Нягледзячы на майскія замаразкі, настаўнікі і вучні Прыбалавіцкай сярэдняй школы Лельчыцкага раёна паспяхова ўпрыгожваюць тэрыторыю ўстановы адукацыі разнастайнымі кветкамі. Падрабязнасці — у матэрыяле карэспандэнта “Настаўніцкай газеты”.
— На жаль, высаджаныя намі ў красавіку петуніі, аксаміткі загінулі. Але мы не адчайваемся. Цяпер каля школьнага будынка красуюцца ружовыя флоксы, аранжавыя цюльпаны. Калі ж прыйдзе ўстойлівае цяпло, высадзім іншыя кветкі, — паведаміла намеснік дырэктара па вучэбна-выхаваўчай рабоце Ірына Іванаўна Лісіцкая.
Юная гаспадыня — вучаніца 8 класа Мілана Акуліч
Не толькі клумбы ўпрыгожваюць школьны двор. У Год добраўпарадкавання ствараюцца дзве зоны. Першая — для адпачынку дзяцей. Тут з’явяцца малыя архітэктурныя формы, лаўкі, невялікая сажалка. Другая — патрыятычная, прысвечаная 80-годдзю Вялікай Перамогі, — будзе адметна арыгінальнай клумбай у выглядзе зоркі і Вечнага агню. Таксама на прышкольным участку вырошчваюць агародніну.
Прыбіральшчыца службовых памяшканняў Кацярына Лозка з вучнямі 9 класа
— Мэта стварэння такой прыгажосці не толькі эстэтычная. На працягу вясны, лета і восені выхоўваем у дзяцей працавітасць. Малодшыя школьнікі вучацца даглядаць кветкі, а пачынаючы з 6 класа працуюць на прышкольным участку. За кожным класам замацаваны асобныя градкі, на якіх растуць цыбуля, буракі, морква, бульба. Разам з класнымі кіраўнікамі на працягу лета дзеці займаюцца праполкай. Яны не толькі праходзяць вытворчую практыку, але і прывучаюцца да працы на зямлі. Адказвае за гэтую справу настаўніца біялогіі Ірына Міхайлаўна Грэчка, — дадала дырэктар школы Любоў Пятроўна Акуліч.
Вырашчаная агародніна паступае ў школьную сталовую, але перад гэтым, як і належыць, сабраны ўраджай захоўваецца ў склепе. Гаспадарчае збудаванне таксама мае адметны выгляд — на ім узвышаецца своеасаблівае бетоннае сонца з такімі ж бетоннымі, але не шэрымі, а ярка-жоўтымі промнямі.
Прыбалавіцкія педагогі і іх выхаванцы, а таксама тэхнічныя работнікі школы не забываюць і пра добраўпарадкаванне населенага пункта. Удзел у акцыях “Чыстая вуліца”, “Чысты аграгарадок”, “Абеліск” стаў неад’емнай часткай школьнага жыцця.
Ігар ГРЭЧКА
Фота аўтара
