Удзельнікаў заключнага этапу Рэспубліканскай алімпіяды па вучэбных прадметах “Грамадазнаўства” і “Фізічная культура і здароўе” прымала ў гэтым годзе Гродзенская вобласць.
Ліда
Лідскі дзяржаўны прафесійны ліцэй меліяратыўнага будаўніцтва стаў месцам правядзення алімпіяды па прадмеце “Грамадазнаўства”. А таксама месцам пражывання 33 адзінаццацікласнікаў, якія прайшлі некалькі складаных этапаў на шляху да важнейшага іспыту апошняга года свайго школьнага жыцця.
Як і заўсёды, удзельнікі прайшлі два туры. Першы тур прадугледжваў выкананне адкрытых заданняў, у тым ліку практычнага складніка. Другі тур праходзіў у выглядзе тэсціравання. Навучэнцы мелі магчымасць на заканчэнне алімпіяды паўдзельнічаць у аналізе алімпіядных заданняў, атрымаць адказы на пытанні.
Старшыня журы алімпіяды па прадмеце “Грамадазнаўства” дырэктар Віцебскага філіяла ўстановы адукацыі Федэрацыі прафсаюзаў Беларусі “Міжнародны ўніверсітэт “МІТСО” Аляксандр Дзядзінкін уручае дыплом Настассі Гудовіч.
Алімпіяда была арганізавана як звычайна. І ў той жа час мела некаторыя асаблівасці — высокі ўзровень бяспечных умоў яе правядзення. Як паведаміла намеснік начальніка ўпраўлення адукацыі Лідскага райвыканкама Вольга Тарасюк, вялікая ўвага была ўдзелена бытавым умовам: усе ўдзельнікі пражывалі ў асобных пакоях, кожны дзень праводзілася тэрмаметрыя. Харчаваліся каманды па сваіх графіках. А сама алімпіяда праходзіла ў шасці аўдыторыях, дзе знаходзілася па 5—6 чалавек.
Для ўдзельнікаў алімпіяды па грамадазнаўстве з Гродзенскай вобласці пацвердзіўся прынцып “Дома і сцены дапамагаюць”. Два з трох дыпломаў І ступені засталіся ў вобласці. Імі ўзнагароджаны навучэнка сярэдняй школы № 15 Ліды Яна Кушнер і навучэнка Гродзенскай гарадской гімназіі Дарына Юдзіцкая. Яшчэ адзін дыплом вышэйшай ступені атрымала навучэнка Гомельскай Ірынінскай гімназіі Настасся Гудовіч. Дарэчы, Настасся набрала самую вялікую колькасць балаў (253) і як лепшая па гэтым прадмеце была адзначана спецыяльным прызам міністра адукацыі Рэспублікі Беларусь.
Усяго былі адзначаны 15 удзельнікаў алімпіяды. Дыпломамі ІІ ступені — чатыры чалавекі, ІІІ ступені — восем чалавек. Вызначыліся навучэнцы з Ліды — на іх рахунку тры дыпломы трох ступеней. Навучэнец сярэдняй школы № 14 Ігар Нізаўцоў заваяваў дыплом ІІ ступені, навучэнка сярэдняй школы № 15 Дар’я Багрым — дыплом ІІІ ступені. Падрыхтавалі лідскіх школьнікаў настаўніцы Кацярына Гушчынская і Наталля Кеўра. Два дыпломы заваявалі навучэнкі Мінскага дзяржаўнага абласнога ліцэя Настасся Калеева (ІІ ступені) і Ганна Гольдзін (ІІІ ступені). Два дыпломы ІІІ ступені заваявалі навучэнкі Полацкай дзяржаўнай гімназіі № 1 імя Ф.Скарыны Марыя Шарамецьева і Аляксандра Навіцкая.
Гродна
Алімпіяда па прадмеце “Фізічная культура і здароўе” аб’яднала 43 удзельнікаў. Праходзіла алімпіяда па гэтым прадмеце на базе Гродзенскага абласнога інстытута развіцця адукацыі (тэарэтычны тур) і на базе гімназіі № 1 імя Яўхіма Карскага, дзе адбыліся другі і трэці туры алімпіяды.
