Дыпломам І ступені конкурсу “Камп’ютар. Адукацыя. Інтэрнэт” адзначана распрацоўка настаўніцы матэматыкі і інфарматыкі сярэдняй школы № 23 Магілёва Вольгі Лісоўскай “Лічбавы клас: падарожжа з матэматыкай”.
Па словах Вольгі Валер’еўны, стварэннем курсаў у інтэрнэце яна займаецца з 2009 года. Спачатку быў распрацаваны курс у сістэме Moodle па інфарматыцы, які быў разлічаны на навучэнцаў спартыўных класаў, якія часта бываюць на трэніроўках, а таксама на школьнікаў, якія па хваробе або па іншай уважлівай прычыне адсутнічалі на ўроках. Курс утрымліваў відэаўрокі, лекцыі, практычныя заданні. Пасля гэтага быў створаны сайт школы, на якім на старонцы настаўніцы па ўсіх тэмах па інфарматыцы з 6 па 11 клас былі размешчаны тэарэтычны, практычны блок і тэставыя заданні на замацаванне.
— Напрыканцы жніўня мінулага года, калі паўстаў выбар, якія заняткі праводзіць у 6 класе па матэматыцы, я прыняла рашэнне арганізаваць факультатыўны курс “Падарожжа з матэматыкай”. А каб гэтыя заняткі праходзілі цікава і запамінальна, вырашыла стварыць лічбавы рэсурс, які можна было б выкарыстоўваць у рабоце, — расказвае Вольга Лісоўская. — Неабходна было выканаць вялікі аб’ём работы. Аднак калі ты прыходзіш у клас і бачыш, як у дзяцей гараць вочы і з якой ахвотай яны бяруцца за заданні, разумееш, што гэта таго варта.
Сайт створаны на платформе Google і называецца “Лічбавы клас”. Сярод яго асноўных задач — стварэнне спрыяльных умоў для інтэлектуальнага развіцця навучэнцаў у адпаведнасці з іх мэтамі, здольнасцямі і патрэбамі, для максімальнага засваення матэматыкі.
— Ні для каго не сакрэт, што імклівае развіццё лічбавых тэхналогій прывяло да таго, што вялікую колькасць часу нашы навучэнцы праводзяць у гаджэтах. А калі гэта будуць адукацыйныя рэсурсы, такія як віктарыны, галаваломкі, квест-пакоі, а не проста гульні, мы, настаўнікі, скарэкціруем і накіруем выкарыстанне вучнямі электронных прылад у рэчышча адукацыі і выхавання, — заўважае Вольга Валер’еўна, гаворачы аб актуальнасці распрацоўкі.
Лічбавы курс складаецца з 9 тэм, сярод якіх — “Падарожжа ў свет дзесятковых дробаў”, “Падарожжа па дарогах грашовых сістэм мер”, “Падарожжа па часе” , “Падарожжа ў краіну займальных працэнтаў” і інш. Дарэчы, тэмы сфарміраваны ў адпаведнасці з вучэбнай праграмай.
Усе тэмы рэсурсу пабудаваны па адзіным алгарытме: спачатку навучэнцы даведваюцца, што яны будуць вывучаць, ведаць, умець; затым дэманструецца відэаматэрыял па тэорыі, выконваецца заданне пасля прагляду; разглядаюцца прыклады рашэння, пасля чаго прапаноўваюцца задачы для самастойнага рашэння, а таксама цікавыя заданні і галаваломкі. Так, напрыклад, адкрываючы тэму 2 “Падарожжа ў галіну адносін і прапорцый”, навучэнец бачыць, што пасля яе засваення ён будзе ведаць гістарычныя звесткі па гэтай тэме, уласцівасці прапорцыі, умець знаходзіць невядомы член прапорцыі, вызначаць від прапарцыянальнасці пры рашэнні тэкставых задач, рашаць практыка-арыентаваныя задачы з міжпрадметным зместам, аналізаваць і даследаваць атрыманыя вынікі, прымяняць у гульні набытыя навыкі. Потым школьніку прапануецца відэа па тэорыі “Падарожжа ў галіну адносін і прапорцый”, а пасля яго — заданні, створаныя на сэрвісе Learningapps.org. Далей вучань бачыць прыклады рашэння задач з выкарыстаннем прапорцый і спрабуе свае сілы ў самастойным рашэнні задач.
Самымі прыцягальнымі для вучняў з’яўляюцца займальныя заданні і галаваломкі. Першы блок “Квест-пакой”, створаны з дапамогай сэрвісу Learnis.ru, другі блок “Віктарыны і галаваломкі”, распрацаваны з дапамогай сэрвісу Wordwall.net, — гэта яркія агучаныя заданні на замацаванне матэрыялу. Прычым адказы наўгад не пройдуць, заданні патрабуюць сур’ёзнага рашэння. У канцы прапрацоўкі тэмы школьнікам прапануецца выніковы тэст. Ён створаны пры дапамозе Google-форм.
— Паколькі рэсурс распрацаваны для выкарыстання на факультатыўных занятках, то прапанаваныя заданні носяць не ацэначны характар, а больш матывацыйны. Пасля рашэння задач вучні бачаць працэнт выканання, свае памылкі і рэйтынг. Педагог таксама можа паглядзець усю неабходную статыстычную інфармацыю: хто з вучняў і калі заходзіў на рэсурс, колькі працаваў, якія памылкі зрабіў і г.д., — адзначае Вольга Лісоўская.
Аўтар плануе, што рэсурс будзе развівацца і напаўняцца новым зместам.
Наталлі КАЛЯДЗІЧ.
