У абласным конкурсе песні на замежнай мове прынялі ўдзел старшакласнікі Гродзеншчыны.

Гэта ўжо чацвёрты названы конкурс. Сёлета ён праходзіў ды­станцыйна і быў арганізаваны галоўным упраўленнем адукацыі Гро­дзенскага абл­выканкама сумесна з Цэнтрам дашкольнай, агульнай сярэдняй і спецыяльнай адукацыі Гродзен­скага абласнога інстытута развіцця адукацыі з мэтай павышэння матывацыі вучняў да вывучэння замежных моў, развіцця іх творчых здольнасцей.

У конкурсе песні прынялі ўдзе­л 24 навучэнцы 9—11 класаў устаноў агульнай сярэдняй адукацыі з 18 раёнаў вобласці, сярод іх былі вакальна-эстрадны ансамбль, 4 дуэты і 19 сольных выканаўцаў. Яны прадставілі музычныя творы на англійскай, нямецкай, французскай і іспанскай мовах.

— Члены журы конкурсу адзначылі высокі ўзровень выканальніцкага майстэрства, артыстызм і моўную кампетэнцыю ўдзельнікаў. Вельмі ўразілі ўсіх выканаўцы, якія ў выніку і сталі пераможцамі, — адзначыла метадыст Цэнтра дашкольнай, агульнай сярэдняй і спецыяльнай адукацыі абласнога інстытута развіцця адукацыі Ірына Каскевіч. — Навучэнцы стварылі сапраўдныя творчыя нумары, па-майстэрску абыгралі сюжэты музычных твораў, падабралі касцюмы, была і гульня са святлом, і падтанцоўка. Здымалі не толькі ў памяшканні, але і на вуліцы.

Пераможцамі конкурсу песні на замежнай мове сталі навучэнец сярэдняй школы № 1 Ашмян Арцём Скараль і вучаніца сярэдняй школы № 8 Слоніма Таццяна Грыгорчык.

Дыпломамі II ступені ўзнагароджаны Ульяна Ельчанінава і Лізавета Каралёва (гімназія № 1 Ліды), Варвара Штэфірца (сярэдняя школа № 8 Гродна), Мікіта Трафімовіч і Паліна Каравайская (гімназія Шчучына), Карына Заўражана (сярэдняя школа № 5 Ваўкавыска).

У намінацыі “Лепшае валоданне замежнай мовай” перамагла вучаніца сярэдняй школы № 8 Гродна Варвара Штэфірца. А прыз сімпатый гледачоў па выніках анлайн-галасавання, у якім прынялі ўдзел 5350 чалавек, дастаўся вучаніцы гімназіі Смаргоні На­дзеі Шчарбачэвіч.

Ірына АНІКЕВІЧ.