Гродзенскі дзяржаўны медыцынскі ўніверсітэт прыняў Рэспубліканскую выставу сучаснай візуальнай творчасці студэнтаў “Грані творчасці”, прысвечаную Году малой радзімы. Каб прыцягнуць увагу да выставы, студэнты ўжо на працягу месяца арганізоўваюць яскравыя акцыі і мерапрыемствы, сярод якіх літаратурна-мастацкі марафон “На хвалях спадчыны маёй” і асветніцкі патрыятычны квест “Край на заходнім рубяжы, як мне табой не даражыць?..”.
Рэспубліканская выстава, якая пабывала ва ўстановах адукацыі Гомельскай і Брэсцкай абласцей, ужо больш за месяц знаходзіцца ў Гродне. Студэнты і выкладчыкі ахвотна карыстаюцца такой нагодай, каб праводзіць яшчэ больш культурных акцый і свят, прысвечаных Году малой радзімы. Працяглую праграму падрыхтавалі студэнцкі клуб ГрДМУ пры ўдзеле аддзела па выхаваўчай рабоце і літаратурны клуб “Катарсіс”.
Так, да адкрыцця выставы яны сабралі ахвотных на квест “Вядомыя празаікі аб Гародні”, удзельнікі якога даведаліся шмат новага пра гісторыю свайго краю і яго літаратурную спадчыну. Падчас конкурсу дэкламатараў “Матчына слова я сэрцам люблю” кожны ахвотны мог прачытаць любімы верш беларускага аўтара, прысвечаны малой радзіме. А каманды, што паўдзельнічалі ў караоке-спаборніцтве “Ведай беларускае”, паказалі свае веды ў беларускай музыцы — народнай і сучаснай.
Дарэчы прыйшлося і святкаванне 20-годдзя стварэння літаратурнага клуба “Катарсіс”. Праз яго прайшло ўжо больш за сотню студэнтаў, якія апублікавалі мноства вершаў і апавяданняў у беларускіх газетах і часопісах, правялі дзясяткі сустрэч з чытачамі, выдалі зборнікі прозы “Вечные каникулы”, “Гіпакратавы ваганты”, “Вечар пятніцы”, а зараз падрыхтавалі для друку новую кнігу “Менестрэлі Асклепія”.
У мерапрыемствах клуба прынялі ўдзел каля 300 студэнтаў. Да свайго юбілею маладыя паэты і празаікі зладзілі літаратурны марафон: на працягу тыдня праводзілі літаратурныя вечарыны, ранішнікі, паэтычныя пяціхвілінкі — збіраліся ва ўніверсітэце, каб пачытаць свае творы і ўрыўкі з вершаў і апавяданняў любімых пісьменнікаў. Таксама аматары літаратуры з усіх факультэтаў паўдзельнічалі ў квесце “Літаратурная Гародня”: дарожная карта правяла іх па ўсім універсітэце ў пошуках пікетаў, на якіх арганізатары задавалі пытанні па літаратуры Гродзеншчыны. Завяршылася святкаванне імпрэзай, на якой урачыста аб’явілі пераможцаў адкрытага літаратурнага конкурсу “Катарсіс” і Рэспубліканскага літаратурнага конкурсу студэнтаў “Аўтограф”, члены клуба чыталі вершы і прымалі віншаванні ад культурных арганізацый і прадстаўнікоў універсітэта. Нязменны кіраўнік клуба Віктар Іванавіч Варанец атрымаў падзяку ад Гродзенскай абласной структуры Беларускага таварыства “Веды” з рук намесніка старшыні праўлення Наталлі Віктараўны Пац.
Нарэшце, 21 мая адбыўся асветніцкі патрыятычны квест “Край на заходнім рубяжы, як мне табой не даражыць?..”, таксама прысвечаны выставе “Грані творчасці”. У квесце прынялі ўдзел 6 каманд са студэнтаў Гродзенскага дзяржаўнага медыцынскага і Гродзенскага дзяржаўнага аграрнага ўніверсітэтаў. На кожным з шасці этапаў яны паспаборнічалі ў веданні культуры і гісторыі Гародні: напрыклад, прайшлі літаратурнае бліцапытанне, станцавалі народныя танцы і адгадалі песні, звязаныя з Гродзеншчынай. За кожны правільны адказ каманды атрымлівалі адну “грашовую адзінку” квеста — 1 гранік. У фінале на заробленыя гранікі набывалі літары, каб скласці з іх ключавую фразу — “Грані творчасці”.
Так культурна-асветніцкая акцыя “Грані творчасці” чарговы раз стала нагодай для цэлай хвалі культурных мерапрыемстваў студэнцкай моладзі, якія дапамагаюць выхоўваць адукаваных і рознабаковых маладых людзей, павышаць цікавасць да культуры і мастацтва малой радзімы.
Мар’я ЯНКОВІЧ.