзейнасць па закупцы тавараў і паслуг для дзяржаўных патрэб. Удзельнікамі пагаднення з’яўляюцца 47 краін — членаў СГА, у тым ліку краіны ЕС, ЗША, Канада, Швейцарыя, Японія, Карэя, з краін — членаў ЕАЭС толькі Арменія. Расія і Кыргызстан вядуць перагаворы па далучэнні да гэтага міжнароднага дагавора. Казахстан плануе пачаць аналагічныя перагаворы ў 2019 годзе.
