Для вывучэння матэматыкі і англійскай мовы — інтэрактыўныя аплеты

Нядаўна на базе сталічнай гімназіі № 37 адбыўся фінал трэцяга этапу конкурсу інтэрактыўных аплетаў па вучэбных прадметах “Матэматыка” і “Англійская мова” Make Yourself (з міжнародным удзелам). Спаборніцтвы яскрава засведчылі, што праграмаванне — гэта не толькі захапляльны занятак, але і магчымасць зрабіць жыццё лепшым, а вывучэнне матэматыкі і англійскай мовы больш цікавым і лёгкім.

К онкурс праводзіўся з мэтай пошуку аптымальных педагагічных і тэхналагічных рашэнняў у галіне інфарматызацыі адукацыі і наступнага абмену імі. Сярод яго задач — развіццё прафесійнай кампетэнтнасці педагогаў па арганізацыі праектнай дзейнасці навучэнцаў, стымуляванне росту іх прафесійнага майстэрства, стварэнне ­максімальна камфортных умоў для развіцця творчых здольнасцей навучэнцаў, навыкаў сацыялізацыі і каманднай работы.

Арганізатарамі спаборніцтваў з’яўляюцца Мінскі гарадскі інстытут развіцця адукацыі, БДПУ імя Максіма Танка, упраўленне па адукацыі адміністрацыі Фрунзенскага раёна Мінска, асацыяцыя “Адукацыя для ўстойлівага развіцця”, Інфармацыйны цэнтр па атамнай энергетыцы Мінска і гімназія № 37 сталіцы — рэсурсны цэнтр інфармацыйных тэхналогій Фрунзенскага раёна.

Па словах начальніка аддзела ­інфарматызацыі Цэнтра інфармацыйных тэхналогій МГІРА Алены Емяльянавай, у параўнанні з мінулым годам конкурс значна па­шырыўся. Калі раней прымаліся праграмы толькі па матэматыцы, то сёлета яшчэ і па англійскай мове. Акрамя таго, змяніўся ўзрост яго ўдзельнікаў: да навучэнцаў
5—6 класаў далучыліся і вучні пачатковай школы.

Спаборніцтвы праводзіліся па 4 намінацыях: Maths smarts (прадстаўляліся аплеты для трэніроўкі навыкаў па асобных тэмах вучэбнай праграмы па матэматыцы), Maths smart learning (праекты ці гульні, якія садзейнічаюць вывучэнню асобных раздзелаў матэматыкі),  English smarts (аплеты для трэніроўкі навыкаў па асобных тэмах вучэбнай праграмы па англійскай мове), English smarts learning (праекты ці гульні, якія садзейнічаюць вывучэнню асобных раздзе­лаў англійскай мовы). Дарэчы, інтэр­актыўны аплет — навучальная праграма ў асяроддзі візуальнага праграмавання Scratch.

Конкурс прайшоў у дзвюх узроставых катэгорыях (2—4 і 5—6 класы) у тры этапы, кожны з якіх прадугледжваў правядзенне рэгіянальных тураў і фіналу. Заяў­кі на ўдзел у першым этапе падалі 70 школьнікаў.

У фінале апошняга этапу прынялі ўдзел 45 навучэнцаў з устаноў агульнай сярэдняй адукацыі Гомеля, Клецка, Лельчыц, Мінска, Пін­ска і Рагачова. Абарона работ праходзіла ў выглядзе кансультацый з экспертамі. Пакуль эксперты — спецыялісты ў сферы ІТ і стварэнні гульняў, а таксама студэнты БДПУ імя Максіма Танка — выпрабоўвалі прадстаўленыя распрацоўкі, навучэнцы тлумачылі іх ідэю і пабудову. Па водзывах экспертаў, праект Lost Dungeon Руслана Дземідовіча з лельчыцкай гімназіі № 1 найбольш удала сумяшчае гульнявы працэс і навучанне (куратар Святлана Мешчанка). Закончаным і цэльным быў прызнаны праект My house is my castle Улада Масленкі з Гомельскай Ірынінскай гімназіі (куратар Алеся Мяцельская).

