Шмат гадоў Сяргей Шамінскі стварае выдатныя графічныя партрэты, прыгожыя пейзажы, нацюрморты і вучыць маляваць сваіх вучняў. А сёння ўсім цікавыя сталі штрыхі да партрэта яго самога — чалавека, які стаў настаўнікам года — 2023.
Прызнаюся шчыра, калі пісала артыкул пра настаўніка выяўленчага мастацтва Доўскай сярэдняй школы Рагачоўскага раёна Сяргея Шамінскага як пра пераможцу абласнога этапу конкурсу “Настаўнік года”, неяк зусім не думалася, што менавіта яму ў рэшце рэшт дастанецца самы галоўны тытул. Чалавек ён вельмі сціплы, творчы, пра такіх людзей кажуць: зорак з неба не хапае. Але тое, што зоркі ў фінале рэспубліканскага конкурсу сышліся менавіта на ім — гэта вяршыня справядлівасці! Бо ён з вялікай літары не толькі Настаўнік, але і Чалавек.
Сяргей Міхайлавіч шчыра і па-сапраўднаму любіць сваю краіну, асабліва малую радзіму — вёску Доўск. Калі скончыў мастацка-графічны факультэт Віцебскага дзяржаўнага педагагічнага ўніверсітэта імя С.М.Кірава, яму прапаноўвалі застацца там працаваць. Але ён вярнуўся дадому. У Доўскай сярэдняй школе выкладае ўжо 33 гады і ніколі не шкадаваў аб сваім выбары.
Перад яго адданасцю працы трэба ў знак павагі зняць капялюш ці, як гэта прынята зараз у маладога пакалення, навушнікі. У сваёй роднай школе Сяргей Шамінскі выкладае выяўленчае мастацтва, айчынную і сусветную мастацкую культуру, чарчэнне, працоўнае навучанне, шмат гадоў вядзе аб’яднанне па інтарэсах “Юны мастак”. Паспявае дапамагчы і суседняй Серабранскай базавай школе, дзе адказвае за працоўнае навучанне.
Пад чулым кіраўніцтвам настаўніка дзеці асвойваюць цікавыя сучасныя жанры творчасці, такія як роспіс птушыных пёраў, камянёў, электрычных лямпачак, а лепшыя работы Сяргей Міхайлавіч потым аб’ядноўвае ў выставы з крэатыўнымі экспазіцыямі і сапраўднымі афішамі. Ён нязменны вядучы выпускных вечароў, іншых школьных свят, якія часта ўпрыгожвае выкананнем песень пад гітару. Летам кіруе лагерам працы і адпачынку, дзе разам з дзецьмі рамантуе школьную мэблю, трымае ў парадку тэрыторыю. У складзе творчай групы працаваў над стварэннем экспазіцый Музея сістэмы адукацыі Рагачоўскага раёна. І гэта далёка не ўсе грані яго дзейнасці.
Нават у самых маленькіх сваіх вучнях настаўнік бачыць перш за ўсё асобу. Імкнецца зразумець унутраны свет дзіцяці, тонкасці яго душэўнай арганізацыі, падтрымаць і натхніць. Кожны ўрок пачынае з жартаў, каб узняць вучням настрой. Нядзіўна, што яны цягнуцца да яго і не забываюць нават праз дзесяцігоддзі.
А яшчэ Сяргей Шамінскі — цудоўны муж і бацька дзвюх дачок. З малодшай ён быў у дэкрэтным водпуску і лічыць гэта выдатным вопытам, які параіў бы кожнаму мужчыну.
У нашай гутарцы пасля абвяшчэння вынікаў конкурсу “Настаўнік года” педагог прызнаўся, што стаць пераможцам ганарова і адказна. Наперадзе чакае шмат цікавага: сустрэчы з калегамі, дзе зможа падзяліцца прафесійным вопытам, выступленні перад моладдзю, удзел у грамадскіх мерапрыемствах. Ён падкрэсліў, што гэтай перамогі не было б без каманды аднадумцаў, якім вельмі ўдзячны. Гэта і калегі з роднай Рагачоўшчыны, і спецыялісты сістэмы адукацыі абласнога ўзроўню. Неацэнную падтрымку аказалі жонка і дочкі.
Раней у сям’і не было аўтамабіля, так што галоўны прыз конкурсу — новенькі “Джылі” — стаў вельмі прыемным падарункам. Цяпер разам з жонкай будуць вырашаць, каму атрымліваць вадзіцельскае пасведчанне і садзіцца за руль. Яшчэ адзін каштоўны падарунак — ноўтбук — настаўнік будзе выкарыстоўваць для работы, а малодшая дачка, якая вучыцца ў 10 класе, — для вучобы.
Фота Алега ІГНАТОВІЧА
