На Светлагоршчыне стартуе Год прафесійных зносін

“Сістэма адукацыі Светлагорскага раёна дынамічна развіваецца. Сёння мы не стаім на месцы: рэалізоўваем інавацыйныя праекты, удзяляем вялікую ўвагу развіццю інфармацыйных тэхналогій, якія з’яўляюцца магутным сучасным сродкам павышэння эфектыўнасці адукацыйнага працэсу, ствараем умовы для падтрымкі і развіцця адораных і высокаматываваных дзяцей”, — расказвае госць нашай “Суботняй планёркі” начальнік аддзела адукацыі Светлагорскага райвыканкама Жанна Васільеўна ЧЭРКАС.

— Раёну ёсць чым ганарыцца. У мінулым навучальным годзе  8 навучэнцаў устаноў агульнай сярэдняй адукацыі адзначаны прэміяй спецыяльнага фонду Прэзідэнта Рэспублікі Беларусь, 3 навучэнцы — прэміяй Гомельскага аблвыканкама. У скарбонцы перамог раёна — 38 дыпломаў абласнога і 6 дыпломаў заключнага этапу рэспубліканскай алімпіяды, 45 дыпломаў трэцяга этапу абласной алімпіяды сярод навучэнцаў 4—9 класаў.

Стабільна добрыя вынікі паказваюць навучэнцы ў інтэрнэт-алімпіядах (10 дыпломаў), у абласных навукова-практычных канферэнцыях (8 дыпломаў), у даследчых конкурсах эколага-біялагічнай і краязнаўчай накіраванасці (4 дыпломы), інтэрнэт-віктарынах (15 дыпломаў), у абласных, рэспубліканскіх конкурсах па вучэбных прадметах  (58 дыпломаў). Двое вучняў раёна сталі прызёрамі на алімпіядзе школьнікаў Саюзнай дзяржавы “Расія і Беларусь: гістарычная і духоўная еднасць”.

Радуюць нас выступленні выпускнікоў на цэнтралізаваным тэсціраванні. Па выніках гэтага года раён займае другую пазіцыю ў вобласці (сярэдні бал — 60,42). Атрыманы стабальны вынік па матэматыцы.

Не застаюцца ўбаку і ўстановы дашкольнай адукацыі. Самай яркай па­дзеяй па выніках работы 2018 года стала занясенне дашкольнага цэнтра развіцця дзіцяці № 1 на Дошку гонару Гомельскай вобласці ў намінацыі “Лепшая ўстанова дашкольнай адукацыі”.

Важнае месца займае выхаваўчая работа. Дзякуючы творчаму падыходу педагогаў да пазаўрочнай занятасці, навучэнцамі раёна заваявана 204 дыпломы, з іх 159 — абласнога ўзроўню і 45 — рэспубліканскага, што дазволіла Светлагорскаму раёну за­няць 3-ю пазіцыю ў вобласці.

— Жанна Васільеўна, як было арганізавана летняе аздараўленне дзяцей?

— Улетку была рэалізавана раённая акцыя “Лета ў СВЕТЛЫМ”. У рамках праекта адбыліся выступленні агітбрыгад, тэматычныя акцыі і флэшмобы з удзелам валанцёрскіх атрадаў па прафілактыцы негатыўных з’яў і здаровага ладу жыцця.

На базе ўстаноў адукацыі раёна сёлета дзейнічала 56 аздараўленчых лагераў з агульным ахопам 1280 дзяцей. Ва ўзаемадзеянні з рознымі ведамствамі, грамадскімі аб’яднаннямі працавалі вузкапрофільныя лагеры як дзённага, так і кругласутачнага знаходжання: па асновах бяспекі жыццядзейнасці, здароўезберажэнні, турысцка-краязнаўчага, прафарыентацыйнага, ваенна-патрыятычнага, мастацка-эстэтычнага профілю. А таксама турыстычныя, тэхнічныя, экалагічныя лагеры, лагеры працы і адпачынку, для інтэлектуальна адораных навучэнцаў і для дзяцей з асаблівасцямі псіхафізічнага развіцця.

Удзяляем увагу карыснай занятасці дзяцей. Рэалізавана 17 працоўных праектаў з упраўленнем па працы, занятасці і сацыяльнай абароне. Цесна супрацоўнічаем з нашымі сельскагаспадарчымі прадпрыемствамі, дзякуючы якім была арганізавана работа лагераў працы і адпачынку на базе сельскіх устаноў адукацыі з прыцягненнем навучэнцаў гарадскіх школ.

