Якія запатрабаваныя спецыяльнасці прапануе Палескі дзяржаўны ўніверсітэт будучым студэнтам?
Пра тое, чым яшчэ прываблівае ўстанова абітурыентаў, раскажа дэкан факультэта дадатковай адукацыі Ірына Прыгодзіч.
Сёлета студэнтамі Палескага дзяржаўнага ўніверсітэта стануць 838 абітурыентаў: за кошт сродкаў рэспубліканскага бюджэту будуць вучыцца 484 студэнты, 354 абітурыенты будуць залічаны на платнае навучанне.
У гэтым годзе Палескі дзяржаўны ўніверсітэт будзе набіраць абітурыентаў на факультэт эканомікі і фінансаў, біятэхналагічны і інжынерны факультэты, а таксама на факультэт арганізацыі здаровага ладу жыцця.
“Факультэт эканомікі і фінансаў будзе прымаць абітурыентаў на такія спецыялізацыі, як “Лінгвістычнае забеспячэнне міжкультурных камунікацый (знешнеэканамічныя сувязі)”, “Фінансавая і банкаўская эканоміка”, “Фінансы і крэдыт”, “Эканоміка і кіраванне на прадпрыемстве”, “Бухгалтарскі ўлік, аналіз і аўдыт у прамысловасці”, “Бізнес-адміністраванне ў сферы вытворчасці і паслуг”, “Менеджмент (у сферы міжнароднага турызму)”, “Маркетынг прадпрыемстваў прамысловасці”, “Кіраванне інавацыйнымі праектамі прамысловых прадпрыемстваў”, — пералічыла дэкан факультэта дадатковай адукацыі.
Біятэхналагічны факультэт прапануе абітурыентам такія кірункі, як “Біялогія (навукова-вытворчая дзейнасць)”, “Біялогія (біятэхналогія)”, “Біяхімія” і “Аналітычная біяхімія”. На інжынерным факультэце можна выбраць спецыяльнасці “Інфармацыйныя тэхналогіі фінансава-крэдытнай сістэмы”, “Тэхналогія перапрацоўкі рыбнай прадукцыі” альбо “Ландшафтнае праектаванне”.
Факультэт арганізацыі здаровага ладу жыцця таксама мае шырокі пералік спецыяльнасцей: “Фізічная культура (лячэбная)”, “Фізічная культура (дашкольнікаў)”, “Аздараўленчая і адаптыўная фізічная культура (аздараўленчая)”, “Аздараўленчая і адаптыўная фізічная культура (адаптыўная)”, “Фізічная рэабілітацыя і эргатэрапія (фізічная рэабілітацыя)”, “Фізічная рэабілітацыя і эргатэрапія (эргатэрапія)”, “Спартыўна-педагагічная дзейнасць (трэнерская работа з указаннем віду спорту)”.
Па большасці спецыяльнасцей тэрмін навучання на дзённай форме складае 4 гады. Выключэннем сталі некалькі кірункаў. Так, на спецыяльнасцях “Лінгвістычнае забеспячэнне міжкультурных камунікацый (знешнеэканамічныя сувязі)” і “Фінансавая і банкаўская эканоміка” студэнты будуць вучыцца 4,5 года, а тыя, хто выбера “Біялогію (навукова-вытворчую дзейнасць)”, будуць студэнтамі 5 гадоў.
“У Палескім дзяржаўным універсітэце таксама ажыццяўляецца навучанне на завочнай форме, — працягвае І.Прыгодзіч. — На скарочанай форме студэнты вучацца 5 гадоў. Што тычыцца конкурсу на спецыяльнасці дзённай формы навучання, то найбольш высокі зафіксаваны на “Фізічнай культуры (лячэбнай)” (3,4 чалавека на месца), “Менеджменце (у сферы міжнароднага турызму)” (3,0), “Маркетынгу” (3,0), а таксама на спецыяльнасцях “Фізічная рэабілітацыя і эргатэрапія (фізічная рэабілітацыя)” (1,9), “Лінгвістычнае забеспячэнне міжкультурных камунікацый” (2,8)”.
