Будучую Вёску спартсменаў наведаў кіраўнік урада

Аб’екты ў Студэнцкай вёсцы адпавядаюць усім патрабаванням для пражывання ўдзельнікаў Еўрапейскіх гульняў, заявіў прэм’ер-міністр Сяргей Румас у час выязнога пасяджэння Рэспубліканскага арганізацыйнага камітэта па падрыхтоўцы і правядзенні II Еўрапейскіх гульняў.

Пасяджэнне аргкамітэта прайшло ў Студэнцкай вёсцы (на перыяд Гульняў стане Вёскай спартсменаў) пад старшынствам прэм’ер-міністра. Члены аргкамітэта агледзелі транспартны мол, інтэрнаты БДУіР і БДУ, аб’ект харчавання для ўдзельнікаў Еўрапейскіх гульняў. “Мы дамовіліся, што чарговае пасяджэнне арганізацыйнага камітэта правядзём непасрэдна на аб’екце, і сёння члены аргкамітэта знаёмяцца з часовай інфраструктурай. У прыватнасці, мы агледзелі аб’ект для харчавання спартсменаў, якія будуць пражываць у Студэнцкай вёсцы. Ён быў пабудаваны за рэкордныя тэрміны — за 3,5 месяца — і дасць магчымасць штодзень забяспечваць харчаваннем да 2 тысяч спартсменаў. Члены аргкамітэта таксама наведалі некалькі інтэрнатаў, дзе будуць пражываць спартсмены, пераканаліся ў тым, што ўсе пакоі адрамантаваны, у іх устаноўлена новая мэбля. Для спартсменаў высокага росту зроблены падоўжаныя ложкі. Нумары адпавядаюць усім патрабаванням для пражывання ўдзельнікаў II Еўрапейскіх гульняў”, — сказаў Сяргей Румас.

На пасяджэнні аргкамітэта абмяркоўвалася арганізацыя харчавання ўдзельнікаў Гульняў у Вёсцы спартсменаў, харчавання на спартыўных аб’ектах, а таксама падрыхтоўкі Вёскі спартсменаў да прыёму ўдзельнікаў.

Нагадаем, II Еўрапейскія гульні пройдуць у Мін­ску з 21 па 30 чэрвеня. Больш за 4 тысячы атлетаў з 50 краін разыграюць 199 камплектаў узнагарод у 15 відах спорту.