Многія выбаршчыкі прывыклі ўжо галасаваць датэрмінова

У першы дзень датэрміновага галасавання на выбарах дэпутатаў мясцовых Саветаў Беларусі прагаласавалі 4,44 працэнта грамадзян, унесеных у спісы выбаршчыкаў. Аб гэтым паведамілі ў ЦВК.

У Брэсцкай вобласці 13 лютага прагаласавалі 3,4 працэнта выбаршчыкаў, у Віцебскай — 4,73 працэнта, у Гомельскай — 4,18 працэнта, у Гродзенскай — 3,86 працэнта, у Мінскай — 4,09 працэнта, у Магілёўскай — 4,68 працэнта і ў Мінску — 5,76 працэнта.

Датэрміновае галасаванне на выбарах дэпутатаў мясцовых Саветаў 28-га склікання пачалося 13 лютага. Адкрыліся 5620 участкаў, у асноўны дзень выбараў іх будзе на 250 больш. Прагаласаваць датэрмінова можна будзе па 17 лютага ўключна з 10.00 да 14.00 і з 16.00 да 19.00. Як растлумачылі ў Цэнтрвыбаркаме, такое права прадастаўлена выбаршчыкам, якія ў дзень выбараў не будуць знаходзіцца па месцы свайго жыхарства. Пры гэтым афіцыйнага пацвярджэння прычын немагчымасці прыйсці на ўчастак для галасавання ў дзень выбараў не патрабуецца. Тым, хто 18 лютага будзе за мяжой, у ЦВК рэкамендуюць пры наяўнасці магчымасці прагаласаваць датэрмінова, паколькі ў адрозненне ад выбараў прэзідэнта і дэпутатаў Палаты прадстаўнікоў на выбарах у мясцовыя Саветы стварэнне ўчасткаў для галасавання за межамі краіны не прадугледжана.

Кіраўнік Цэнтрвыбаркама Лідзія Ярмошына ў эксклюзіўным інтэрв’ю тэлеканалу “Беларусь 1” заявіла, што прагназуе высокую яўку выбаршчыкаў у час датэрміновага галасавання на выбарах дэпутатаў мясцовых Саветаў. “Звычайна ў нас каля 30 працэнтаў выбаршчыкаў прыходзяць галасаваць датэрмінова. Думаю, што нічога не зменіцца і на гэты момант. Мы дзесьці на такую лічбу і выйдзем. Можа, гэта будзе 25 працэнтаў, можа, 32 працэнты. Цяжка сказаць”, — выказала меркаванне Лідзія Ярмошына.

Яна адзначыла, што многія выбаршчыкі прывыклі ўжо галасаваць датэрмінова. Кіраўнік Цэнтрвыбаркама сама таксама будзе па традыцыі галасаваць датэрмінова.

Мясцовыя выбары ў Беларусі назначаны на 18 лютага. Кандыдатамі ў дэпутаты, паводле апошніх даных, зарэгістраваны больш за 22,2 тысячы чалавек. Увогуле паміж удзельнікамі кампаніі будзе размеркавана крыху больш за 18 тысяч мандатаў.