Эксперты здзіўлены ўзроўнем гатоўнасці да маючага адбыцца форуму

Дэлегаты еўрапейскіх Нацыянальных алімпійскіх камітэтаў і прадстаўнікі ЕАК задаволены ходам падрыхтоўкі да II Еўрапейскіх гульняў. Аб гэтым заявіў галоўны кансультант Еўрапейскіх алімпійскіх камітэтаў (ЕАК) Пірс О’Калаган у час наведвання стадыёна “Дынама”.

Спачатку адбылося сумеснае пасяджэнне з прадстаўнікамі фонду “Дырэкцыя II Еўрапейскіх гульняў 2019 года” і прадстаўнікамі ЕАК, а пасля госці наведалі спартыўныя аб’екты, якія будуць задзейнічаны ў чэрвені наступнага года ў ходзе Еўрапейскіх гульняў.

“Удзельнікі сустрэчы ўражаны ходам работ на “Дынама”. Мы ведаем, што гэта гістарычны аб’ект. Вельмі цікава назіраць за рэканструкцыяй стадыёна, як спалучаюцца яго гістарычная частка з сучаснымі тэхналогіямі. Павінен адзначыць, што стадыён за апошні год значна змяніўся. Упэўнены, многія аматары спорту чакаюць таго моманту, калі можна будзе набыць білеты на цырымоніі адкрыцця і закрыцця II Еўрапейскіх гульняў”, — адзначыў Пірс О’Калаган.

Як расказаў намеснік начальніка па вытворчасці ўпраўлення № 94 “Будтрэста № 1” Дзяніс Повад, агульнабудаўнічыя работы на стадыёне “Дынама” завершаны. Цяпер вядзецца аддзелка ўнутраных памяшканняў і мантаж даху стадыёна. Да 31 мая плануецца завяршыць усе асноўныя работы на гэтым аб’екце.

Многія з дэлегатаў Нацыянальных алімпійскіх камітэтаў падкрэслівалі, што Мінск мае высокую ступень гатоўнасці да старту II Еўрапейскіх гульняў. “Група, якая наведала Мінск, прыемна здзіўлена гатоўнасцю сталіцы Беларусі да маючага адбыцца форуму. Многія аб’екты могуць ужо ў найбліжэйшы час прыняць спаборніцтвы міжнароднага ўзроўню, вытрымліваецца план па падрыхтоўцы, гэта адчуваецца на кожным спарткомплексе”, — сказаў прадстаўнік НАК Азербайджана Анар Багіраў.

Дэлегацыя еўрапейскіх НАК азнаёмілася таксама з работай мінскага комплексу Sporting Сlub, дзе адбудуцца спаборніцтвы па стэндавай стральбе.

II Еўрапейскія гульні пройдуць у Мінску з 21 па 30 чэрвеня 2019 года ў пятнаццаці відах спорту: бадмінтон, баскетбол 3х3, бокс, барацьба (грэка-рымская, вольная, жаночая), веласіпедны спорт (трэк і шаша), гімнастыка (спартыўная, мастацкая, акрабатыка, аэробіка, скачкі на батуце), веславанне на байдарках і каноэ, дзюдо, каратэ, лёгкая атлетыка, самба, стральба з лука, стральба (кулявая і стэндавая), настольны тэніс, пляжны футбол.

Спаборніцтвы ў дзесяці відах спорту стануць кваліфікацыйнымі да XXXII Алімпійскіх гульняў 2020 года ў Токіа.