Штогод на працягу некалькіх гадоў у раёне ў летні перыяд арганізоўваецца міжнародны лагер дружбы для дзяцей Светлагорска і гарадоў-пабрацімаў з Расійскай Федэрацыі, Малдовы, Польшчы. А сёлета далучыліся і вучні з Грузіі. Гэта дае ім магчымасць азнаёміцца з гісторыяй, традыцыямі і культурай розных куткоў нашай краіны, знайсці новых сяброў.

— Як падрыхтаваліся ўстановы адукацыі раёна да новага навучальнага года?

— У кожным калектыве ўстаноў адукацыі да гэтага пытання паставіліся вельмі адказна. Праведзены капітальныя і касметычныя рамонты. Адрамантаваны харчаблокі, дах, умацавана спартыўная база ўстаноў. Праведзены рамонт спартыўных залаў і раздзявалак, інвентарных памяшканняў, адрамантаваны і пафарбаваны спартыўнае абсталяванне, пляцоўкі, а таксама набыты спартыўны інвентар за кошт бацькоўскай, спонсарскай дапамогі і пазабю­джэтных сродкаў.

Вялікую дапамогу аказвае раённы выканаўчы камітэт. Радуе, што сёння не застаюцца ўбаку арганізацыі і прадпрыемствы раёна. Праяўляюць ініцыятыву і нашы ўстановы. Па выніках удзелу ў праекце “Вялікае падарожжа” італьянскай асацыяцыі LC Settimo Torinese яслі-сад № 17 выйграў грант на суму 2 тысячы еўра. Гэтыя сродкі дазволілі папоўніць матэрыяльна-тэхнічную базу надворным гульнявым абсталяваннем.

— Жанна Васільеўна, якія планы на новы навучальны год? Якія цікавыя творчыя праекты плануеце рэалізаваць?

— Мы жывём у цудоўны час, калі кожны настаўнік, выхавальнік дашкольнай адукацыі, дзе б ён ні знахо­дзіўся, мае магчымасць мець зносіны з калегамі з розных рэгіёнаў. Для гэтай мэты існуе мноства педагагічных сайтаў, аднак жывыя прафесійныя зносіны непараўнальныя з той інфармацыяй, якую мы чэрпаем з інтэрнэту. З гэтай мэтай 2019/2020 навучальны год мы плануем вызначыць як Год прафесійных зносін з калегамі іншых рэгіёнаў для абмену вопытам работы.

Сёння актуальным з’яў­ляец­ца пытанне рас­паўсюджвання вопыту педагагічнай дзейнасці, таму на новы навучальны год запланаваны фестываль “Метадычная скарбонка” прафесійных метадычных распрацовак для ўдасканалення ўзроўню выкладання. Плануем арганізаваць педагагічны марафон, у рамках якога вопытныя педагогі раёна будуць прэзентаваць эфектыўныя формы метадычнай работы, аўтарскія праграмы і распрацоўкі. Мы спадзяёмся, што гэта стане добрым арсеналам для маладых педагогаў і не толькі.

Светлагоршчына славіцца высокім адукацыйным патэнцыялам. Галоўнае — захоўваць і прымна­жаць найлепшыя педагагічныя традыцыі, прымяняючы эфектыўны вопыт і навацыі. Для таго каб забяспечыць высокі ўзровень якасці адукацыі, неабходна выкарыстоўваць у адукацыйным працэсе сучасныя сродкі навучання і вучэбнае абсталяванне, ствараць сучаснае інфармацыйна-адукацыйнае асяроддзе, выбудоўваць індывідуальную траекторыю для кожнага навучэнца, забяспечваць інфармацыйную адкрытасць кожнай установы — гэта галоўны вектар развіцця сістэмы адукацыі нашага раёна на новы навучальны год.

Шчыра віншую ўсіх з надыходзячым Днём ведаў! Жадаю педагогам, навучэнцам, бацькам здароўя, бадзёрасці духу, аптымізму, ажыццяўлення намечаных планаў. Няхай Дзень ведаў заўсёды будзе для вас днём вялікіх надзей і стартам на шляху да новых здзяйсненняў!

Гутарыла Наталля КАЛЯДЗІЧ.