Актуальная штогод тэма школьнага адзення сёлета прыцягнула да сябе яшчэ больш увагі ў сувязі з новаўвядзеннямі, анансаванымі Міністэрствам адукацыі.
Што апрануць
Пытанні выпрацоўкі адзіных падыходаў да школьнай формы ў 2022/2023 навучальным годзе аказаліся ў цэнтры ўвагі сустрэчы міністра адукацыі Андрэя Іванца і старшыні канцэрна “Беллегпрам” Таццяны Лугіной з кіраўнікамі ўстаноў агульнай сярэдняй адукацыі.
Нагадаем, што ў Міністэрстве адукацыі прапрацоўваюць увядзенне з 1 верасня новага навучальнага года адзіных элементаў адзення вучняў для канкрэтнай навучальнай установы. Канчатковае рашэнне аб тым, які адзіны элемент — пінжак, камізэлька, значок, эмблема-нашыўка ці нешта іншае — аб’яднае навучэнцаў кожнай канкрэтнай установы, будзе вырашана да 1 жніўня калегіяльна адміністрацыяй, педагогамі і бацькамі.
Міністр адукацыі адзначыў, што работа па ўвядзенні дзелавога стылю, формы адзення вучняў у школах вядзецца на працягу больш як 10 гадоў. Сёння ўжо каля 20% навучальных устаноў краіны ўвялі адзіныя элементы школьнай формы. У некаторых рэгіёнах гэтая лічба дасягае 80%.
На думку кіраўніка Міністэрства адукацыі, адзіны адметны элемент у адзенні будзе выхоўваць у навучэнца гордасць за сваю ўстанову адукацыі.
— Важна, каб у калектыве нават самыя маленькія навучэнцы адчувалі сябе адзінай згуртаванай камандай. Акрамя таго, новаўвядзенне — гэта яшчэ і элемент выхаваўчай работы. Мы выдатна разумеем, што школа — гэта храм вучобы, храм будучай навукі, і дзеці, якія прыходзяць вучыцца, павінны адразу, з парога, адчуваць, што яны прыйшлі ва ўстанову адукацыі, настройваць сябе на сур’ёзную работу, — падкрэсліў Андрэй Іванец.
Міністр яшчэ раз акцэнтаваў увагу, што ніякіх рэвалюцыйных пераўтварэнняў у дачыненні да формы адзення для навучэнцаў, па сутнасці, не будзе:
— У нашым разуменні пераход на школьнае адзенне, якое будзе вызначана для кожнай навучальнай установы асобна, уключаючы колеравую гаму і элементы гэтага адзення, стане лагічным працягам той работы, якую мы праводзім ужо не адзін год.
Для некаторых устаноў адукацыі гэта ўвогуле не будзе новаўвядзеннем. Існуюць школы і гімназіі, якія не першы год прытрымліваюцца ўласнага стылю, стаўшы ўдзельнікамі пілотнага праекта “Школа будучыні” сумесна з прадпрыемствамі канцэрна “Беллегпрам”.
“Беллегпрам” гатоў
Які б выбар ні зрабілі ў школах, прадпрыемствы канцэрна “Беллегпрам” гатовы выканаць любы заказ і задаволіць любы запыт. У гэтым запэўніла старшыня канцэрна Таццяна Лугіна. Тым больш што ў такіх айчынных прадпрыемстваў, як “Славянка”, “Палессе”, “БелКрэда”, ужо ёсць вопыт работы па вырабе формы або асобных адметных элементаў адзення для ўстаноў адукацыі.
Прадпрыемствы айчыннага легпрама падрыхтавалі для ўдзельнікаў мерапрыемства экспазіцыю калекцый адзення і абутку для школьнікаў, выпушчаных да новага школьнага сезона. Таксама прайшоў паказ мадэлей школьнага адзення.
Да школьнага сезона гэтага года прадпрыемствамі канцэрна “Беллегпрам” выпушчана каля 340 тысяч адзінак адзення. Гэта швейныя вырабы і трыкатажныя. Таксама чакаюць сваіх юных уладальнікаў каля 24 тысяч ранцаў і сумак, з іх 52% — новыя мадэлі. Таксама вытворцы падрыхтавалі 250 тысяч пар абутку дзелавога і спартыўнага стылю.
Усё гэта можна знайсці не толькі ў звычайных магазінах і на школьных кірмашах, але і заказаць у інтэрнэт-магазінах. Што тычыцца цэн на адзенне, то Таццяна Лугіна адзначыла, што яны павялічыліся ў сувязі з падаражаннем сыравіны і складанасцямі ў лагістыцы. Школьнае адзенне падаражэла ў сярэднім на 10%, а спартыўная форма на 15—30%.
Прадпрыемствы імкнуцца з кожным годам удасканальваць сваю прадукцыю і рабіць яе моднай, камфортнай і сучаснай. Так, “Камінтэрн” у гэтым годзе разбавіў традыцыйныя колеры адзення — сіні, шэры і чорны — стрыманай клеткай. Распрацаваны два новыя баваўняныя камплекты. А для самых рухавых дзетак прапануюць камплект з бомберамі. Іх дапаўняюць штаны з тканіны тыпу джэрсі з прастрочанымі стрэлкамі. У мінулым годзе матулям школьнікаў вельмі спадабаліся такія штаны, бо ў іх не трэба самім прасаваць стрэлкі.
Жлобінская швейная фабрыка, якая выпускае адзенне пад гандлёвай маркай “ФРАНТишка”, заўсёды клапоціцца аб камфорце сваіх маленькіх спажыўцоў. Штаны шыюць з рэгулюемай шырынёй у таліі, а таксама абавязкова выпускаюць мадэлі для дзетак з рознымі фігурамі. Апошнім часам карыстаецца вялікім попытам трыкатаж, бо дзеці і бацькі аддаюць перавагу камфортнаму адзенню. Таму прадпрыемства выпусціла трыкатажныя жакеты — яны цалкам адпавядаюць дзелавому стылю, пры гэтым мяккія і не скоўваюць рухаў.
Завяршылася мерапрыемства дыялогам у фармаце адкрытага мікрафона. Сваім вопытам падзяліліся прадстаўнікі ўстаноў, дзе ўжо выкарыстоўваюцца агульныя элементы школьнага адзення. Напрыклад, дырэктар сталічнай школы № 101 Жанна Віктараўна Саковіч расказала, што ўстанова з 2015 года ўдзельнічае ў праекце “Школа будучыні”. Для навучэнцаў першай ступені былі выбраны элементы бардовага колеру — для хлопчыкаў камізэлькі, а для дзяўчынак балеро.
— Некаторыя бацькі спачатку супрацьстаялі рашэнню аб увядзенні агульных элементаў, аднак нам удалося іх пераканаць. У выніку ўсім падабаецца, як выглядаюць нашы маленькія школьнікі. І я пераканана, што гэта ідзе толькі на карысць дысцыпліне і выхаванню, — сказала дырэктар.
Айчынныя вытворцы — як дзяржаўныя, так і прыватныя — выпускаюць дастаткова шырокі асартымент, каб кожная школа змагла знайсці свой стыль, а кожнае дзіця тое адзенне, якое пасуе менавіта яму.
Сёння ўжо каля 20% навучальных устаноў краіны ўвялі адзіныя элементы школьнай формы. У некаторых рэгіёнах гэтая лічба дасягае 80%.
Дар’я РЭВА.
Фота Алега ІГНАТОВІЧА.