Абласны этап конкурсу “Студэнт года — 2021” прайшоў у Гродзенскім абласным палацы творчасці дзяцей і моладзі. Перамогу атрымаў студэнт 5 курса лячэбнага факультэта Гродзенскага дзяржаўнага медыцынскага ўніверсітэта Аляксандр Краўчук.
За перамогу змагаліся студэнты трох устаноў вышэйшай адукацыі Гродзеншчыны: ГрДУ імя Янкі Купалы, медыцынскага і аграрнага ўніверсітэтаў. Лепшыя студэнты вобласці маюць высокі бал паспяховасці, удзельнічаюць у навуковым, творчым, спартыўным, грамадскім жыцці УВА, займаюць актыўную грамадзянскую пазіцыю, валодаюць лідарскімі якасцямі.
Будучы доктар Аляксандр Краўчук — пераможца і прызёр універсітэцкіх алімпіяд па гісторыі Беларусі. У складзе зборнай каманды ўніверсітэта ў 2019 годзе заняў 2-е месца на Рэспубліканскай алімпіядзе па першай медыцынскай дапамозе. Член зборнай каманды ўніверсітэта па армрэслінгу. Старшыня студэнцкага самакіравання і капітан каманды КВЗ лячэбнага факультэта.
ГрДУ імя Янкі Купалы прадстаўляла студэнтка 3 курса факультэта гісторыі, камунікацыі і турызму Лізавета Дазорцава. Яна старшыня творчага клуба факультэта, дыпламант I ступені студэнцкай навуковай канферэнцыі FIKIT_SCIENCE, многіх іншых конкурсаў і алімпіяд.
Гонар Гродзенскага дзяржаўнага аграрнага ўніверсітэта адстойвала студэнтка 2 курса факультэта бухгалтарскага ўліку Вольга Затаўка. У складзе калектываў дзяўчына прымала ўдзел у гарадскіх, абласных, рэспубліканскіх праектах і конкурсах. Вольга з’яўляецца аўтарам праекта “КсеNON”, а таксама членам валанцёрскага атрада “Крыніцы дабрыні”.
— Конкурс “Студэнт года” накіраваны на тое, каб развіваць студэнцкую моладзь, яе дзейнасць, выхоўваць лідараў, спрыяць папулярызацыі ведаў, прафесій і, безумоўна, сацыяльнай актыўнасці маладых людзей, — адзначыў першы сакратар Гродзенскага абласнога камітэта БРСМ Андрэй Есін. — Для таго каб
стаць удзельнікам конкурсу, трэба добра вучыцца, займацца навукай, грамадскай дзейнасцю. Усе канкурсанты адукаваныя, таленавітыя, творчыя асобы.
Студэнты праявілі свае лепшыя здольнасці, прадставіўшы “візітную картку”, падчас творчага і інтэлектуальнага конкурсаў, конкурсу прамоўніцкага майстэрства. Кожны падрыхтаваў і абараняў свой праект. Яшчэ да фінальных мерапрыемстваў у групе “Моладзь Гродзеншчыны” адной з сацыяльных сетак былі размешчаны відэаролікі канкурсантаў. Кожны мог аддаць свой голас за ўдзельніка конкурсу. Па выніках галасавання вызначаўся “Студэнт года ONLINE”.
Падводзячы вынікі, старшыня журы Андрэй Есін падкрэсліў, што ўдзельнікі паказалі, якія яны таленавітыя, разумныя, крэатыўныя, а таксама выказаў падзяку кіраўніцтву кожнага з універсітэтаў за падтрымку не толькі гэтага, але і ўсіх праектаў БРСМ. Традыцыйна ўдзельнікі конкурсу “Студэнт года” і далей займаюць актыўную пазіцыю, прымаюць
удзел у рэалізацыі праектаў на ўзроўні як УВА, так і вобласці.
Аляксандр Краўчук і Лізавета Дазорцава будуць прадстаўляць Гродзенскую вобласць на рэспубліканскім этапе конкурсу. Званне “Студэнт года ONLINE” атрымала Вольга Затаўка.
Як прызнаўся пасля завяршэння конкурсу Аляксандр Краўчук, перамога стала вынікам вельмі напружанай работы, у кожным выпрабаванні ён імкнуўся паказаць максімальны вынік.
— Для нашага ўніверсітэта перамога ў абласным этапе конкурсу “Студэнт года” вельмі прэстыжная, — дадаў Аляксандр. — Цяпер будзем рыхтавацца да рэспубліканскага этапу, удасканальваць праграму, абменьвацца вопытам з іншымі УВА і імкнуцца да перамогі.
Арганізатарам конкурсу выступіў Гродзенскі абласны камітэт БРСМ.
Ірына АНІКЕВІЧ.