Учора ў палацах культуры, цэнтрах маладзёжнай творчасці прагучалі фанфары ў гонар удзельнікаў чацвёртага рэспубліканскага этапу рэспубліканскай прадметнай алімпіяды, у якім бяруць удзел 1500 школьнікаў з усіх рэгіёнаў рэспублікі, Ліцэя Белдзяржуніверсітэта, Ліцэя БНТУ. Акрамя таго, ужо традыцыйна ў рэспубліканскіх інтэлектуальных спаборніцтвах прымуць удзел і госці з іншых краін.
Прадэманстраваць свой інтэлектуальны патэнцыял у алімпіядах па беларускай мове і літаратуры, рускай мове і літаратуры прыедуць навучэнцы з польскай Гайнаўкі і Літвы. А юныя масквічы пакажуць свае матэматычныя і фізічныя здольнасці. У склад абласных каманд увайшлі лепшыя юныя інтэлектуалы рэгіёна, якія былі вызначаны падчас абласных этапаў рэспубліканскай алімпіяды.
Штогод рэспубліканская алімпіяда па агульнаадукацыйных прадметах праводзіцца сярод навучэнцаў агульнаадукацыйных устаноў, устаноў, якія забяспечваюць атрыманне прафесійна-тэхнічнай і сярэдняй спецыяльнай адукацыі.
Традыцыйна рэспубліканская алімпіяда праводзіцца па шаснаццаці агульнаадукацыйных прадметах: матэматыцы, фізіцы, астраноміі, хіміі, біялогіі, інфарматыцы, геаграфіі, гісторыі, грамадазнаўстве, замежных мовах (англійскай, нямецкай, французскай, іспанскай), беларускай мове і літаратуры, рускай мове і літаратуры, працоўным навучанні.
Сёлета ў Брэсце сабраліся лепшыя знаўцы беларускай мовы і літаратуры, у Мінску — рускай мовы і літаратуры. Мазыр прымае замежнікаў, у Віцебску стануць вядомы пераможцы алімпіяд па матэматыцы, фізіцы, астраноміі, у Гродне вызначаць лепшых інфарматыкаў, у Магілёве — хімікаў і біёлагаў. У Гомелі будуць вырашаць, хто першы ў краіне па гісторыі, грамадазнаўстве і геаграфіі, а ў Лідзе стануць вядомы імёны лепшых майстроў і майстрых. Тут праходзіць рэспубліканская алімпіяда па працоўным навучанні.
Як вядома, прадметныя алімпіяды праходзяць у некалькі тураў. Алімпіяды па інфарматыцы, замежных мовах, працоўным навучанні, рускай і беларускай мовах і літаратуры праводзяцца ў тры туры, па астатніх прадметах — у два. А каб удзельнікі алімпіяды маглі адпачываць ад разумовага напружання, арганізатары ў кожным рэгіёне паклапаціліся пра насычаную культурную праграму.
Удзельнікам рэспубліканскай алімпіяды будуць прапанаваны наведванне гістарычных і памятных месцаў, тэатраў, музеяў, розныя экскурсіі, вечары сустрэч і адпачынку. Акрамя таго, у межах заключнага этапу рэспубліканскай алімпіяды плануюцца сумесныя мерапрыемствы з педагагічнай грамадскасцю, навучэнцамі навучальных устаноў адпаведных населеных пунктаў.
У 2013 годзе будзе праводзіцца 63-я алімпіяда па матэматыцы, пяцьдзясят другая — па фізіцы, сорак сёмая — па хіміі, трыццатая — па замежных мовах, дваццаць дзявятая — па беларускай мове і літаратуры, дваццаць восьмая — па рускай мове і літаратуры, дваццаць шостая — па інфарматыцы, дваццаць пятая — па біялогіі, дваццаць чацвёртая — па геаграфіі, 18-я — па астраноміі, шаснаццатая — па гісторыі, дзявятая — па грамадазнаўстве і працоўным навучанні.
Пераможцы алімпіяды будуць узнагароджаны дыпломамі I, II, III ступеней і прызамі Міністэрства адукацыі. Па рашэнні журы, сельскім школьнікам, якія найбольш паспяхова выступілі, удзельнікам заключнага этапу алімпіяды па кожным вучэбным прадмеце будуць уручаны спецыяльныя прызы міністра адукацыі Рэспублікі Беларусь.
Згодна з правіламі прыёму ва ўстановы вышэйшай і сярэдняй спецыяльнай адукацыі, пераможцы заключнага этапу рэспубліканскай алімпіяды залічваюцца на адпаведныя спецыяльнасці без уступных выпрабаванняў. Заключны этап рэспубліканскай алімпіяды па інфарматыцы і геаграфіі пройдзе з 25 па 30 сакавіка 2013 года, па астатніх вучэбных прадметах — з 25 па 29 сакавіка.
Рэспубліканская алімпіяда па вучэбных прадметах вызначыць і патэнцыяльных удзельнікаў міжнародных алімпіяд. Міжнародная алімпіяда па матэматыцы ў гэтым годзе пройдзе ў Калумбіі, па хіміі — у Расіі, па біялогіі — у Швейцарыі, па інфарматыцы — у Аўстраліі, па астраноміі — у Літве, па геаграфіі — у Японіі, па фізіцы — у Даніі.
Больш падрабязна аб ходзе і адметнасцях рэспубліканскай алімпіяды бягучага года чытайце ў найбліжэйшых нумарах “Настаўніцкай газеты”.
Вольга ДУБОЎСКАЯ.
dubowska@ng-press.by