Майстар на ўсе рукі!

Менавіта так гавораць пра музычнага кіраўніка Таццяну Георгіеўну Цітко з ясляў-сада № 3 Ляхавіч калегі, дзеці і іх бацькі.

— Творчы патэнцыял гэтага вопытнага педагога невычарпальны, — упэўнена загадчыца ясляў-сада Л.Ю.Мяжуева. — Таццяна Георгіеўна піша вершы і казкі, музыку да сваіх песень. Так, песня “Ляхавічы” на працягу многіх гадоў з’яўляецца гімнам выпускнікоў нашай дашкольнай установы.

Па словах Л.Ю.Мяжуевай, заняткі педагога вылучаюцца навізной і арыгінальнасцю. Таццяна Георгіеўна стварае аптымальныя ўмовы для развіцця музычных здольнасцей дзяцей з улікам іх індывідуальных асаблівасцей, актыўна далучае дашкольнікаў да нацыянальнай культуры і культуры, традыцый іншых народаў.

— Кожны выхавальнік ясляў-сада заўсёды можа звярнуцца да музычнага кіраўніка па дапамогу ў падрыхтоўцы і правядзенні мерапрыемстваў па розных відах дзіцячай дзейнасці, — расказвае Л.Ю.Мяжуева. — Таццяна Георгіеўна ахвотна дае каштоўныя парады калегам, дзеліцца з імі тэарэтычным і практычным матэрыялам. За шматгадовую работу педагог назапасіла шмат цікавых напрацовак па песенна-гульнявой творчасці дашкольнікаў. Дзякуючы актыўнай дзейнасці музычнага кіраўніка, выхаванцы ясляў-сада займалі прызавыя месцы ў раённых конкурсах “Лепшы кніжны куток”, “Лепшы куток прыроды”, “Энергамарафон”, “Сучасныя гульні дашкольнікаў” і “Бяспечнае дзяцінства”.

Высокі прафесіяналізм, пастаянны творчы пошук, ініцыятыва, карэктнасць, сціпласць, чуласць і вялікая любоў да педагогікі — вызначальныя рысы Т.Г.Цітко.

Сяргей ГРЫШКЕВІЧ.

Пакінуць каментарый

Ваш электронны адрас не будзе апублікаваны. Абавязковыя палі пазначаны *