Егіпет узмоцніць меры бяспекі на сваіх курортах, паведамляюць інфармагенцтвы са спасылкай на заяву міністра турызму краіны Хішама Заазу.
Паводле яго слоў, на курортах, размешчаных на ўзбярэжжы Чырвонага мора, у Шарм-эль-Шэйху і Хургадзе, будуць устаноўлены дадатковыя сістэмы відэанагляду. Таксама ў гэтых гарадах будзе пашыраны штат супрацоўнікаў службы бяспекі і павялічана колькасць службовых сабак.
Акрамя таго, улады краіны выдзеляць дадатковыя 250 млн егіпецкіх фунтаў (каля $32 млн) для гарантавання бяспекі.
“Гэтыя дадатковыя меры выведуць нашу бяспеку ў сферы турызму на іншы ўзровень. Тым не менш не будзем спыняцца на дасягнутым, мы ўвесь час пераглядаем нашы магчымасці і будзем прадаўжаць рабіць гэта”, — сказаў міністр.
Улады Егіпта ўзмацнілі меры бяспекі на фоне нядаўніх нападзенняў на турыстычныя аб’екты. 7 студзеня невядомыя выкарысталі піратэхнічныя сродкі пры нападзенні на турыстаў у Каіры, загінулых няма. На наступны дзень 8 студзеня было ўчынена ўзброенае нападзенне на атэль Bella Vista Resort у Хургадзе. У выніку атакі пацярпелі трое турыстаў з Еўропы.
