Моладзь Брэстчыны атрымала выдатную магчымасць для развіцця і рэалізацыі цікавых ідэй і праектаў. У рамках ініцыятывы “Горад, дружалюбны да дзяцей” у Брэсцкім дзяржаўным абласным цэнтры маладзёжнай творчасці пры падтрымцы Дзіцячага фонду ААН (ЮНІСЕФ) адкрыўся рэсурсны цэнтр маладзёжных ініцыятыў “Прыступкі”.
Ва ўрачыстым мерапрыемстве ўдзельнічалі намеснік старшыні Брэсцкага аблвыканкама Г.І.Барысюк, начальнік галоўнага ўпраўлення па адукацыі аблвыканкама Ю.М.Прасмыцкі, прадстаўнікі Дзіцячага фонду ААН (ЮНІСЕФ) у Беларусі і Міністэрства замежных спраў Польшчы, актывісты маладзёжных грамадскіх аб’яднанняў вобласці.
— Удзел падлеткаў і моладзі ў развіцці гарадоў — адна з важных умоў паспяховай будучыні кожнай краіны, — адзначыў Г.І.Барысюк. — На Брэстчыне назапашаны эфектыўны вопыт узаемадзеяння з Дзіцячым фондам ААН і польскімі калегамі ў рамках трансгранічнага супрацоўніцтва. Брэст, Баранавічы, Пінск і Пружаны ўдзельнічаюць у ініцыятыве “Горад, дружалюбны да дзяцей”. Гэта цудоўная магчымасць для наладжвання сяброўскіх зносін і паспяховай сацыялізацыі моладзі ў сучасным свеце. Рэсурсны цэнтр “Прыступкі” — унікальная пляцоўка для развіцця маладзёжных ініцыятыў, падтрымкі і рэалізацыі цікавых праектаў, прапанаваных БРСМ, клубамі ЮНЕСКА, маладзёжным парламентам, скаўцкай і іншымі арганізацыямі.
— “Прыступкі” сталі сёмым рэсурсным цэнтрам у Беларусі, — расказаў прадстаўнік Дзіцячага фонду (ЮНІСЕФ) у Беларусі Рашэд Мустафа Сарвар. — Задача цэнтра — пашырыць сферу ўзаемадзеяння маладзёжных лідараў, ініцыятыўных школьнікаў і дарослых праз тэматычныя круглыя сталы, майстар-класы, трэнінгі, форумы, сустрэчы, дэбаты, гульні, сумесныя працоўныя акцыі. У цэнтры створаны камфортныя ўмовы для цікавых і карысных зносін, рэалізацыі творчага патэнцыялу, абмену вопытам па розных напрамках дзейнасці маладзёжных аб’яднанняў.
— Міжнароднае супрацоўніцтва ў галіне адукацыі і маладзёжнай палітыкі валодае вялікім патэнцыялам і адкрывае шырокія магчымасці для паспяховага вырашэння агульных актуальных праблем, — заўважыў Ю.М.Прасмыцкі.
Пасля ўрачыстага адкрыцця рэсурснага цэнтра госці сустрэліся з актывістамі маладзёжных аб’яднанняў, адказалі на пытанні, абмеркавалі розныя тэмы.
Сяргей ГРЫШКЕВІЧ.
Фота аўтара.
