Экалагічнае выхаванне, прывіццё любові і павагі да роднага слова, псіхалагічны камфорт і развіццё лідарскіх якасцей — важныя кірункі, якім у сваёй дзейнасці аддаюць перавагу педагогі Барысава. З начальнікам упраўлення па адукацыі Барысаўскага райвыканкама Ірынай Садоўскай “Настаўніцкую газету” звязвае доўгае супрацоўніцтва.
— “Настаўніцкую” чытаю з задавальненнем, адзначаючы для сябе цікавыя ідэі і кірункі работы калег, — расказала Ірына Міхайлаўна. — Хочацца бачыць на старонках прафесійнага выдання матэрыялы і пра нашых педагогаў, чытаць навіны і дзяліцца перадавым вопытам настаўнікаў Барысава і раёна — ён у нас цікавы і багаты.
Фарматы традыцыйныя і новыя
Расказваючы пра асноўныя дасягненні, Ірына Садоўская звярнула ўвагу на тое, што педагогі Барысава аднымі з першых у вобласці сталі асвойваць STEM-адукацыю. Сёння гэта 6 устаноў, дзе ёсць інжынерна-тэхнічныя пляцоўкі, а таксама STEM-лабараторыя для дзяцей з АПФР, якая не так даўно пачала працаваць у Барысаўскім цэнтры карэкцыйна-развіццёвага навучання і рэабілітацыі.
— У нас арганізавана ўзаемадзеянне з Паркам высокіх тэхналогій, — дадала начальнік упраўлення па адукацыі. — Ідэі школьнікаў атрымліваюць высокую ацэнку: за 5 гадоў заваявана 47 дыпломаў рэспубліканскага і 61 — абласнога ўзроўню. Адным з асноўных прыярытэтаў з’яўляецца падтрымка інтэлектуальных дасягненняў навучэнцаў. У гэтым навучальным годзе нашы школьнікі паказалі выдатныя вынікі на алімпіядах і конкурсах рознага ўзроўню. Ганарымся навучэнцамі і іх настаўнікамі, якія добра прадставілі раён і Мінскую вобласць на рэспубліканскай алімпіядзе па вучэбных прадметах. Так, у нашай скарбонцы 45 дыпломаў на абласным і 8 — на заключным этапах алімпіяды. Прыемна, што за апошнія 5 гадоў пасведчанні спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў уручаны 34 навучэнцам.
У Барысаўскім раёне вялікае значэнне надаецца і развіццю творчых навыкаў, эстэтычнага інтэлекту дзяцей. У раёне 26 узорных і 10 народных творчых калектываў, сярод якіх заслужаны аматарскі калектыў, узорная мастацкая студыя “Палітра” і заслужаны аматарскі калектыў Рэспублікі Беларусь, узорны фальклорны калектыў “Берагіня”.
— Мы многа ўвагі ўдзяляем дадатковай адукацыі навучэнцаў, актыўна развіваем патрыятычнае выхаванне — гэта ўжо традыцыя, — дадала Ірына Міхайлаўна. — У нас 28 музеяў, тры з якіх носяць званне “народны”, 11 рэсурсных цэнтраў выхаваўчай накіраванасці, рэалізуецца праектная дзейнасць ад раённага да рэспубліканскага ўзроўню па розных напрамках выхаваўчай работы. Усё гэта не толькі прывяло да атрымання дыпломаў рознай вартасці, але і праяўляецца ў сацыяльнай актыўнасці моладзі. Колькасць маладых людзей, уцягнутых у розныя формы грамадска-палітычнага жыцця, а таксама ў грамадзянска-патрыятычную, сацыяльную і культурную дзейнасць, прыемна ўражвае.
Ужо зусім хутка па ўсёй краіне прагучаць апошнія званкі, пройдуць выпускныя балі. На Барысаўшчыне даўно жыве прыгожая традыцыя: выпускны праводзіцца на цэнтральнай плошчы горада, на пляцоўцы перад выканаўчым камітэтам.
— Такі фармат вельмі падабаецца і выпускнікам, і іх бацькам, — падзялілася назіраннямі Ірына Міхайлаўна. — Сёлета абавязкова прыдумаем нешта новае, каб прыемна здзівіць нашых адзінаццацікласнікаў. Пакуль не магу раскрыць усе сакрэты, але скажу, што гэта будзе цікава.
Калектыў аднадумцаў
Яшчэ адно актуальнае пытанне, якое было абмеркавана з Ірынай Садоўскай, — добраўпарадкаванне школьных тэрыторый. Да гэтай справы з задавальненнем далучаюцца і бацькі. Напрыклад, у сярэдняй школе № 24 Барысава дарослыя прыносілі мнагалетнія расліны, каб зрабіць тэрыторыю ўстановы больш прывабнай, а Кішчынаслабадской сярэдняй школе былы вучань прэзентаваў саджанцы ягадных культур.
— Дасягаць намечаных планаў дазваляе калектыў прафесійных, ініцыятыўных, адказных кіраўнікоў і педагагічных работнікаў, інавацыйны характар адукацыйнай дзейнасці, — зазначыла Ірына Міхайлаўна Садоўская. — Сёння сістэма адукацыі Барысаўскага раёна працягвае сваё развіццё ў адпаведнасці з запытамі, якія паступаюць, і патрэбамі, якія ўзнікаюць. Нашы галоўныя задачы — фарміраванне актыўнай грамадзянскай пазіцыі вучняў, выхаванне патрыётаў і забеспячэнне краіны кваліфікаванымі кадрамі.
Актуальнымі пытаннямі ў бягучым годзе застаюцца захаванне бяспекі дзяцей ва ўстановах адукацыі і прафілактыка дзіцячага траўматызму, павышэнне якасці харчавання ва ўстановах адукацыі, далейшае развіццё інклюзіўнага адукацыйнага асяроддзя. На парадку дня — умацаванне матэрыяльна-тэхнічнай базы ўстаноў адукацыі за кошт аснашчэння сучаснымі сродкамі навучання.
Наталля САХНО
Фота Алега ІГНАТОВІЧА
