Продаж білетаў на II Еўрапейскія гульні пачаўся з 1 снежня. У першыя дні больш за 10 тысяч білетаў ужо знайшлі сваіх уладальнікаў, паведамілі ў прэс-службе дырэкцыі Гульняў.
Найбольшым попытам у першыя дні продажу карыстаюцца білеты на спаборніцтвы па лёгкай атлетыцы, мастацкай гімнастыцы, веласіпедным спорце на шашы, а таксама цырымоніі адкрыцця і закрыцця. Білеты актыўна рэалізоўваюцца па папярэдніх заяўках спонсараў і партнёраў Гульняў. Не засталіся ўбаку і беларускія балельшчыкі, якія ўжо выказваюць вялікі інтарэс да маючага адбыцца мультыспартыўнага форуму.
Жыхары любой краіны могуць аформіць свае білеты ў яркае лета самастойна праз сайт www.minsk2019.ticketpro.by. У Беларусі білеты можна таксама набыць у касах сеткі афіцыйнага білетнага аператара — кампаніі Ticketpro, а ў Еўропе — праз афіцыйных рэсэлераў. У Расійскай Федэрацыі білеты паступяць у продаж 15 снежня бягучага года на сайце афіцыйнага білетнага агента www.ponominalu.ru.
Кошт білета на спаборніцтвы — ад Br5, або 2 еўра (для замежных грамадзян), да Br50, або адпаведна 20 еўра. Распрацаваны білеты некалькіх катэгорый: Standard, VIP, на цырымонію адкрыцця і цырымонію закрыцця. Кошт білетаў на цырымонію адкрыцця вагаецца ад Br150 да Br300 у залежнасці ад катэгорыі месца. Цэны білетаў на цырымонію закрыцця крыху ніжэйшыя, іх кошт — ад Br70 да Br150.