У мінулую ўступную кампанію цікавасцю ў абітурыентаў карысталіся новыя спецыяльнасці, на якія летась упершыню ажыццяўляўся набор. Так, конкурс на “Кіраванне інавацыйнымі праектамі прамысловых прадпрыемстваў” склаў 2,2 чалавека на месца, а на спецыяльнасць “Біяхімія” — 2 чалавекі на месца. Прахадныя балы на згаданыя кірункі знаходзіліся на ўзроўні 293 і 281 адпаведна.
“Шматгранныя спецыяльнасці ўніверсітэта даюць нашым выпускнікам шырокі спектр магчымасцей у працаўладкаванні, — запэўнівае Ірына Прыгодзіч. — Напрыклад, студэнты спецыяльнасці “Біялогія (біятэхналогія)” размяркоўваюцца ў Навукова-практычны цэнтр Нацыянальнай акадэміі навук Беларусі па харчаванні, на Беларуска-галандскае сумеснае прадпрыемства “Фармлэнд”, “Савушкін прадукт”, Барысаўскі завод медыцынскіх прэпаратаў, а таксама на замежнае прадпрыемства “Інка-фуд”, у Брэсцкі цэнтр стандартызацыі, метралогіі і сертыфікацыі, на парфумерна-касметычную фабрыку “Сонца” і інш.
Тыя, хто заканчвае навучанне па спецыяльнасцях “Страхаванне”, “Фінансы”, “Банкаўская справа”, атрымліваюць першыя рабочыя месцы ў Нацыянальным банку, Белдзяржстраху, Белнафтастраху і інш.
Выпускнікі спецыяльнасці “Інфармацыйныя тэхналогіі фінансава-крэдытнай сістэмы” ідуць працаваць у шматлікія ІТ-кампаніі, а тыя, хто вучыўся на “Прамысловым рыбаводстве”, атрымліваюць першыя рабочыя месцы ў кампаніях “Санта Брэмар”, “Белрыба” і інш.
***
Лабараторыі для навукі
У Палескім дзяржаўным універсітэце працуюць 6 навукова-педагагічных школ. Іх дзейнасць ажыццяўляецца пад кіраўніцтвам прафесарска-выкладчыцкага складу, які мае высокія дасягненні ў навукова-даследчай дзейнасці. Удзельнікі навуковых школ праводзяць фундаментальныя даследаванні, даследаванні прыкладнога характару па актуальных напрамках развіцця навукі, а таксама работу з адоранай моладдзю.
“Навукова-педагагічныя школы нашага ўніверсітэта працуюць па такіх кірунках, як “Фінансавы і банкаўскі інжынірынг”, “Экаінжынерыя і рацыянальнае прыродакарыстанне”, “Біярэгулятары і клетачныя працэсы”, “Фінансы”, — пералічвае дэкан факультэта дадатковай адукацыі. — Таксама ў нас створаны навуковая школа кафедры міжкультурных камунікацый і спартыўнай антрапалогіі. Апошняя, дарэчы, займаецца спартыўным адборам і спецыялізацыяй у алімпійскіх водных відах спорту дыстанцыйнага характару (плаванне, акадэмічнае веславанне і веславанне на байдарках і каноэ). Таксама супрацоўнікі школы праводзяць адбор, селекцыю і суправаджэнне нацыянальнай каманды па веславанні на байдарках і каноэ, займаюцца пытаннямі арыентацыі ў веславанні на байдарках і каноэ і ў акадэмічным веславанні па Брэсцкай вобласці.