У першым туры навучэнцы 11 класаў на працягу дзвюх гадзін выконвалі тэставыя заданні на веданне сучаснага спорту і гісторыі яго развіцця. Другі і трэці туры практычныя. Другі — тэсціраванне ўзроўню фізічнай падрыхтаванасці, у трэцім трэба было прадэманстраваць уменні ў гульнявых відах спорту: баскетболе, валейболе, гандболе, футболе.
І ў ГрАІРА, і ў гімназіі былі створаны ўсе ўмовы, каб удзельнікі алімпіяды добра падрыхтаваліся да яе, добра выступілі і мелі бяспечныя ўмовы пражывання.
— Вельмі вялікая ўвага была ўдзелена санітарна-супрацьэпідэмічным мерам у адпаведнасці з рэкамендацыямі Міністэрства аховы здароўя. Удзельнікі і педагогі, якія іх суправаджалі, члены журы жылі ў пакоях па адным чалавеку. Ежу дастаўлялі выключна ў аднаразовым посудзе непасрэдна ў пакоі альбо ў спецыяльна выдзеленыя для кожнай каманды абедзенныя залы, — расказала начальнік аддзела агульнай сярэдняй і дашкольнай адукацыі галоўнага ўпраўлення адукацыі Гродзенскага аблвыканкама Святлана Кавалеўская. — Рассаджванне навучэнцаў на тэарэтычным туры было арганізавана так, каб у кожнай аўдыторыі было не больш за 6—8 чалавек, сядзелі яны праз дзве парты ў шахматным парадку.
Па выніках заключнага этапу алімпіяды па прадмеце “Фізічная культура і здароўе” дыпломамі І, ІІ і ІІІ ступені Міністэрства адукацыі Рэспублікі Беларусь узнагароджаны 19 вучняў: дзесяць юнакоў і дзевяць дзяўчат, чатыры навучэнцы адзначаны пахвальнымі водзывамі.
— Усе ўдзельнікі прадэманстравалі высокія, роўныя вынікі ва ўсіх трох турах, — расказвае старшыня журы старшы выкладчык кафедры спартыўна-педагагічных дысцыплін Віцебскага дзяржаўнага ўніверсітэта імя П.М.Машэрава Марына Парахоўская. — Парадавалі як тэарэтычныя веды, так і спартыўныя вынікі, якія сведчаць аб высокім фізічным патэнцыяле і добрай падрыхтоўцы ўдзельнікаў алімпіяды. Так, навучэнец сярэдняй школы № 2 Дуброўны Віцебскай вобласці Раман Магіленка скокнуў у даўжыню з месца на 3 метры і 3 сантыметры. Па выніках алімпіяды Раман адзначаны пахвальным водзывам.
Дыпломамі І ступені ўзнагароджаны навучэнка Чурлёнскага дзіцячага сада — сярэдняй школы Вілейскага раёна Мінскай вобласці Настасся Кібалка і навучэнка сярэдняй школы № 3 Жабінкі Брэсцкай вобласці Дар’я Балакер, навучэнец Даброўскага дзіцячага сада — сярэдняй школы Горацкага раёна Магілёўскай вобласці Яўген Мазаеў і навучэнец гімназіі № 1 Іўя Гродзенскай вобласці Антоній Седзянеўскі. Дарэчы, усе яны прымалі ўдзел і ў мінулагодняй алімпіядзе і палепшылі ў гэтым годзе свае вынікі. Так, Антоній у мінулым годзе заваяваў дыплом ІІ ступені. Настасся Кібалка пацвердзіла высокі мінулагодні вынік: у 2019 годзе яна таксама атрымала дыплом І ступені. У гэтым годзе пераможцы прадэманстравалі выдатныя асабістыя дасягненні, такія важныя для выпускніка школы пры вызначэнні далейшага прафесійнага лёсу, і маюць ужо ў заліку 100-бальны вынік цэнтралізаванага тэсціравання.
Надзея ВАШКЕЛЕВІЧ.
Фота Вадзіма ГЛОЦІКА і прадастаўлена ўпраўленнем адукацыі Лідскага райвыканкама.
