Мігрантаў будуць стрымліваць “не сцяной”

Улады Аўстрыі сур’ёзна падумваюць аб узвядзенні “тэхнічнага бар’ера” ўздоўж граніцы са Славеніяй, каб аслабіць паток мігрантаў. Аб гэтым паведамляюць інфармагенцтвы са спасылкай на заяву міністра ўнутраных спраў краіны Іаханы Мікль-Ляйтнер.

Прадстаўляючы планы свайго ўрада, міністр пазбягала слова “сцяна”, робячы ўпор на тым, што гэты нейкі “тэхнічны бар’ер” прызначаны не закрываць дарогу, а стрымліваць мігрантаў. Яна ўдакладніла, што такая мера дасць магчымасць кантраляваць шматтысячны міграцыйны паток, які безупынна цячэ ў краіну. Аб закрыцці граніцы размовы не ідзе.
“Вядома ж, мы не збіраемся будаваць сцяну ўздоўж усёй граніцы з Венгрыяй і Славеніяй, паколькі 700 км сцяны — гэта нерэальна. Але мы павінны быць гатовы па абодва бакі граніцы спланаваць структурныя меры, якія гарантуюць кантралюемы паток людзей”, — дадала Іахана Мікль-Ляйтнер.
Калі можа пачацца будаўніцтва “не сцяны”, пакуль невядома.
Еўракамісія заявіла, што цяперашні міграцыйны крызіс у свеце найбуйнейшы з часоў Другой сусветнай вайны.