У выніку пераможцамі ў намінацыі Maths smarts (2—4 класы) сталі Аляксандр Гур з праектам “Танкавы біятлон — 4” (сярэдняя школа № 84 Мінска), Цімафей Самайловіч з праектам “Вучыся выйграваць” (гімназія № 17 Мінска) і Арцём Малахаў з праектам “Матэматыка” (сярэдняя школа № 5 Рагачова). У намінацыі Maths smarts (5—6 класы) перамогу святкавалі Дар’я Зайцава з праектам “Галаваломка з запалкамі” (сярэдняя школа № 5 Рагачова), Яўген Невар, Станіслаў Кохнюк з праектам “Сакрэты лікаў” (сярэдняя школа № 7 Пінска) і Андрэй Зюлеў з праектам “Рашэнне задач і прыкладаў” (сярэдняя школа імя Янкі Купалы № 19 Мінска).

1-е месца ў намінацыі Maths smarts learning (2—4 класы) заняла Валерыя Масюкевіч з работай “Праект Scratch” (сярэдняя школа імя Янкі Купалы № 19 Мінска), 2-е месца — Дзмітрый Міхайлаў з праектам “Час матэматыкі” (гімназія № 10 Мінска) і 3-е месца — Раман Шпак з праектам “Даганялкі” (сярэдняя школа № 3 Мінска). У намінацыі Maths smarts learning (5—6 класы) лепшымі былі Руслан Дземідовіч з праектам Lost Dungeon (лельчыцкая сярэдняя школа № 1), Ілья Гушчын і Карына Карповіч з праектам “Будаўнік” (сярэдняя школа Stembridge) і Дзмітрый Ягораў, Вікторыя Шыпіца з работай Finalproject, прадназначанай для адпрацоўкі навыкаў вуснага лічэння пачаткоўцаў (гімназія № 37 Мінска).

Пераможцамі ў намінацыі English smarts  (2—4 класы) сталі Злата Папова з праектам Englіsh play (сярэдняя школа № 5 Рагачова), Лізавета Аляксандрава з праектам Space Unit  (сярэдняя школа № 84 Мінска) і Ганна Малачко з праектам “Алфавіт Ані” (Гомельская Ірынінская гімназія). Перамогу ў намінацыі English smarts (5—6 класы) святкавалі Максім Сазановіч з праектам Animals in world Scrath (Клецкі цэнтр дзіцячай творчасці), Міхаіл Сухарукаў, Аляксей і Міхаіл Аўсянікі з праектам “Вучым англійскую” (сярэдняя школа Stembridge).

У намінацыі English smarts learning (2—4 класы) 1-е месца заняў Улад Масленка з праектам My house is my castle (Гомельская Ірынінская гімназія), 2-е месца — у Міланы Акуловіч з праектам “Віктарына, англійская мова” (сярэдняя школа імя Янкі Купалы № 19 Мінска), 3-е месца — у Кацярыны Сіняковай з праектам “Жывёлы Англіі” (сярэдняя школа № 84 Мінска). Лепшымі ў намінацыі English smarts learning (5—6 класы) сталі Ксенія Масленчанка, Марыя Косарава з праектам YouTube English, прысвечаным развіццю камунікатыўных навыкаў (гімназія № 37 Мінска), Марыя Вашкевіч, Ула­дзімір Конанцаў з праектам Night in museum, які дапаможа выву­чыць і паўтарыць англійскую лексіку (гімназія № 37 Мінска).

Згодна з задумай арганізатараў спаборніцтваў, распрацоўкі канкурсантаў будуць размешчаны на сайтах МГІРА і Акадэміі паслядыпломнай адукацыі, а таксама ў групе Make Yourself у Facebook, каб будучыя ўдзельнікі маглі павучыцца, а настаўнікі — выкарыстоўваць іх на сваіх уроках.

Наталля КАЛЯДЗІЧ.
Фота з сайта МГІРА.