Фінансавае аздараўленне сельгасарганізацый — у цэнтры ўвагі ўрада

Новыя інструменты антыкрызіснага кіравання сельскагаспадарчымі арганізацыямі будуць адпрацаваны на МРУСП “Мастаўчанка”. Аб гэтым заявіў прэм’ер-міністр Андрэй Кабякоў на пасяджэнні Прэзідыума Савета Міністраў, на якім разглядаўся ход рэалізацыі даручэнняў кіраўніка дзяржавы па фінансавым аздараўленні арганізацый аграпрамысловага комплексу.

“На сёння не знаходзіць актыўнага прымянення прадугледжаны ўказам № 253 новы інструмент антыкрызіснага кіравання, а менавіта канвертацыя даўгоў крэдытораў у акцыі, замяшчэнне актываў, прыцягненне трэціх асоб. Па выніках разгляду гэтага пытання 6 кастрычніка ў Гродзенскай вобласці мной даручана забяспечыць рэалізацыю пілотнага праекта на базе раённага ўнітарнага сельскагаспадарчага прадпрыемства “Мастаўчанка”, якое знаходзіцца ў санацыі, па пакрокавай адпрацоўцы новых інструментаў антыкрызіснага кіравання і давесці да зацікаўленых адпаведныя рэкамендацыі”, — адзначыў Андрэй Кабякоў.

Ён даручыў губернатарам далажыць аб мерах адносна арганізацый, якія дапусцілі пагаршэнне фінансавага стану, а таксама пошуку інвестараў. Кіраўніком дзяржавы ў 2016—2017 гадах падтрыманы падыходы ўрада, Нацыянальнага банка і аблвыканкамаў па ажыццяўленні фінансавага аздараўлення арганізацый аграпрамысловага комплексу. Першым крокам стала прыняцце ўказаў №№ 253 і 268, якімі прадугледжана фінансавае аздараўленне 425 сельгасарганізацый. У Агенцтва па кіраванні актывамі перададзена праблемная запазычанасць неплацежаздольных сельгасарганізацый перад Белаграпрамбанкам, Беларусбанкам і Банкам развіцця на агульную суму каля Br772 млн.

“З улікам спецыфікі сельскагаспадарчай вытворчасці ўказам № 253 прадугледжаны шэраг ільгот і прэферэнцый па рэструктурызацыі даўгоў неплацежаздольных арганізацый, а таксама набор матывацыйных і стымулюючых механізмаў для прыцягнення інвестараў і эфектыўных уласнікаў, каб дасудова аздаравіць гэтыя арганізацыі. У працэдуры дасудовага аздараўлення — 323 прадпрыемствы, — сказаў Андрэй Кабякоў. — Разам з тым аб’ём прадастаўленай дзяржаўнай падтрымкі ў выглядзе рэструктурызацыі запазычанасці абмяжоўваецца наяўнасцю пратэрмінаваных абавязацельстваў па бягучых плацяжах. Паколькі шэрагам арганізацый бягучыя плацяжы не забяспечваюцца, а значыць, права на дзяржпадтрымку страчана, у цэлым запазычанасць за спажытыя энергарэсурсы рэструктурызавана толькі на 50% ад заяўленай сумы, перад бюджэтам — на 44%”.

Таксама прэм’ер-міністр адзначыў, што кіраўнікамі прадпрыемстваў і мясцовых выканкамаў на належным узроўні не праводзіцца работа з крэдыторамі. У Гродзенскай вобласці рэструктураваны толькі 3% ад заяўленай запазычанасці, у Віцебскай — 4%, у Брэсцкай і Мінскай — па 7%, у Гомельскай — 22%, у Магілёўскай — 27%. Акрамя таго, на недастатковым узроўні знаходзіцца плацежная дысцыпліна арганізацый на дасудовым аздараўленні ў частцы выплаты працэнтаў Агенцтву па кіраванні актывамі. За 9 месяцаў 2017 года аплачана 75% ад сумы налічаных працэнтаў.

“Старшыні райвыканкамаў, на якіх прэзідэнтам у адпаведнасці з указам № 78 ускладзена персанальная адказнасць за забеспячэнне эфектыўнай работы стратных сельгасарганізацый, павінны разумець рызыку таго, што працэдура дасудовага аздараўлення можа завяршыцца не аздараўленнем, а банкруцтвам. У сувязі з гэтым павінны быць прыняты ўсе меры, прадуманы перспектывы гібкага супрацоўніцтва з крэдыторамі і інвестарамі”, — падкрэсліў прэм’ер-міністр.

Андрэй Кабякоў праінфармаваў, што ў выніку мерапрыемстваў па фінансавым аздараўленні сельгасарганізацый за першае паўгоддзе 2017 года аднавілі плацежаздольнасць 32 арганізацыі, або 10% ад агульнай колькасці, палепшыла каэфіцыенты плацежаздольнасці 131 арганізацыя, або 42%, не змянілася плацежаздольнасць у 80, або 26%, пагоршылі каэфіцыенты плацежаздольнасці 68 арганізацый, або 22%.

Пакінуць каментарый

Ваш электронны адрас не будзе апублікаваны. Абавязковыя палі пазначаны *