На карэкцыйна-развіццёвых занятках актыўна звяртаюся да пясочнай арт-тэрапіі. Спачатку прапаную дзецям стварыць карціну свайго настрою з дапамогай цацак, якія найбольш падабаюцца. Затым вучу маляваць хвалістыя лініі на пяску, пакідаць на ім сляды, адлюстроўваць розныя фігуры.
Дзякуючы пяску, ажываюць казкі, дзеці становяцца рэжысёрамі розных гісторый і адразу бачаць вынікі сваёй працы. Зрабіць гэта дапамагаюць сухі і вільготны пясок, вада і калекцыя мініяцюрных фігурак.
У казачную краіну дашкольнікі адпраўляюцца разам з Пясочным чалавекам — ахоўнікам чароўнай пясочніцы. Малышы ствараюць падводны свет, садок будучыні, краіну чароўных чалавечкаў і прынцэс…
Пясочная арт-тэрапія развівае творчае ўяўленне, мысленне і дробную маторыку. З дапамогай казкі дзеці пазбаўляюцца сарамлівасці і нерашучасці, закамплексаванасці. Гульня з пяском дапамагае выказаць тое, што малыш пакуль сам не ўсведамляе і не разумее.
Лілія КНУРЭНКА,
педагог-псіхолаг ясляў-сада № 4 Ганцавіч.