Як і ў любой іншай УВА, у Палескім дзяржаўным універсітэце вялікая ўвага ўдзяляецца навукова-даследчай рабоце. Яна ў першую чаргу накіравана на падрыхтоўку высокакваліфікаваных спецыялістаў. Яшчэ адна важная задача навукова-даследчай работы — дапамагчы студэнтам авалодаць неабходнымі ведамі аб методыках і сродках самастойнага рашэння навуковых і практычных задач, якія пасля можна перавесці ў распрацоўкі і, як вынік, укараніць у вучэбны працэс, а таксама ў розныя галіны народнай гаспадаркі.
“Асноўнымі формамі арганізацыі навукова-даследчай работы студэнтаў з’яўляюцца навуковыя даследаванні падчас выканання лабараторных, курсавых і дыпломных работ, а таксама падрыхтоўка і правядзенне навукова-практычных семінараў і канферэнцый, — пералічвае І.Прыгодзіч. — Нашы студэнты заўсёды ахвотна прымаюць удзел у навукова-практычных мерапрыемствах, выконваюць індывідуальныя даследчыя заданні ў перыяд тэарэтычнага навучання і падчас вучэбных і вытворчых практык, а таксама займаюцца індывідуальнай работай у навуковых падраздзяленнях з навуковымі кіраўнікамі. Рэалізацыі навуковай дзейнасці садзейнічаюць навукова-даследчыя лабараторыі, навуковыя гурткі, клубы і інш. Што тычыцца студэнцкіх работ, то праекты закранаюць розныя сферы дзейнасці. Гэта даследаванні ў галіне адукацыі, інфармацыйных тэхналогій, здаровага ладу жыцця, харчавання, біятэхналогіі, эканомікі і г.д”.
***
Супрацоўніцтва
У Палескага дзяржаўнага ўніверсітэта падпісаны 50 пагадненняў аб супрацоўніцтве з замежнымі ўстановамі адукацыі і іншымі арганізацыямі. Найбольш паспяхова развіваюцца партнёрскія сувязі з універсітэтамі Расіі, Украіны і Германіі.
“Міжнароднае супрацоўніцтва з’яўляецца неад’емным складнікам дзейнасці Палескага дзяржаўнага ўніверсітэта і ажыццяўляецца на прынцыпах роўнасці і ўзаемнай выгады, — падкрэсліла Ірына Аляксандраўна. — Штогод ва ўніверсітэце праходзіць некалькі міжнародных канферэнцый і семінараў. Сярод іх — міжнародная студэнцкая навукова-практычная канферэнцыя “Навуковы патэнцыял моладзі — будучыні Беларусі”, міжнародная навукова-практычная канферэнцыя па пытаннях банкаўскай эканомікі “Банкаўская сістэма: устойлівасць і перспектывы развіцця”, міжнародная навукова-практычная канферэнцыя “Устойлівае развіццё эканомікі: стан, праблемы, перспектывы”, міжнародная навукова-практычная канферэнцыя “Здароўе для ўсіх”.
Сёння Палескі дзяржаўны ўніверсітэт уваходзіць у групу УВА, якія далучыліся да навуковага праекта “Сінергія адукацыйных, навуковых, кіраўніцкіх і прамысловых кампанентаў для кіравання кліматам і прадухілення змянення клімату”, што рэалізуецца да 2023 года. Ён прадугледжвае навучанне кваліфікаваных менеджараў па клімаце. А ідэя ва ўсім гэтым простая: праектныя каманды вывучаюць перадавы вопыт ЕС, адбіраюць і вучаць персанал, распрацоўваючы міждысцыплінарны вучэбны модуль па прадухіленні, адаптацыі і змякчэнні наступстваў змянення клімату.
“Мэта праекта — дапамагчы ўніверсітэтам стаць цэнтрамі развіцця даследаванняў у галіне кіравання кліматам, паскорыць інтэграцыю ў глабальны кліматычны рынак і забяспечыць адпаведнасць патрабаванням глабальнага кліматычнага рэгулявання шляхам набыцця лепшых еўрапейскіх практык у галіне прадухілення змянення клімату”, — зазначыла І.Прыгодзіч.
Наталля САХНО.