Прэзідэнт Беларусі Аляксандр Лукашэнка заклікаў Расію вызначыцца з будучыняй сумесных інтэграцыйных праектаў. Аб гэтым кіраўнік дзяржавы заявіў на сустрэчы з дзяржаўным сакратаром Саюзнай дзяржавы Рыгорам Рапотам.
Аляксандр Лукашэнка адзначыў, што галоўнае пытанне, якое ён хацеў бы абмеркаваць з Рыгорам Рапотам, — гэта, вядома ж, інтэграцыйныя праекты і праблемы ў саюзным будаўніцтве Беларусі і Расіі. “Не ўтойваў і не буду ў гэтай размове ўтойваць: вельмі шмат праблем намецілася ў нас у краіне, вельмі шмат крытыкі ў адрас не толькі інтэграцыі на ўзроўні дзвюх дзяржаў, але і на ўзроўні Еўразійскага эканамічнага саюза, СНД. Хоць СНД тую функцыю, якую можа выконваць, выконвае і рухаецца тымі тэмпамі, якія мы задаём, галоўнае — гэта, вядома ж, Еўразійскі эканамічны саюз і саюз Беларусі і Расіі”, — падкрэсліў кіраўнік дзяржавы.
Прэзідэнт адзначыў, што ў мінулым годзе гандлёва-эканамічныя адносіны Беларусі і Расіі былі не на лепшым узроўні. Сёлета пакуль не ўдалося навярстаць упушчанае. “Гэта нікуды не варта. Мы заўсёды ганарымся тым, што тавараабарот знізіўся, але ў натуральным выражэнні мы прыбавілі. Гэта сведчыць аб тым, што мы пачалі пастаўляць у Расію вялікія аб’ёмы, але па цэнах напалову ніжэйшых. Якая даходнасць Беларусі ад гэтага? Практычна ніякай”, — сказаў Аляксандр Лукашэнка.
“Мы целяпаемся (інакш не скажаш) і ўжо некалькі месяцаў не можам дамовіцца па цане на газ. У сувязі з гэтым Расія знізіла пастаўкі нафты ў Беларусь. Мы гэта ўспрымаем як націск на Беларусь, але націску я не пацярплю. І беларусы таксама”, — заявіў кіраўнік дзяржавы.
Аляксандр Лукашэнка дадаў, што пры пастаўках у Расію блакіруюцца некаторыя беларускія тавары, асабліва прадукты харчавання, якія закупляе Еўрасаюз. “У Расіі яны чамусьці “няякасныя”. Але зразумела: калі мы пастаўляем якасны тавар і па прымальных цэнах у Расію, мы б’ём па кішэні алігархаў ад сельскай гаспадаркі ў Расіі, — звярнуў увагу беларускі лідар. — Яны націскаюць на ўрад (там сувязі, вы ведаеце не горш за мяне, якія), а ўрад дае каманду “фас” розным чыноўнікам — ад Рассельгаснагляду і гэтак далей. Яны ў нас тры прадпрыемствы адкрываюць для паставак — пяць закрываюць, пяць адкрываюць — шэсць потым закрываюць. Ідзе непрыкрыты націск”.
“Я чаму адкрыта аб гэтым гавару? Таму што ўжо надакучыла, гэта ўжо праз меру, далей так прадаўжацца не можа. Яшчэ гавару гэта таму, каб вы разумелі, на якім фоне мы сёння гаворым аб далейшым развіцці нашага саюзнага праекта. Тое, што я сказаў, ні ў якім разе не азначае, што мы будзем у нейкім плане згортваць інтэграцыйныя праекты, але свой удзел у гэтых праектах мы будзем аптымізаваць, — заўважыў прэзідэнт. — Я даў такое распараджэнне ўраду і Адміністрацыі прэзідэнта. Мы цяпер вельмі ўважліва аналізуем наш удзел, перш за ўсё ў Еўразійскім эканамічным саюзе. Калі так будзе прадаўжацца, то навошта нам там трымаць кучу чыноўнікаў? Там, па-мойму, ужо каля тысячы ў так званым урадзе ў ЕАЭС. І які вынік? Навошта плаціць грошы на ўтрыманне ў Маскве высакакласных спецыялістаў? Мы лепшых туды аддалі. Мы ім знойдзем работу тут, а тое, што там будуць прымацца рашэнні, мы з імі згодзімся, таму што іх практычна няма. Мы парушаем усё, аб чым дамовіліся”.
Кіраўнік дзяржавы звярнуў увагу, што ставіць праблемныя пытанні не для таго, каб узняць буру абурэнняў. “Не, ні ў якім разе. Але я яшчэ раз гавару: утойваць праблемы нельга. Мы павінны дакладна вызначыцца: або мы ідзём на паглыбленую інтэграцыю дзяржаў, або не. І самае галоўнае: мы будзем выконваць заключаныя дагаворы і абавязацельствы ці не будзем? Вось галоўныя пытанні для нас”, — канстатаваў беларускі лідар.
“Вы добра ведаеце Беларусь, нашу сітуацыю і становішча. Вы цудоўна разумееце, што мы не збіраемся бегчы наперадзе паравоза і кагосьці залішне тузаць. Нам гэта не трэба. Мы заўсёды стараліся прыстасавацца да сваіх суседзяў, каб ім не перашкаджаць, але ў нас жа ёсць уласны інтарэс. Таму хацелася б пачуць ваш пункт гледжання, як вы ў Пастаянным камітэце гэта ацэньваеце і як будзем дзейнічаць далей. І проста вас папрасіць як чалавека, адданага нашаму адзінству, больш актыўна падключыцца на ўзроўні ўрада і Прэзідэнта Расіі да адстойвання агульных інтарэсаў, каб мы хоць неяк рухаліся наперад”, — сказаў Аляксандр Лукашэнка.
Дзяржаўны сакратар Саюзнай дзяржавы Рыгор Рапота па выніках сустрэчы з Прэзідэнтам Беларусі Аляксандрам Лукашэнкам заявіў, што рознагалоссі паміж Беларуссю і Расіяй, якія ўзнікаюць, не павінны шкодзіць адносінам.
“Узаемаадносіны дзвюх дзяржаў — гэта заўсёды пытанне шматграннае, і ў яго вырашэнне ўцягнута вельмі шмат людзей: ад прэзідэнтаў, якія задаюць вектар развіцця, да простых выканаўцаў, якія вырашаюць канкрэтныя пытанні, — звярнуў увагу Рыгор Рапота. — Узнікненне тых ці іншых праблем, натуральна, заўсёды будзе. Галоўнае, каб яно не мела антаганістычнага характару і не мела такога характару, які можа кардынальна пашкодзіць нашы адносіны”.
Дзяржсакратар заўважыў, што паміж Беларуссю і Расіяй час ад часу ўзнікаюць спрэчныя пытанні. “Наша задача якраз старацца садзейнічаць вырашэнню гэтых пытанняў”, — дадаў ён.
