Гуляй — вучы, гуляй — выхоўвай

Вынікі Рэспубліканскага конкурсу па распрацоўцы камп’ютарных гульняў патрыятычнай накіраванасці “ПАТРЫЁТ.by” падведзены ў рамках Рэспубліканскага тыдня тэхнічнай творчасці “Юнацтва. Інтэлект. Будучыня”. На працягу двух дзён (13 і 14 лістапада) 67 фіналістаў прадстаўлялі на суд журы свае праграмныя прадукты, якія раскрываюць сутнасць гістарычных падзей гераічнага мінулага беларускага народа, гісторыка-культурнай спадчыны краіны.

За камп’ютарнымі гульнямі значную частку свайго вольнага часу праводзяць дзеці, падлеткі, юнакі, дарослыя, магчыма, нават прадстаўнікі старэйшага пакалення. Камп’ютарным гульням усе ўзросты падуладныя. Факт, які наўрад ці можна змяніць. Змяніць можна толькі сутнасць і змест гульняў. Бяздумныя “стралялкі” і “брадзілкі” замяніць на гульні, якія будуць развіваць у геймераў логіку і мысленне, духоўна-маральныя якасці, здольнасць працаваць у камандзе, гордасць за мінулае краіны. Менавіта з гэтай мэтай Міністэрства адукацыі і Рэспубліканскі цэнтр інавацыйнай і тэхнічнай творчасці сёмы раз праводзілі конкурс “ПАТРЫЁТ.by”.

“У гэтым годзе канкурсанты асабліва адказна падышлі да распрацоўкі праектаў. Кожная работа закончаная, аформлена на высокім узроўні. Прыемна, што з кожным годам павялічваецца колькасць праграмных прадуктаў, створаных навучэнцамі сельскіх школ. Сёлета гэта асабліва было заўважна. Значыць, інфармацыйныя тэхналогіі актыўна ўкараняюцца не толькі ў абласных і раённых цэнтрах. Паралельна са стварэннем праграмных прадуктаў канкурсанты праводзяць актыўную даследчую работу: вывучаюць гісторыю, этнаграфію, фальклор Беларусі, біяграфіі вядомых людзей, падзеі Вялікай Айчыннай вайны. Конкурсныя работы актыўна выкарыстоўваюцца ў вучэбным і выхаваўчым працэсе ўстаноў агульнай сярэдняй і дадатковай адукацыі”, — паведаміла сакратар журы конкурсу Алена Віктараўна Гарбарэц.

Праграмныя прадукты актуальны не толькі сваёй тэматыкай, але і тэхнічнай часткай. Прадстаўленыя праекты адпавядаюць грамадзянска-патрыятычнай тэматыцы, напісаны з дапамогай любога даступнага праграмнага забеспячэння і прыдатны для прагляду не толькі на персанальным камп’ютары з аперацыйнай сістэмай Windows. У гэтым годзе заўважна павялічылася колькасць мабільных дадаткаў, прыдатных для сістэмы Android. Нават былі прадстаўлены гістарычныя аб’екты, раздрукаваныя на 3D-прынтары.

Пераможцай у намінацыі “О сколько нам открытий чудных готовит просвещенья дух…” стала камп’ютарная гульня “Квест — БелАЭС” навучэнца ліцэя № 1 Гродна Мікіты Крывені, якая ўяўляе сабой сайт. 1-е месца праекту ў малодшай узроставай групе (12—15 гадоў) было прысуджана невыпадкова. Па-першае, актуальная тэматыка, па-другое, цікавая форма падачы матэрыялу. З дапамогай тэстаў прапануецца прайсці некалькі ўзроўняў і азнаёміцца з дзейнасцю атамнай электрастанцыі, даведацца пра важнасць выкарыстання атама ў мірным жыцці. Мультымедыйны праект з’яўляецца ўніверсальным, яго можна выкарыстоўваць як вучэбны матэрыял і нават падчас экскурсій у Інфармацыйным цэнтры па атамнай энергіі Рэспубліканскага цэнтра інавацыйнай і тэхнічнай творчасці. Перспектывай развіцця праекта з’яўляецца стварэнне мабільнага дадатку.

У старэйшай узроставай групе (16—21 год) пераможцай у гэтай намінацыі стала работа “Віртуальнае падарожжа па палацы творчасці” навучэнкі Гомельскага дзяржаўнага абласнога палаца творчасці дзяцей і моладзі Ганны Цыганковай. Праект стаў своеасаблівым падарункам палацу да яго 80-годдзя. Здзейсніць віртуальнае падарожжа можа кожны. Для гэтага варта прайсці па адпаведных спасылках на сайце ўстановы дадатковай адукацыі.

Намінацыя, у якой канкурсанты расказваюць пра подзвіг народа ў гады Вялікай Айчыннай вайны, з’яўляецца традыцыйнай. Сёлета яе назва гучала так: “Их память вечно хранит обелисков гранит…”. Пераможцам у малодшай узроставай групе стаў калектыў навучэнцаў сярэдняй школы № 2 Мар’інай Горкі (Аляксей Коўшар, Раман Мачульскі, Максім Грошаў, Аляксей Хадыка) з праектам “И память в наших душах не сотрётся…”. У старэйшай узроставай групе дыплом І ступені атрымала распрацоўка мабільнага дадатку ў форме віктарыны-стратэгіі “Вучы — гуляй” Дзяніса Гарэліка, Мікалая Скоўпеня і Уладзіслава Аніскаўца з ліцэя № 1 Мінска. Больш падрабязна пра праекты прызёраў і пераможцаў мы абавязкова раскажам на старонках “Настаўніцкай газеты”.

Ігар ГРЭЧКА.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *