Прадстаўнікам замежных дыпмісій і міжнародных арганізацый расказалі пра падрыхтоўку да II Еўрапейскіх гульняў, паведамілі ў дырэкцыі гульняў.
Брыфінг прайшоў у штаб-кватэры Нацыянальнага алімпійскага камітэта. Намеснік дырэктара фонду II Еўрапейскіх гульняў Анатоль Котаў адзначыў, што беларускі бок удзячны за аказаны давер і магчымасць правесці такія буйныя спаборніцтвы, якія стануць значнай падзеяй у спартыўным і культурным жыцці ўсяго кантынента. Ён звярнуў увагу, што па маштабе будучыя спаборніцтвы параўнальныя з зімовымі Алімпійскімі гульнямі 2018 года ў Пхёнчхане. “Адна з галоўных мэт, якія мы ставім перад сабой, — папулярызаваць ідэалы міру, дружбы, роўнасці і сумленнага спартыўнага саперніцтва, гэта значыць алімпійскія каштоўнасці”, — падкрэсліў Анатоль Котаў.
Свой удзел у II Еўрапейскіх гульнях пацвердзілі нацыянальныя алімпійскія камітэты 50 краін Еўропы, аб’яднаныя пад эгідай Еўрапейскіх алімпійскіх камітэтаў. На сустрэчы разгледжаны пытанні, якія звязаны з удзелам замежных дэлегацый у цырымоніях адкрыцця і закрыцця гульняў, а таксама тычацца білетнай праграмы, акрэдытацыі, размяшчэння, пратакола, магчымасці бязвізавага ўезду ў Беларусь у перыяд правядзення форуму.
“Прадстаўнікоў пасольстваў праінфармавалі пра змяненні ў праграме спаборніцтваў, акрэдытацыю высокапастаўленых службовых асоб замежных дзяржаў, ключавыя моманты знаходжання дэлегацый. Таксама паведамлялася пра акрэдытацыйныя прывілеі для тых або іншых кліенцкіх груп гульняў, пра рашэнне аб вызваленні ад платы за праезд па платных аўтамабільных дарогах у Беларусі іншаземцаў, якія выкарыстоўваюць транспартныя сродкі з тэхнічна дапушчальнай агульнай масай не больш за 3,5 т у перыяд з 10 чэрвеня па 10 ліпеня 2019 года”, — расказалі ў дырэкцыі.
Намеснік міністра замежных спраў Беларусі Андрэй Дапкюнас звярнуў увагу на значны інтарэс да маючага адбыцца форуму ўжо на гэтым этапе падрыхтоўкі. “Усе, хто задзейнічаны ў арганізацыі гульняў: ад дырэкцыі да міністэрстваў — на ўсіх этапах будуць адкрыты для супрацоўніцтва і гатовы прадаставіць патрэбную інфармацыю. Прадстаўнікі арганізацыйнага камітэта гульняў улічаць у сваёй рабоце нават самыя нязначныя дэталі, каб ва ўдзельнікаў і гасцей не ўзнікала сумненняў, што будучы форум стане запамінальнай падзеяй”, — адзначыў ён.
У брыфінгу прынялі ўдзел прадстаўнікі дыпламатычных місій амаль 25 краін. Пасля заканчэння мерапрыемства прадстаўнікі дыпламатычнага корпуса змаглі ўбачыць талісман II Еўрапейскіх гульняў — лісяня Лесіка, а таксама наведаць фотавыстаўку, якая расказвае пра спартыўную Беларусь і дасягненні беларускіх атлетаў на міжнароднай арэне.
