Макеты зброі і тэхнікі, воінская форма, ордэны і медалі розных часоў. У Клімавіцкім дзяржаўным аграрным каледжы прадстаўлена звыш 1000 разнастайных экспанатаў, звязаных з ваеннай гісторыяй. Музейны куток уласнаручна зрабіў кіраўнік па ваенна-патрыятычным выхаванні ўстановы Андрэй Новікаў. Падрабязнасці — у матэрыяле карэспандэнта “Настаўніцкай газеты”.
— За дваццаць гадоў у педагогіцы заўважыў, што нагляднасць — важны фактар паспяховага навучання. Магчымасць убачыць на свае вочы прадметы даўніны дазваляе навучэнцам па-іншаму зірнуць на гістарычныя факты. На падставе гэтага і ўзнікла ідэя стварэння музейнай экспазіцыі. Дома абсталяваў майстэрню, рабіў макеты зброі і тэхнікі. Многае прыносілі неабыякавыя людзі, нешта набываў на спецыяльных сайтах, дзяліліся сямейнымі рэліквіямі і самі навучэнцы, — расказаў Андрэй Мікалаевіч.
Агульная захопленасць дазволіла стварыць не адну, а адразу тры экспазіцыі. На стэндах і стэлажах кабінета дапрызыўнай падрыхтоўкі каледжа адлюстравана ваенная гісторыя пачынаючы з Сярэднявечча.
— Самастойна выкаваў розныя рыцарскія мячы, баявы молат, алебарду, мушкеты. Зрабіў муляжы ўсёй лінейкі воінскіх узнагарод дарэвалюцыйнага перыяду, — паведаміў Андрэй Новікаў.
Асаблівую ўвагу педагог удзяляе зоне, прысвечанай Вялікай Айчыннай вайне. Ён перакананы: моладзь павінна ведаць, як дасталася Перамога, і захоўваць памяць аб подзвігах салдат-герояў.
— У нас сабрана ўся калекцыя ордэнаў і медалёў, воінская форма, мноства гістарычных артэфактаў. Напрыклад, ёсць арыгіналы лістовак нямецка-фашысцкіх захопнікаў. Прыведзены там тэкст заўсёды зачытваю на занятках, пасля чаго разам з навучэнцамі глядзім рэальную кінахроніку. Гітлераўцы заклікалі пераходзіць на іх бок, абяцалі шчаслівае жыццё, пры гэтым ажыццяўлялі генацыд беларускага народа. Такія моманты аказваюць істотнае эмацыянальнае ўздзеянне на навучэнцаў, дазваляюць ім выразна ўсвядоміць каштоўнасць сённяшняга міру, — адзначыў Андрэй Мікалаевіч.
У музейным кутку знайшлося месца і для сучасных рэалій, дзе можна ўбачыць узбраенне арміі незалежнай Беларусі. Тут ёсць макеты снайперскай вінтоўкі, аўтамата, гранатамёта і нават пераноснага зенітна-ракетнага комплексу. Важна, што абсалютна ўсе экспанаты выкарыстоўваюцца ў вучэбным працэсе: навучэнцы вучацца абыходзіцца са зброяй, знаёмяцца з воінскімі званнямі, вывучаюць гістарычнае мінулае на канкрэтных прыкладах.
— Ваенна-патрыятычнае выхаванне сёння мае першаснае значэнне. Па гэтай прычыне ў найбліжэйшых планах — адкрыць асобны музей, прысвечаны падзеям Вялікай Айчыннай вайны. Экспанатаў назапасілася больш чым дастаткова. Адпаведнае памяшканне падрыхтавана, засталося ўсё аформіць. Хочам зрабіць акцэнты на кожным ваенным годзе, вылучыць экспазіцыі пра генацыд беларусаў і Перамогу, — падкрэсліў Андрэй Новікаў. — Значнай падзеяй у новым навучальным годзе для каледжа стане адкрыццё ваенна-патрыятычнага клуба “За Радзіму”. Упэўнены, гэтае фарміраванне яшчэ больш паўплывае на выхаванне ў маладога пакалення гордасці і адданасці сваёй Айчыне.
Ганна СІНЬКЕВІЧ
Фота аўтара і з архіва героя
