Фіскальная палітыка павінна быць накіравана на эканамічнае развіццё

Бізнес павінен стаць драйверам эканамічных працэсаў у краіне. Аб гэтым заявіў міністр эканомікі Беларусі Уладзімір Зіноўскі на міжнароднай навукова-практычнай канферэнцыі “Фіскальная палітыка ў мэтах устойлівага эканамічнага развіцця”.

“Для гэтага трэба ўмацаваць крэдыт даверу паміж дзяржавай і бізнесам”, — падкрэсліў міністр.

Паводле яго слоў, адным з элементаў рэгулявання з’яўляецца стабільнае і простае падатковае заканадаўства. У сваю чаргу фіскальная палітыка павінна быць накіравана на эканамічнае развіццё, трэба ствараць умовы для праяўлення прадпрымальніцкай ініцыятывы і раскрыцця патэнцыялу прадпрыемстваў усіх форм уласнасці.

Уладзімір Зіноўскі нагадаў, што ў мінулым годзе ў Беларусі быў прыняты беспрэцэдэнтны пакет дакументаў, накіраваны на развіццё прадпрымальніцтва. У іх агавораны адзін з ключавых падыходаў: аб мінімальным умяшанні дзяржавы ў эканоміку суб’ектаў гаспадарання пры павышэнні асабістай адказнасці іх кіраўнікоў.

Міністр адзначыў, што дзяржорганы і ўрад Беларусі пастаянна працуюць над удасканаленнем падатковай палітыкі. “Гэта пастаянны працэс. За апошнія дзесяць гадоў нам удалося знізіць падатковую нагрузку і ўзровень цэнтралізацыі на 10%. Гэта даволі значны вынік для эканомікі. Створаны спрыяльныя ўмовы для прыцягнення інвестыцый за кошт розных прэферэнцыйных рэжымаў”, — сказаў ён.

Разам з тым Уладзімір Зіноўскі падкрэсліў, што ў сувязі са зменлівымі знешнімі ўмовамі і работай у адзінай эканамічнай прасторы патрабуецца прыняцце дадатковых мер. “Вядома, трэба разумець, што адмяніць усе падаткі і пусціць бізнес у свабоднае плаванне не атрымаецца. Дзяржаве неабходна выконваць свае сацыяльныя абавязацельствы”, — дадаў ён.

Уладзімір Зіноўскі адзначыў, што на фоне немагчымасці істотнага зніжэння дзяржрасходаў, падатковая сістэма апошнія гады была перанасычана вымушанымі кропкавымі выключэннямі, што часам магло аказваць негатыўнае ўздзеянне на ўмовы вядзення бізнесу. У сувязі з гэтым і ўзнікла патрэба, каб Падатковы кодэкс быў простым і зразумелым, здольным падтрымліваць эканамічную дзейнасць, а не прымушаць шукаць пралазы для ўхілення ад фінансавых і падатковых абавязацельстваў. Прэзідэнтам даручана падрыхтаваць адпаведны абноўлены праект дакумента ў сціслыя тэрміны — да 1 верасня бягучага года. “Пры гэтым агучана зразумелае патрабаванне — скарачэння даходаў бюджэту быць не павінна”, — сказаў міністр.

Акрамя таго, чакаецца сур’ёзная перапрацоўка нарматыўных прававых актаў па бухгалтарскім уліку.

Для прапрацоўкі названых пытанняў створаны рабочыя групы з максімальным прыцягненнем прадстаўнікоў бізнесу і экспертаў-практыкаў. “Урад поўнасцю адкрыты для прапаноў”, — падкрэсліў Уладзімір Зіноўскі.