Аднайменны праект, арганізаваны Міністэрствам інфармацыі сумесна з Нацыянальнай кніжнай палатай і Нацыянальнай бібліятэкай, стартаваў днямі ў выставачнай зале “алмаза ведаў”. Гэты год для айчыннага кнігавыдання стаў вельмі плённым. У рэспубліцы выдавецкай дзейнасцю займаецца звыш 500 суб’ектаў гаспадарання, дзякуючы якім сёлета выдадзена больш за 9 тысяч кніг агульным тыражом звыш 20 млн экзэмпляраў. Найлепшыя кнігі 2019 года прадстаўлены на выстаўцы, якая будзе працаваць да лютага.

“Такая сустрэча — гэта даніна павагі нашым майстрам прыгожага пісьменства, літаратарам, кнігавыдаўцам — лю­дзям, якія робяць значны ўклад у развіццё айчыннай літаратуры і культуры ў цэлым. Прэзідэнт нашай краіны падкрэслівае, што культура — гэта падмурак, на якім фарміруецца і развіваецца нацыя. І кніжнае слова, слова пісьмен­ніка ў гэтым няпростым працэсе займае адно з вядучых месцаў. Таму вельмі важна, у тым ліку на дзяржаўным узроўні, падтрымліваць кнігавыдавецкую справу, спрыяць яе пашырэнню, ствараць належныя ўмовы для папулярызацыі кніжнага чытання, — адзначыў намеснік кіраўніка Адміністрацыі прэзідэнта Андрэй Кунцэвіч. — Беларускую кнігу пава­жаюць і ведаюць не толькі ў нашай краіне, але і за яе межамі, пра што яскрава свед­чаць вынікі Міжнароднага конкурсу краін СНД “Мастацтва кнігі”, дзе сярод дзяржаў Садружнасці па колькасці ўзнагарод за 16 гадоў яго правя­дзення Беларусь займае першае месца. Гэта стала магчымым дзякуючы руплівай працы вялікай колькасці пісьменнікаў, кнігавыдаўцоў, Міністэрства інфармацыі і Міністэрства культуры”.

Кніжны праект аб’яднаў і сабраў на адзінай выставачнай прасторы сотні выдаўцоў дзяржаўнай і прыватнай форм уласнасці, грамадскіх і рэлігійных аб’яднанняў, індывідуальных прадпрымальнікаў, якія прадставілі свае сёлетнія выданні. Новы фармат кніжнай падзеі закліканы падкрэсліць значэнне кнігі, культуры чытання, ролі кнігавыдаўцоў, аўтараў у стварэнні багажу ведаў жыхароў маладой суверэннай беларускай дзяржавы.

Намеснік міністра інфармацыі Ігар Бузоўскі звярнуў увагу на тое, што на свята кнігі запрошаны выдавецтвы як дзяржаўныя, так і прыватныя. “Сярод кніг, што прадстаўлены тут, — зусім невялікі працэнт выданняў падведамасных нам дзяржаўных выдавецтваў, а астатнія — гэта прыватныя кнігавыдаўцы. Я спадзяюся, што тыя вынікі, якія мы маем сёння, будуць развівацца, бо пляцоўка для гэтага створана, — сказаў Ігар Бузоўскі і раскрыў галоўную інтрыгу мерапрыемства, назваўшы самую папулярную кнігу года. — Найбольш папулярных аўтараў і кнігі вельмі складана выбіраць. Мы ўзялі аналітыку з OZ.by, “Белкнігі”, “Саюздруку”, іншых кнігагандлёвых арганізацый адносна таго, колькі кніг было набыта, якіх аўтараў, якая кніга была найбольш запатрабаванай у 2019 годзе. У выніку перамагла кніга Уладзіміра Караткевіча “Каласы пад сярпом тваім” выдавецтва “Папуры”, што вельмі сімвалічна напярэдадні 90- годдзя класіка, якое мы будзем адзначаць у наступным годзе”.

Старшыня Саюза пісьменнікаў Беларусі Мікалай Чаргінец адзначыў, што айчынныя аўтары стварылі ў 2019 годзе звыш 100 кніг для дзяцей і варта больш увагі ўдзяляць літаратуры для падрастаючага пакалення і па гісторыі нашай краіны. А настаяцель храма-помніка ў гонар Усіх Святых протаіерэй Фёдар Поўны звярнуў увагу на тое, што выкладанню літаратуры ў школе ўдзяляецца ўсё менш увагі. “На жаль, кніга перастала сеяць разумнае, добрае, вечнае, а лю­дзі здрабнелі. І справа не ў тым, што няма дастойных кніг, а ў тым, што няма чытачоў дастойных кніг, але ў гэтым вінаваты мы самі, бо школы зараз сталі менш вучыць чытаць, — лічыць ён. — Давайце гадаваць чытача, пачынаючы з дзіцячага садка, і выхоўваць аўтараў высокай культуры”. Намеснік старшыні Беларускага саюза жанчын Лілія Ананіч расказала пра новы сацыяльна-творчы праект “Сямейнае чытанне”, які ладзіцца сумесна з Мінінфармацыі. “У грамадстве трэба ўзмацняць работу з кнігай, каб кніга была ў кожнай сям’і”, — дадала яна.

Прадстаўнікам вядучых выдавецтваў уручылі дыпломы за выпуск у 2019 годзе самай вялікай колькасці выданняў па тыражы (Нацыянальнаму інстытуту адукацыі), па назвах (ТДА “Аверсэв”), за папулярызацыю беларускай мовы (выдавецтву “Мастацкая літаратура”), за выпуск кніг, прысвечаных 75-годдзю вызвалення Беларусі ад нямецка-фашысцкіх захопнікаў (выдавецтву “Беларуская энцыклапедыя імя Петруся Броўкі”), прэзентацыйных выданняў.

Да таго ж арганізатарамі кніжнага свята і выдавецтвамі Беларусі ў рамках навагодняй дабрачыннай акцыі “Нашы дзеці” была падорана бібліятэчка дзіцячай літаратуры Бялыніцкай дапаможнай школе-інтэрнату. Дарэчы, менавіта ў Бялынічах у 2020 годзе будзе адзначацца Дзень беларускага пісьменства. Акрамя таго, усім гасцям і ўдзельнікам мерапрыемства быў паказаны спектакль-мюзікл “Пясняр”. Пастаноўка Нацыянальнага акадэмічнага драматычнага тэатра імя Максіма Горкага прысвечана народнаму артысту СССР Уладзіміру Мулявіну, дзякуючы якому беларуская паэзія і песня сталі часткай сусветнай культуры.

“Сёння ў нашай бібліятэцы распачата яшчэ адна традыцыя кніжнай культуры Беларусі, — адзначыў дырэктар Нацыянальнай бібліятэкі Раман Матульскі. — Мне хацелася б, каб падчас работы выстаўкі гэтае месца стала пляцоўкай для сустрэч аўтараў, кнігавыдаўцоў. Давайце сустракацца, каб наша кніга 2020 года была яшчэ лепшай”.

Вольга АНТОНЕНКАВА.
Фота аўтара.